Ezikẹẹrị 26

Ịrẹyị Anitaya

1 # Ayị 23.1-18; Ijow 3.4-8; Emọ 1.9,10; Iza 9.1-4; Imt 11.21,22; Irk 10.13,14 Ezikẹẹrị ka, ẹkụhị ịpaapa ịnị ụhwẹ ana tụ ọ ịrayị ẹwụrọnya ana a kụ ẹnị ve hi Ịbabịrọnị, Ẹnẹyịmavara ộ kà a yị ọnị ka. 2Ozi ọza, ịsị Anitaya nịnị hụvị anị aa jẹ ịrajẹ yị o. Ẹyaa jẹ ka asị oze ọbanyị ana a zịị̄ ngụ Ijerusarẹmị gara ha. Oze anị ọ sị na hi ẹtẹ yị ọnị. A mẹ sị Ijerusarẹmị gara ha aanị, ọnị kụkụ ee vee re mẹ. 3Avọọ, ọnị Ẹnẹyịmavara Ananyị ụkata hu ka, ọnị ọ sị vara ọnịvị ẹwụ nịnị Anitaya. Ọnị vaa mẹ ka anẹkụra ọrụrụ-ọrụrụ ẹ̀ kwẹẹtẹ tu wu nịnị anka enyi ịnị oku mẹẹ da vụụvụ avọọ. 4Ọ kà ẹnịnị e wu ọvọ ana jị kara Ịtaya ọnịrị irehi ọgọdọ ịzị oserẹtẹ awụ nịnị hi. Ọnị vee hì eburu anịị hụrị ẹtẹ dị ọ kụkụ sị vị ịdị osusu kẹnẹ. 5Ẹnẹyịmavara Ananyị ụkata hu ka, ịzị ọ ya ịnị akakana oku avọọ, aza enee zube ivovo vanaa gara ọha ẹnịnị hịrẹ ọyị nị. Ẹkụra-ẹkụra vaa vẹ vaa kụ Anitaya nịnị ẹnya. 6A vaa kụ ịrẹkụ nee tu ẹnị ana ra hi ịnị ẹtẹ obooro dị aa wụ̀ wa. Ịjọnọọ Anitaya nịnị vaa yẹ ka ọnị ọ vị Ẹnẹyịmavara nị. 7Ẹnẹyịmavara Ananyị ụkata hu ka, ọnị aa tu ohinọyị ene huna avaba ohinọyị ka ọ kụ ịrẹkụ vee tu Ịtaya. Ohinọyị ọnọọ ọ vị Inebukadineza ohinọyị Ịbabịrọnị nị. Ọnịrị isoja tawụ-tawụ beri umaata ọnịrị ụkẹkẹ ịrẹkụ ọnịrị aza anaā sịị umaata kụ̀ ịrẹkụ vaa hụrị oze eyi ẹbẹẹba vẹ. 8Avaba ịzị ụ ra hi ịnị eteesu obooro nịnị vị ọnị ọ vaa garaa ha. Ẹnịnị vaa chị́ ụsịị kara wụ nịnị, dị e gu ẹnya ịrẹkụ jẹẹ va ka ọvọ awụ nịnị, dị ẹ kụ ogonto ẹnịnị rị ụvọ. 9Ẹnya ịrẹkụ ẹnịnị vị ẹnẹ ẹ vaa sị nya ọvọ awụ nịnị, dị e wú irehi ọgọdọ awụ nịnị ịzị oserẹtẹ nịnị hi. 10Edudu ọnị umaata ẹnịnị vee chire ẹ́ yị vaa zẹẹ ka è re wu nịnị. Ọvọ awụ nịnị vee henyi ịjị umaata, ọnịrị umoto ịrẹkụ ẹnịnị beri ụkẹkẹ ịrẹkụ ẹnịnị aa ngụ ịnị ẹkụra awụ nịnị dị ẹyaa sụ́ ịrẹyị nị. 11Avaba ẹkụra awụ nịnị vị ẹnẹ vaa ngụụ zị, dị ẹ sị ụ̀hwọ̀ wụ̀ aza awụ nịnị ha, ohinọyị awụ nịnị vị ẹnẹ vaa wụ̀ bẹẹ. 12Ẹnịnị vaa kụ ogu awụ nịnị beri ịsị ohu awụ nịnị. Ọvọ awụ nịnị vị ene é vee wú, dị e wú irehi ọyịza-ọyịza ọnị ụ dà nịnị. Ịrẹta ọnịrị ọchị (ipako) beri ụvụ ene e wú va hi ẹtẹ vị ọnị ẹ vaa kụụ vàa hi irehu. 13#Ẹtẹ 18.22Ẹnẹyịmavara kà ọnị vaa za ahẹ ọnị waa jị nịnị avọọ jẹẹ, ọza ẹ́ yị ma vana wụ ka waa mẹ aahẹ nịnị. 14Ọ kà ọnị vaa vara ẹtẹ awụ nịnị ịda ịzị a vaa gara ọha ivovoo hịrẹ ọyị. Ẹnẹyịmavara Ananyị ụkata hu ka ọnị ọ sị ọ ka ka, ọza e yi me vene tenyi ẹkụra awụ nịnị dà paa. 15Ọ kà ẹwụ nịnị Anitaya, ịjị àa ra nyị ẹbẹẹba awụ nịnị, aza ana ra hi utenyi vaa hụrẹ ayịnẹ ịjị ẹẹ yaa wụ́ aza ana aa wụ̀ mee nowu. 16#Ẹtẹ 18.9,10Avaba ohinọyị anẹkụra ene hi ụtenyi vee chii hụụ ịrẹsụ aga ẹnịnị. Ẹ vaa ngwa awuru ẹnịnị ana a mẹ̀ ụkọrọ hii tịtẹ, dị ẹ yaatụ hi ini eteesu. Ịsị e tu wu nịnị vaa mẹ angwaa hi wa, dị ẹyaa dá ẹgahị. 17Ẹnịnị vaa jị òrèrè yị wụ nịnị, dị ẹ ka: kaaa! ẹkụra ene eyi maanị yẹ, a maanị vú ẹtẹ nị. Ẹpa awụ nịnị enee hi ịrẹsụ enyi ẹẹ ta. Ẹwụ ọnị ọnịrị aza anị maanị nyị ụkata ịnị enyi, dị wee chire avaba aza ana ra ụtenyi angwa nịnị. 18Ụ mẹ va sị sẹ ẹdụ nịnị aanị, ẹkụra-ẹkụra ene hi ịnị akakana ẹnyị vị anaa dá ẹgahị. Anẹkụra ẹnẹẹ mẹ wụ ka á ree vu wu nịnị ẹtẹ ộ za wa zizi. 19Ẹnẹyịmavara Ochẹtẹẹngụ ka, ọnị vaa tụ wụ osusu anka ẹkụra ana a jị eburu dị ẹ̀ yị nyị ọza ana kụkụ ra ịnị anị avọọ. Ọnị vaa mẹ ka we vu hi ịnị enyi ana nyịnẹ nịnị. 20Ẹnẹyịmavara kà ọnị vaa dụ wụ nịnị ngụ ụsị nee tu aza ene wusu hụrị ụmọrụmọ. Ọnị vaa mẹ ka ẹwụrị oku nịnị ẹ̀ kụkụ na ra hi iruvo ẹtẹ. Wẹ́ yị ma vana vavẹ ẹhẹ ọnọnị va ra nịnị. 21#Ẹtẹ 18.21Ẹnẹyịmavara Ananyị ụkata hu ka, ọnị vaa sị wụ nịnịị mẹ apojuwe ene vee hi ọzọza angwa. Ịsị ọnị vaa sịị za ẹhẹ awụ nịnị ịrẹsụ ọ vị ọnọọ nị. E ve nee sì wu nịnị, ọza ẹ yị me vene re wu nịnị paa.

Currently Selected:

Ezikẹẹrị 26: EBTP

Highlight

Copy

Compare