Ọyịkụra 25

Ịsọvọ ana vàa mẹ yị Ajẹngụ Ohomorihi

(Kụra 35.4-9)

1Ẹnẹyịmavara ộ kà a yi Imosiisi dị ọ ka 2Imosiisi ọ̀ kà a yị Anisirẹrị ka ẹ̀ẹ sị ịsa vaa mẹ̀ ọnị ẹyịza; ọ ka ọza anị ayị anị ọ̀ọ sị ọ ka ọnị aa sị ịsaa vẹ di Imosiisi ọ̀ dọ ọ yị ọnị. 3Ịsa anị Anisirẹrị vaa sị naa mẹ Ẹnẹyịmavara ẹyịza ẹ vị igooru, ẹkẹhị ọnịrị enyusẹ ana aā hị́ ịkọpa. 4Ẹ rẹ vaa sị ịta ozoza eni enyi anị vị ivuru ọnịrị ana a si ovivi ọnịrị ivuru pō enyi anị vabẹ ne beri ovivi ọnịrị ẹyị atẹmẹ ovivi vaa yị ẹmị Ẹnẹyịmavara. Ẹ̀ rẹ si ịta ana a sị ẹyị ẹvụ hi 5ne beri ịtụmpaha atẹmẹ ana a jị ngụ azọnọ ovivi di o zoza ne beri ịtụmpaha ozoza va mẹ̀ ọnị ẹyịza. Ọ kà ẹ̀ rẹ kụ́ ọchị ịchẹkẹnẹ va yị ọnị. 6Ẹnẹyịmavara kà ẹ̀ sị angwẹ vẹ ana a vaa sị tụ́ ini ozotupa, dị ẹ̀ rẹ sị angwẹ ozoza ana aā kà a hi ọza ịrẹsụ ne beri eturare ọnị agụ anị zoza vẹ. 7Ẹnẹyịmavara kà ẹ̀ rẹ sị ịrẹta ozoza ana katarihi dị ọ nyị achẹrẹ irenyi-irenyi vẹ ana a vaa sị mẹ ọtụrarachị tụ́ ịnị ọvayịrẹsụ awuru oni ohirẹsụ ọbanyị irehi Ohomorihi vee chire. 8Ẹnẹyịmavara kà Imosiisi ọ̀ kà a yị Anisirẹrị ka ẹ̀ jị ajẹngụ yị ọnị. Ịzọọ ọnị vaa raa beri wa nị. 9Ọ kà ẹ̀ jị ajẹngụ ọnọọ dị ẹnya anị ọ̀ gụ tụ́ ọ anka ọnị mẹ̀ vaa sị zụ̀ Imosiisi.

Apoti Oto

(Kụra 37.1-9)

10Ẹnẹyịmavara kà Imosiisi ọ̀ kà a yị Anisirẹrị ka ẹ̀ sị ọchị ịchẹkẹnẹ, dị ẹ̀ sị mẹ apoti oto. Ụgọdọ apoti ọnọọ vaa vị ẹhụụ ahụ ẹẹta rị ẹjịjị, dị ụgana vị ẹhụụ ahụ ẹẹva. Dị ahịka ẹhụụ ahụ ẹẹva ọ rẹ nẹba vị nị. 11Ọ kà ẹ̀ sị igooru obooro kú avaba anị ịnị ịnẹ ọnịrị ẹhẹẹhẹ. Dị ẹ̀ rẹ sị igooru kara a ụtọ-ụtọ. 12Ọ kà, “Si igooru mẹ ochirigege ẹẹna dụ wa sị tụ́ ịnị ahụ ẹyịna apoti ọnọọ. Ochirigege ẹẹva ọ̀ọ yà eyi ọnya, dị ẹẹva rẹ yà eyi ọsa. 13Dị ụ va si ahị ịchẹkẹnẹ bẹ okutẹ ọgọdọ-ọgọdọ dị ụ si igooru kú avaba anị. 14Dị ụ kà okutẹ ẹnẹẹ ngụ ochirigege ene hi eyi ẹyịva dị àa sịị sị Apoti ọnọọ. 15Okutẹ ẹnẹẹ vị ana vaa yà ini ochirigege ẹnẹẹ pooro, asị a nyị ụmẹ ana a sị tụ̀ ọ. 16Dị ụ vaa kụ́ ịrẹta ẹẹva ọnị mị chẹrẹ ọda ẹnẹẹ tụ́ ọnị mị vaa sịị yị wụ, dị ụ kụ́ ọ hi ini apoti ọnọọ. 17#Ihib 9.5Sị igooru obooro dị wa sị mẹ òkú kú apoti ọnọọ. Ụgọdọ òkú apoti ọnọọ vaa vị ẹhụụ ahụ ẹẹta rị ẹjịjị, dị ụgana anị rẹ vị ẹhụụ ahụ ẹẹva. 18Dị ụ sị igooru tụ́ icherubi ẹẹva, 19dị ụ sị ọnya tụ́ eyi ọnya, dị ụ rẹ sị ọsa tụ̀ eyi ọsa ịrẹsụ oku apoti ọnọọ; icherubi ẹnẹẹ vi oni u vee tụ́ za oku apoti ọnọọ eyi ẹyịva. 20Di icherubi ẹnẹẹ và eyi ka ẹngụ, dị ẹ kụ̀rà avaka ẹnịnị tụ́ ẹba di è si kú oku apoti ọnọọ. 21Kụ́ ịrẹta ọnị mị chẹrẹ ọda ẹnẹẹ tụ ọnị mị vaa sii wụ, dị ụ kụ́ wa hi ini apoti ọnọọ, dị ụ sị oku anị kú ọ. 22Mee vee tù wu nịnị ịzọọ, dị ahịka akẹbẹẹba oku apoti ọnọọ, ịnị akakana anị ọnịrị icherubi ẹnẹẹ ene hi ịrẹsụ apoti oto ọnọọ mị yà dị ma kà avaba ọda amịị wụ dụ wa na kà a yị Anisirẹrị nịnị nị.”

Itevuru ana aa vaa kụ́ Ịbụrẹẹdị Ohomorihi tụ́

(Kụra 37.10-16)

23Ẹnẹyịmavara rẹ ka, “Sị ọchị ịchẹkẹnẹ dị wa sị mẹ itevuru mị. Ụgọdọ itevuru ọnọọ vaa vị ẹhụụ ahụ ẹẹta, di ụgana anị vị ahụ ọnya rị ẹjịjị, dị ahịka ahụ ọnya rị ẹjịjị ọ rẹ nẹba vị nị. 24Si igooru obooro kú avaba anị, dụ wa rẹ si igooru kara ụtọ-ụtọ. 25Bẹ ọchị ẹhụụ ụvọ ọnya dụ wa sị kara ụtọ itevuru ọnọọ dị wa si igooru kú ọ. 26Rẹ si igooru mẹ ochirigege ẹẹna di we tụ́ wa za ẹbẹẹba ahụ itevuru ọnọọ ẹyịna. 27Navọ ochirigege ẹnẹẹ ẹ̀ gụrị ụtọ itevuru ọnọọ agụvị di à zụ kà ọchị ngụ ọ dị à sịị sị itevuru ọnọọ. 28Sị ọchị ịchẹkẹnẹ dụ wa sị bẹ okutẹ, dị wa sị igooru kú wa, dị àa sịị si itevuru ọnọọ. 29Igooru ụ vaa sị mẹ ịchacha ene vee hi ịrẹsụ itevuru ọnọọ nị. Ẹnya ọnịrị ako ana vaa sị ka eche ana a sị mẹ̀ ịsọvọ vị ọnị ụ rẹ vaa si igooru mẹ. 30#Ire 24.5-8Dị ụ sị Ịbụrẹẹdị ana sị mị tụ́ ịrẹsụ itevuru ọnọọ, dị ọ̀ vavọọ yà ọvịdị amị pooro.

Ịzị aā sị ozotupaa tụ́

(Kụra 37.17-24)

31“Si igooru obooro di we si tụ́ aha ana a vaa si ozotupaa tụ́. Si igooru tụ́ iruvo anị ọnịrị ọchị anị ana gọdọ. Ako ozotupa ọnọọ vị ana vaa sị mẹẹ anka ododo avọọ. Ene vene ịzị avị ododoō tụ̀ụ hụrẹ ọnịrị avị ana kara a vị oni u vee tụ́ u vaa bẹ. 32Ozotupa ọnọọ vaa há agẹgẹnẹ ịhịnọnyị. Ẹẹta vaa yà eyi ọnya, dị ẹẹta rẹ yà eyi ọsa. 33Ako ẹẹta ana sị mẹẹ anka ododo ọchị Arịmọndị avọọ vị ana yà ịnị avọ ọchị ọnyọọnya beri ihi ododo ọnịrị avị anị. Anka ọ́ọ̀ọ màa yịị jị ododoo vẹ vaa yà ịnị agẹgẹnẹ ọnya-ọnya. Avọọ agẹgẹnẹ ịhịnọnyị ẹnẹẹ mẹ̀ vaa nyị ako ọnọọ nị. 34Ịzị a vaa sị ozotupa ọnọọ ụvọtaa jẹẹ vaa nyị ako ẹẹna ana sị mẹẹ anka ododo ọchị ana aā hị́ arịmọndị avọọ, dị ẹ nyị ịsị e vene ododo ana aa jịị vẹ. 35Ọchị ẹyịta ana na há agẹgẹnẹ aanị vaa nyị ako ọnọọ ana sị mẹẹ anka ododo ana aa jịị vẹ avọọ. 36Ako ẹnẹẹ ana sị mẹẹ anka ododo avọọ ọnịrị agẹgẹnẹ ẹnẹẹ ne beri ịzị aā si ozotupa ọnọọ hi vị ana vaa si igooru túu vaa bẹ. 37Dị ụ va mẹ ozotupa ịhịmba anị tụ́ ọ di u hu ịra tụ́ ọ dị ẹ̀ẹ zẹtẹẹ nọ ọvịdị. 38Ịsị a vaa sị kà owu anịị hịrẹ ọnịrị ịchacha oni owu anị vaa sụ atịtọọ hi vị ana a vaa si igooru obooro mẹ. 39Avaba igooru ana vaa sị mẹ ozotupa ọnọọ ọnịrị avaba ẹnya anị vaa vi igooru ẹnya ịrẹsụ ọnya. 40#Ụkọ 7.44; Ihib 8.5Wàaa mẹ̀ ẹ, re ka waa saasa ahụ-ahụ anka m mẹ̀ sị zụ̀ wụ ịrẹsụ ataba.”

Currently Selected:

Ọyịkụra 25: EBTP

Highlight

Copy