Ezikẹẹrị 2

Á mẹmẹ hị́ Ezikẹẹrị

1Ezikẹẹrị ka ọza anaa kà ịrẹyịị yị ọnị aanị ộ kà a ọnị ka, ozi-ọza, ọnị ọ̀ kwẹẹtẹ jẹẹ, dị ọnị Ẹnẹyịmavara ọ̀ kà ịrẹyịị yị ọnị. 2Ọngwẹ ọnọnị mẹ vavọọ aa kà ịrẹyị yị ọnị kẹnẹ, dị ụhwẹ (ụkata) Ohomorihi ngụ ọnị ẹngụ, dị ọ sị ọnị vọrọ jẹẹ nị. Ọnị ộ wụ ọngwẹ ọnọọ maa yịị kà ịrẹyị dị ọ ka. 3Ozi-ọza, ọnị Ẹnẹyịmavara aa tụ́ ọnịị hi Anisirẹrị nịnị. Ẹnịnị ệ vịdị raa kụ̀ hịrẹ ọnị dị ẹ va eyirazị ka ọnị nị. Booro aanị vị ọnị ẹyaa yịị kụ̀ụ hịrẹ ọnị anka ohiku ẹnịnị mẹ vịdị mẹ. 4Ayị ẹnịnị ọọ katẹngụ, ẹnịnị ẹ́ yị sị ụbanyị yị ọnị, ọnị aa tụ ọnị Ezikẹẹrịị hi wa, dị ọnị ọ̀ na kà a yị wa ịsị ọnị Ẹnẹyịmavara Ochẹtẹngụ aa kà a yị wa. 5Aza ẹnẹẹ anaa kụ̀ụ hịrẹ ọza avọọ ẹ̀ẹ ka ẹnịị wụ́, ẹ̀ẹ ka ẹnị ẹ́ yị wụ, ẹnịnị vaa yẹ́ ka ọnịsẹ ọnyara yà ịnị ẹngụ ẹnịnị. 6Ẹnẹyịmavara kà, ama, ọnị ozi-ọza, asị ọnị hí angwa ẹnịnị o. A sị ọnị hí angwa ịsa tụra ịsa ọnị ẹẹ ka ẹnịị kà. Ọ kà ẹnịnị vaa sị eyii wụ̀ ọnị, dị ẹnịnị ẹ yị sị ụbanyị yị ọnị; vị́ ọ́ vaa sị mẹẹ anka ọza oo rere ra ịnị akakana iku nịnị avọọ nị. Asị ọnị hí angwa aza ẹnẹẹ anaa kụ̀ụ hịrẹ ọza avọọ. Asị ọnị hí angwa ịsa tụra ịsa ẹẹ ka ẹnịị ka. 7Ẹnẹyịmavara kà, ịsị ọnị ọọ kà a yị ọnị kẹnẹ, ọnị vaa kà a yị wa nị, ẹẹ ka ẹnịị wù, ẹẹ ka ẹnị ẹ́ yị wụ. Asị ayị hi ọnị ka vị Anisirẹrị nịnịị kụ́ụ hịrẹ ọza nị. 8Ọ kà, ọnị ozi-ọza ọ̀ wụ́ ịrẹyị ọnị aa kà a yị ọnị. Asị ọnị na saasa Anisirẹrị nịnị kụ̀ hịrẹ ọnị o. Ẹnẹyịmavara kà ọnị ọ̀ ha irenu anị, dị ọnị ọ̀ rị ịsị ọnị aa sịị yị ọnị aanị. 9#Ẹtẹ 5.1Ezikẹẹrị ka ọnị ô ré ka ọza ộ tana ụvọ hi ọnị, dị ọza ọnọọ sị iwe ọgọdọ ana chẹrẹ ịsa hi rị ụvọ nị. 10Ọza ọnọọ ộ ngwara iwe ọgọdọ ọnọnị, dị ọnị ré ka â chẹrẹ ịsa hị́ ọ eyi ẹnyị, eyi ọsa nị. Orere anaa jị oku oo sụ̀, ịrẹyị anaa kà ayị ọza oo du, ọnịrị ịrẹyị o du wu kù kẹnẹ a vavọọ chẹrẹ hi avaba anị nị.

Currently Selected:

Ezikẹẹrị 2: EBTP

Highlight

Copy

Compare