Ẹsịta 8

Ohinọyị ộ mẹ̀ ọda ana ha Aniju nini hụụnị usu

1Ịhị ana a wụ Ịhamanị gẹdẹ-gẹdẹ di ohinọyị Ahasẹrọsị dọ irehi Ịhamanị ana vị ọnịvị Aniju, dị ọ sị yi Ẹsịta ose anị nị. Dị Ẹsịta kà a yị ohinọyị ọnịrị Imodekaya mẹmẹ gẹ nị. Hụrẹ ịhị ọnọọ Imodekaya kụkụ aa nọ ịda ohinọyị nị. 2Dị ohinọyị tù ochirigege ọnị ọọ̄ sịị sị ụvọ tụ́ ịnị iwe hụụnị ụvọ Ịhamanị, dị ọ sị yị Imodekaya nị. Dị Ẹsịta ọnị rẹ sị irehi Ịhamanị ọnọọ chire Imodekaya ụvọ nị.

3Ẹsẹnị mẹ̀ sị mẹ kwooze, dị Ẹsịta varẹma ne tù ohinọyị, dị ọ ne ẹngụ anị nya ẹtẹ agada ohinọyị, di ee su ùnèe hi ohinọyị ẹngụ nị. Dị a da ịpẹ, dị ọ ka aarịhịnị ọ̀ za ịsa odivi ọnị Ịhamanị, Anagagi ro ka ọnị aa mẹẹ hi Aniju aanị jẹẹ nị. 4Ụmẹ ọnọọ, dị ohinọyị tana okutẹ igooru anị hí Ẹsịta, dị Ẹsịta kwẹẹtẹ jẹẹ ọvịdị anị nị.

5Dị Ẹsịta kà, “Aarịhịnị, wèe nyị mi iyi, dị ụ hị́ mị ọza nị, taarụ! navọ kà a ka à chẹrẹ ọda ọsa ana vaa kú ọda Ịhamanị ozi Ihamedata kwooze. Ọ kà ọda ọnọnị vị ọnị Ịhamanị mẹ kà a sị wụ̀ avaba Aniju ene hi ịnị ẹtẹ ohinọyị va ha. 6M máá nyị ẹngụ ee re ka aza amị ee vú ẹtẹ, dị asị mị tụ́ ohi nị? A vị mị vaa jị ụvọ za ẹngụ dị mee re ka aa wụ̀ anda ayị ha nị?”

7Dị ohinọyị tụ́ Ẹsịta ose anị ọnịrị Imodekaya ohi ka, “Ọ́ọ́ tamayị ka ọnị ọ raà sị irehi Ịhamanị yọ, dị ọnị rẹ zù Ịhamanị gẹ ọchị dị o sú nị, ọ ka agụvị ezigi ọnị ọ kụ́ tụ̀ wa ọnị sị vavọọ mẹ̀ ẹ nị.” 8Dị ohinọyị rẹ kà a yị wa ka, “Ẹ́ẹ́ yẹ ka ọda ọnị ohinọyị ọ̀ọ sị mẹ, ẹ yi nyị ọza ana nyị ẹngụ kụ ọ kwooze? Ama ẹ̀ na chẹrẹ ọda ọsa anka e mè sì. Dị wa si ochirigege ohinọyị sị sị ụvọ tụ́ ọ, dị ẹ̀ sị tụ hi Aniju nịnị.”

9Obooboro ọnọọ a hị́ ọchẹrịsa ohinọyị nịnị, dị ẹ chẹrẹ ịsị Imodekaya kà yị wa nị. Iwe ọda ọnọnị vị ana a sị ẹkụra ọzọza chẹrẹ. A rẹ chẹrẹ tụ́ hí Aniju nịnị anka ẹnị mẹ̀ rẹẹ̀ chẹrẹ ẹkụra ẹnịnị. Dị a kụ́ iwe ọnọọ tụ́ hí ọdọvịdị ẹkụra nịnị, Ịgọvọnọ nịnị, ọnịrị aza ọkọọka ene hi ịnị ẹtẹ ọnọọ hụrẹ Indiya na ngụ Etiyopiya nị. Ẹkụra ẹnẹẹ vi oze ẹchịhịnọnyị tụra ịhịmba. Ịsa ọnọnị vị ana na mẹ ịnị ẹkụhị ohurẹẹta ịnị ụhwẹ ọhụta ana aā hị́ Isivanị. 10Ịzẹyịza, dị Imodekaya sị ịrẹha ohinọyị tụ́ ịnị iwe ọnọọ nị. Dị ọ sị ochirigege ohinọyị sị sị ụvọ hi iwe ẹnẹẹ nị. Dị a kú iwe ẹnẹ yị ọnụtụ ohinọyị nịnị nị. Dị ọnụtụ ẹnẹẹ tụra umaata echeechi na ga wa nị. Umaata ẹnẹẹ vi ana a pá irenyi yị ohinọyị. 11Iwe ọda ọnọọ ộ sị ụkata yị Aniju nịnị ka ẹ̀ kụ́ ẹngụ gụ, di è tenyi ẹngụ ẹnịnị dị ẹ̀ dọ ẹngụ ẹnịnị ha hụụnị ụvọ ọnịvị ẹnịnị. Dị ẹ̀ va eyi kà aza ana àa kú ẹnya ịrẹkụ vẹ ini egidi ẹnịnị ịnị ẹtẹ ọnọọ. Ọda ộ sị oze yị wa ka ẹ̀ wụ́ ose ọnịrị ezi ọnịvị ẹnịnị. Dị ẹ̀ rẹ kụ́ ogu aza ẹnẹẹ. 12Ẹkụhị ana a sị yị Aniju nịnị ka ẹ̀ sị mẹ̀ ịsa ọnọnị vị ẹkụhị ẹwụrẹta ịnị ụhwẹ ẹwụrẹva ịrayị. Ụhwẹ ọnọọ aā hị́ Ada nị. 13Ịsa ana a chẹrẹ tụ́ ịnị iwe ẹnẹẹ vị ana a mẹ ọda tụ ịnị avaba ẹtẹ ọnọọ. Dị a kà a yị aza irenyi-irenyi ene hi ịnị ẹtẹ ọnọọ ka à sị oze yị Aniju ka è tenyi ẹngụ tù ọnịvị ẹnịnị nị. 14Ọda ọnọnị vị ana tụ́ ẹhẹ ịnị ẹkụra Isusa ana vị ohi ẹtẹ ẹkụra. Dị ọnụtụ ohinọyị nịnị si umaata zwe echeechi na kà ụtụ ọnọnị anka ọda ọnị ohinọyị mẹ yi wa nị. 15Dị Imodekaya chire awuru ohinọyị ana a da achẹrẹ onuvuru, ọnịrị ọvwọọvụ beri anangẹrẹ hị́. Di o kù amu ọbanyị ohinọyị ana a si igooru mẹ nị. Dị Imodekaya jịnẹ hụrẹ ọvịdị ohinọyị aa na nị. Dị avaba ẹkụra Isusa aa jẹ, dị ẹ yaa mẹrị sadaa kẹnẹ nị. 16Dị ụmẹ ọnọọ vị ụmẹ ọnị Aniju nịnị aa sị jẹ ịrajẹ, dị eyee hine ayị nị. Dị ẹ yaa jẹ ka a raà sị ẹnị tụra aba nị. 17Dị avaba Aniju ene hi ịzị ọda ọnọọ tù ịnị ẹtẹ ọnọọ aa rị eche anị. Dị aahẹ aa sụ́ ịrẹyị kuu ịnị avaba ẹtẹ ọnọọ nị. Dị angwahi sị ngụ aza ana vọ ẹngụ nị. Dị aza ọrụrụ-ọrụrụ anẹkụra irenyi-irenyi kụkụ aa hí ẹngụ ẹnịnị Aniju nị.

Currently Selected:

Ẹsịta 8: EBTP

Highlight

Copy

Compare