Ezikẹẹrị 30

Ohomorihi vaa sị ụya rị Anijipiti nịnị

1Ezikẹẹrị ka, ẹkụhị ọnya, Ẹnẹyịmavara ộ kà a yị ọnị ka, 2Ozi-ọza, ọnị ọ̀ kà ịsẹ, dị ọnị ọ̀ kà a, ịsị ọnị Ẹnẹyịmavara Ochẹtẹẹngụ kà, ọ ka ọnị ò nowu boro-boro ka, Ẹkụhị ayịhụrịnẹ aa vẹ o. 3Ẹkụhị ọnị Ẹnẹyịmavara vaa sị mẹ ịrẹyị ọ sị gụrị ẹtẹ. Ẹkụhị ọnị ịsa ọrụrụ-ọrụrụ vee du, dị ọ vị ẹngụkata yị ẹkụra ọrụrụ-ọrụrụ ọ́ vị̀ nị. 4A vaa kụ̀ ịrẹkụ ẹtẹ Ijipiti. Ụyọrị ọngwọọngụ vaa yá ẹtẹ Etiyopiya. Aza vị ana a vaa wụụ vàa gụ ẹtẹ, Ijipiti. A vaa kụ wa ẹnya bemi-bemi, dị a jị Ijipiti eburu. 5Isoja ana Anijipiti nịnị na hị́ hụrị ẹtẹ Anikusi, Iridiya, Aniribiya, Arebiya, Ikubu ọnịrị ẹnị ana a na hị́ hụrị aha ana vọ vị ana a vaa wụ̀ ịnị ịrẹkụ ọnọọ. 6Ẹnẹyịmavara kà avaba aza anaa kụ ịrẹkụ yị Ijipiti hụrị Imigidori eyi ẹbẹẹba ne ngụ Asiwanị eyi-ụvẹtẹ vị ana a vaa wụụ ha eyi ịrẹkụ. Isoja ọnị Anijipiti e sii wùu zị avọọ, vị ene e vee vú ẹtẹ. Ọnị Ẹnẹyịmavara Ochẹtẹẹngụ ọ sị ọ ka. 7Ẹtẹ ọnọọ ọ vaa tụ́ osusuu hu avaba ẹtẹ ana vọ ịrẹsụ ẹtẹ nị. Ẹkụra-ẹkụra ene hi ịnị anị vị ana vaa jị eburu. 8Ẹnẹyịmavara kà ịjị ọnị ọọ́ ra jị ịra da Ijipiti, dị a raa wụ̀ avaba aza anaa kụ̀ ịrẹkụụ yị ọ nị, ẹnịnị vaa yẹ ka ọnị ọ vị Ẹnẹyịmavara nị. 9Ịhị ẹkụhị ọnọọ ó tu, dị asị Ijipiti vú ẹtẹ nị, ọnụtụ anị nịnị vaa ngụ ẹpa naa ngụ Anikusi. Ẹ vaa ha Anisudanii kwẹẹtẹ. Angwa vee hí wa, ịhị ụmẹ ọnọọ oo tu. 10Ẹnẹyịmavara Ochẹtẹẹngụ ka, ọnị vaa mẹ ka ogu Anijipiti nịnị ọ tá. Inebukadineza, ohinọyị Ịbabịrọnị ọnị vaa sị dọ wa ogu saka-saka nị. 11Isoja Inebukadineza ẹ́ yị ma vayị ọza. Inebukadineza ọnị wa vaa zị, dị ẹ va gara ẹtẹ Ijipiti sẹkẹ-sẹkẹ. Ẹ vaa tụ̀ ụhwọọ tu Anijipiti nịnị, dị ẹ wụ̀ aza va gụ ẹtẹ ịzọọ. 12Ẹnẹyịmavara kà, ọnị vaa mẹ ka enyi ịnị Irehu Ịnayịrị ọ̀ wụ, dị ọnị sị Ijipiti chire aza edivi ụvọ. Anẹkụra ọsa vee du ẹtẹ Ijipiti ha sẹkẹ-sẹkẹ. Ọnị Ẹnẹyịmavara ọ kà avọọ nị. 13Ẹnẹyịmavara Ochẹtẹẹngụ ka, ori apaapẹ ene hi ẹtẹ Imemihwisi vị ọnị ọnị vee duu ha. Ẹ́ yị ma vana nyị ọza ana vaa mẹ ohii tụra Anijipiti nịnị ịrẹsụ. Avaba aza ene hi ẹkụra ọnọọ vị ọnị ọnị vaa mẹ angwaa hí. 14Eyi-ụvẹtẹ Ijipiti ana aā hị́ Ipatirosi vị ọnị ọnị vaa jị eburu, dị ọnị rị ịzị aā hị́ Izowanị ịra, Izowanị vị ana yà eyi ẹbẹẹba ịnị ẹtẹ Ijipiti. Ọnị vaa sị ụyaa rị aza ene hi ẹtẹ Itebesi. 15Ọ kà ọnị vaa sị ọyịkụ anịị zụ ẹtẹ Iperusiyumi, ịzọọ ọ vị aha ụkata ene hu kere-kere ọnị Anijipiti nịnịị tẹ̀ nị. Avaba ogu Anitebesi vị ọnị ọnị vee duu ha. 16Ọnị vaa jị ịraa da Ijipiti, dị Aniperusiyumi nịnị ee rimanya. Ọvọ ana a jị kara Itebesi vị ọnị ọnị vaa chakaa vaa hi ẹtẹ, dị ọhaara enyi vá kụ́ ẹkụra ọnọọ. Aza ene hi Imehwisi vị ana vaa ra ini angwahi ọnịvị ẹnịnị pooro. 17Ezwọọmụha ene e hi Iheriyoporisi ọnịrị Ibubasitisi vị ene vee su ha ịnị ịrẹkụ ọnọọ. Dị a za ẹnị ana vọ ọrịhị ne hi ẹkụra ọsa. 18Ẹnẹyịmavara kà ịrahụ vaa za ẹkụra ana aā hị́ Itehahwinehesi ịjị ọnị ọ raa gara ụkata Anijipiti nịnị ha; dị ọnị mẹ ka ụkata ene e yee sii wuu zi avọọ ọ́ ta nị. Ọ kà eguhi vaa da ku ẹtẹ Ijipiti, dị a za avaba ene hi ẹkụra-ẹkụra anị ọrịhị. 19Ẹnẹyịmavara kà, ọnị ọ̀ọ maanị raa sị ụya rị Anijipiti nịnị, ẹnịnị vaa dọ ka ọnị ọ vị Ẹnẹyịmavara nị.

Ẹnẹyịmavara ộ dọ ohinọyị Ijipiti ụkata.

20Ezikẹẹrị ka ịnị ẹkụhị ịhịmba, ụhwẹ ịpaapa ịrayị ana tụ ọ ịrayị ẹwụrọnya ana a za ẹnị ve hi Ịbabịrọnị, Ẹnẹyịmavara ộ kà a yị ọnị ka, 21Ozi-ọza, ọnị Ẹnẹyịmavara ọ sị ohinọyị Ijipiti che ụvọ. Ọza ẹ́ yị jị ịsa sụ́ ọ yị ọ ka ọ̀ vị́, dị ọ va nyị ụkata ọ̀yị varẹma zá ụhwọ. 22Booro anị, ọnị Ẹnẹyịmavara kà, ọnịvị ohinọyị Ijipiti ọnị vị̀ nị. Ọnị vee che e ụvọ anị ẹyịva ene zoza ọnịrị ene vịdị che. Ụhwọ anị vaa jị ọ ụvọ. 23Ọ kà ọnị vaa gara Anijipiti nịnịị hi avaba ẹhẹ. 24Ọnị vaa sị ụkata yị ohinọyị Ịbabịrọnị, dị ọnị sị́ ụhwọ anị chire e ụvọ. Ama ọnị vee che ohinọyị Ijipiti ụvọ. Ó vee rimanya, dị ọ sú tụ ọvịdị ọnịvị anị nị. 25Ẹnẹyịmavara kà ọnị vaa tụ ọ ọkụmị, ama, dị ọnị sị ụkata yị ohinọyị Ịbabịrọnị, ịjị ọnị ọ̀ọ sị ụhwọ anị chire ohinọyị Ịbabịrọnị ụvọ dị ọ́ tana a hi Anijipiti nịnị nị, avaba aza vaa yẹ ka ọnị ọ vị Ẹnẹyịmavara nị. 26Ọnị vaa gara Anijipiti nịnị hi avaba ẹhẹ. Ịjọnọọ ẹnịnị vaa yẹ ka ọnị ọ vị Ẹnẹyịmavara nị.

Currently Selected:

Ezikẹẹrị 30: EBTP

Highlight

Copy

Compare