Ọyịkụra 36

1Avọọ Ibezareri ọnịrị Ohoriyabi ne beri avaba aza ẹnị Ẹnẹyịmavara sị ụkata yị ka ẹ̀ yara mẹ ụna dị ẹ̀ rẹ yara jị ajẹngụ Ohomorihi ẹ vaa mẹ̀ ụkọrọ ajẹngụ ọnọọ anka Ẹnẹyịmavara mẹ kà a nị.

Aza ệ kụ́ ẹyịza ọrụrụ-ọrụrụ vẹ

2Di Imosiisi va hị́ Ibezareri ọnịrị Ohoriyabi ne beri avaba aza ana vọ ẹnị Ẹnẹyịmavara vavọọ sị ụkata yi di e re sì ka ẹnị aa mẹ, dị ọ ka ẹ̀ vẹ dị ẹ̀ va mẹ̀ ụkọrọ ọnọọ nị. 3Dị ẹ dọ avaba ẹnya anị Anisirẹrị kụ́ vẹ ka à sị jị ajẹngụ Ohomorihi hụụnị ụvọ Imosiisi nị. Dị Anisirẹrị aa sịị sị ịnẹ ohinee kụ́ ịsaa vẹ ẹnẹnẹ-ẹnẹnẹ nị. 4Dị avaba anụkọrọ ụvọ ẹnẹẹ ana aā mẹ̀ ụkọrọ ajẹngụ ẹnẹẹ hụrẹ ụvọ hụụnị ụkọrọ 5di e ne tù Imosiisi dị ẹ ka ẹnya ana aza aa kụ́ụ vẹ ẹ sị rụrụ baaba. Ẹ ka ọza ọ yị va zụụ sị avaba anị mẹ̀ ụkọrọ ẹnị Ẹnẹyịmavara kà a ka à mẹ. 6Di Imosiisi va tụ́ ka à na kà a yị avaba aza ene hi ịzị ẹ kụ́ udi tụ́ ka asị a nyị ọza àa vị ọnọrụ àa vị ọnẹẹ ana kụkụ sị ịsa vẹ ka a sị dà ajẹngụ Ohomorihi. Dị ọza ọ̀ yị kụkụ zẹẹ ka aza ẹnẹẹ ẹ̀ kụ́ ịsa vẹ nị. 7Ọza ẹ yị hyakụ sị avaba ịsa ẹnị ẹ nyị mẹ̀ ụkọrọ ajẹngụ ọnọọ.

A mẹmẹ jị ajẹngụ Ohomorihi

(Kụra 26.1-37)

8Aza ana yẹ eyi ụkọrọ hu keekere ịnị aza ana aa mẹ̀ ụkọrọ ajẹngụ ọnọọ ẹ jị ajẹngụ ọnọọ nị. Ệ sị owu ana a para vabẹ ene zoza di enyi anị vị onivuru ọnịrị owu ọsa ana a sị enyi anị onivuru ọnịrị ovivi pō vabẹ dị a sị mẹ enyi anị ọnịrị owu ana vị ovivi di e si hi ịta anị nị. Ịta ọnọọ vị oku ẹẹwụ. Dị ọnụna nịnị sị uhwoto icherubi mẹ̀ ụkọrọ tụ́ ọ nị. 9Avaba oku ịta ẹnẹẹ vị ẹbẹẹbẹ. Ụgọdọ oku ọnya-ọnya vị ahụ ẹbẹẹva tụra ẹẹva, dị ụgana anị vị ahụ ịhịnọnyị nị. 10Ệ gẹ oku ẹẹhị vabẹ dị ẹ rẹ gẹ oku ẹẹhị ọsa vabẹ nị. 11Dị ẹ sị ịta onivuru dị ẹ sị mẹ ẹkara tụ́ ụtọ ịta oze ọnya, dị ẹ rẹ vavọọ mẹ tụ́ ụtọ ịta eyi ọsa nị. 12Dị ẹ rẹ mẹ ẹkara ẹvarẹwụ tụ́ ụtọ ịta eyi ọnya, dị ẹ rẹ vavọọ mẹ tụ́ eyi ọsa nị. Dị ẹkara ẹnẹẹ và eyi ka ẹngụ nị. 13Di e tụ́ igooru ẹvarẹwụ dị ịrẹsụ ẹnịnị yá kẹrẹdẹẹ dị ẹ sị kụ́ ịta oze ẹyịva ẹnẹẹ vabẹ nị. Dị ajẹngụ ọnọọ vị ọnya nị. 14Dị ẹ sị ẹyị ẹvụ di e si hi ịta oku ẹwụrọnya di e si kú ajẹngụ ọnọọ nị. 15Avaba oku ịta ẹnẹẹ vị ẹbẹẹbẹ. Ụgọdọ ọnya-ọnya vị ahụ ẹbẹẹva tụra ẹẹhị, dị ụgana ẹnịnị vị ahụ ịhịnọnyị nị. 16Ệ gẹ oku ẹẹhị vabẹ dị ẹ rẹ gẹ oku ịhịnọnyị ọsa vabẹ nị. 17Dị ẹ mẹ ẹkara ẹvarẹwụ za ụtọ ịta ọnọọ eyi ọnya, dị ẹ rẹ vavọọ mẹ ụtọ eyi ọsa nị. 18Dị ẹ va sị enyusẹ ana aā hị́ ịkọpa di e tụ́ ọ ẹvarẹwụ dị ẹ nyị ịrẹsụ kẹrẹdẹẹ aanị nị. Dị ẹ sị kụ́ ịta ẹnẹẹ gẹ dị ẹ vị ọnya nị. 19Dị ẹ rẹ sị ịtụmpaha ịdẹba ana a jị ngụ azọnọ ovivi di e si kú ajẹngụ ọnọọ nị. Dị ẹ va sị ịtụmpaha ẹvụ dị ẹ và a kú ọ nị. 20Dị ẹ rẹ sị ọchị ịchẹkẹnẹ dị e si hi ọtụ ajẹngụ ọnọọ nị. 21Ụgọdọ ọtụ ọnya-ọnya vị ahụ ẹwụrẹhị, dị ụgana anị vị ẹhụụ ahụ ẹẹva avọọ nị. 22Dị ẹ mẹ avọ tụ́ ịnị ọtụ ẹnẹẹ dị avọ ẹnẹẹ và eyi ka aha ọnya nị. Avọọ e mè hi avaba ọtụ ajẹngụ ọnọọ nị. 23Ê hi ọtụ oohu tụ́ eyi ụvẹtẹ ajẹngụ ọnọọ. 24Dị ẹ sị enyusẹ ene e siī tụ́ ẹkẹhị di e si tụ́ aha ẹbẹẹva ọnị ọtụ ẹnẹẹ vaa jẹẹ ịrẹsụ anị nị. Ệ mẹ aha ẹẹva yị ọtụ ọnya-ọnya, dị ẹ yà obooro avọ ana a mẹ tụ́ ịnị ọtụ ẹnẹẹ nị. 25E re hi ọtụ oohu tụ́ eyi ẹbẹẹba ajẹngụ ọnọọ, 26dị ẹ rẹ sị enyusẹ ene e siī tụ́ ẹkẹhị di e si tụ́ aha ẹbẹẹva, dị ẹvẹẹva hi iruvo ọtụ ọnya nị. 27Dị e hi ọtụ ịhịnọnyị tụ́ eyi ọnị ọyịị̄ zị naa ngụ ẹtẹ ịnị ajẹngụ ọnọọ nị. 28Di e re hi ọtụ ẹvẹẹva hi ịnị ọgọgọ ajẹngụ ọnọọ éyi ọnị ọyịị̄ zị naa ngụ ẹtẹ nị. 29Ọtụ ene hi ịnị ọgọgọ ẹnẹẹ vị ẹvẹẹva huu na hịrẹ. Dị ẹ va sị ẹkara ọnya za wa vabẹ nị. Avọọ ọtụ ene hi ọgọgọ eyi ẹyịva mẹ̀ yà nị. 30Avaba ọtụ ene e hi vị ịhịnta. Dị ẹ sị enyusẹ ana a sịị̄ mẹ ẹkẹhị di e si tụ́ aha ẹwụrịhịnọnyị, dị ẹvẹẹva yà iruvo ọtụ ọnya-ọnya nị. 31Ẹnịnị ẹ rẹ bẹ ọchị ịchẹkẹnẹ, dị ẹ kụ́ ẹẹhị tụra ọtụ ene hi eyi ọnya, ịnị ajẹngụ ọnọọ nị. 32Dị ẹ rẹ vavọọ kụ́ ẹẹhị tụra ọtụ ene hi eyi ọsa nị. Ẹ rẹ vavọọ kụ́ ẹẹhị tụra ọtụ ene hi eyi ọnị ọyịị̄ zị naa ngụ ẹtẹ ịnị ajẹngụ ọnọọ. 33Â nyị ọchị ana jị ajẹngụ ịnị akakana, dị ahịka achẹva ọtụ ọ yà dị ọ na kà ajẹngụ ọnọọ eyi ẹnyị eyi ọsa nị. 34Dị ẹ sị igooru kú avaba ọtụ ẹnẹẹ, dị ẹ rẹ sị igooru tụ́ ochirigege ana za ọchị ana a sị jị ajẹngụ ọnọọ ẹvẹnẹ-ẹvẹnẹ jẹẹ nị. Ọchị ana jị ajẹngụ ọnọọ ẹvẹnẹ-ẹvẹnẹ vị ẹnị ẹ sị igooru kú. 35Ệ sị owu onivuru ọnịrị owu ana a sị enyi onivuru ọnịrị ovivi pō vabẹ dị a sị mẹ enyi anị ne beri owu ovivi dị ẹ ta a vabẹ di e si hi ịta ajẹngụ ọnọọ nị. Dị aza ana yẹ eyi ụkọrọ sị uhwoto icherubi mẹ̀ ụkọrọ hị́ ọ nị. 36Dị ẹ rẹ sị ọchị ịchẹkẹnẹ di e si hi ọtụ ẹẹna nị. Dị ẹ sị igooru kú ọtụ ẹnẹẹ nị. Dị ẹ rẹ kú igooru dị ịrẹsụ anị yá kẹrẹdẹẹ tụ́ ịnị ọtụ ẹnẹẹ nị. Dị ẹ sị enyusẹ ana a sịị̄ mẹ ẹkẹhị dị ẹ sị mẹ aha ẹẹna ọnị ọtụ ẹnẹẹ vaa jẹẹ ịrẹsụ anị nị. 37Ê hi ịta ẹnị ẹ sị jị oze ajẹngụ ọnọọ. Owu ēni e si hi ịta ọnọọ vị ẹnị ẹ ta vabẹ. Enyi anị vi onivuru ọnịrị onivuru beri ovivi ene e pō vabẹ ne beri ovivi. Dị ẹ mẹ̀ ụkọrọ hi ọ ẹtẹẹtẹrẹ nị. 38Ê hi ọtụ ẹẹhị, di e tụ́ enyusẹ ana yá ịrẹsụ kẹrẹdẹẹ tụ́ ọ nị. Dị ẹ sị igooru kú ẹbẹẹba ọtụ ẹnẹẹ ọnịrị ọchị ana a sị kara wa nị. Dị ẹ va sị enyusẹ ana aā hị́ ịkọpa dị ẹ sị mẹ aha ọnị ọtụ ẹnẹẹ vaa jẹẹ nị.

Currently Selected:

Ọyịkụra 36: EBTP

Highlight

Copy