Ịrẹyị Ọzwọzịsa 6

Asị ọza chi ayị za ogu anị

1Ọzwọzịsa ka aa nyị ịrẹyị odivi ọsa anaa na ịnị ẹhẹ ọnị ọnị ree re. 2Ohomorihi ọọ mẹ ka ọza ọ̀ nyị ẹkẹhị ọnịrị ogu beri ụbanyị. Avaba ịsị ọza ọnọnị eè si kẹnẹ vi ọnị ọ nyị. Ama dị ẹ yị rẹ va zẹ ka ọ̀ rị ọ, dị ahịka aza ẹnẹsa kẹnẹ ẹ vaa rị ọ nị. Osusu kẹnẹ ẹngụ ẹhẹ ọnọnị vị, dị ọ rẹ vị ụya ọdẹngụ nị. 3Ọza ọ zụ ma ozi ẹchẹẹhị dị ọ ku orubo ẹtẹẹtẹrẹ, ama ẹ yị rẹ va nyẹngụ sị ogu ọnị ọ nyị mẹ ayohine ịnị ẹhẹ, ozi ene su tụ ịnị ịnẹ ọnyị anị dị a vaa ma a ọ dahi hu ọza ọnọọ nị. 4Osusu kẹnẹ ọ vị ka aa ma ẹngụ ozi ọnọọ nị. Dị ọ rẹ varẹma ịnị ayodu, dị e hi ayị anị nị. 5Ọ́ rẹ va mẹ ẹhẹ ẹkụhị ọnya dị ọ hyakụ va yẹ ịsị ẹhẹ vị dee, ama ọnị ọ dị dahi huna ọza ana ya ịnị ẹhẹ dị ẹ yị rẹ va mẹ ayohine vụrụ-vụrụ nị; ka ọnị ọ nyị ụhwọtụ. 6Ọza ọnọọ ọ zụ ku orubo ẹtẹẹrẹ ama dị ẹ yị rẹ va sị ogu ọnị ọ nyị mẹ ayohine ịnị ẹhẹ. Aanị ka ẹ yị vị aha ọnyọọnya ọnịrị ozi ene su dị a vaa ma a aa nọ? 7Ọza ò re ịsa rị kẹnẹ ọza aa sịị mẹ avaba ụkọrọ ọnị aa mẹ dị ẹ nyị eyi tụ́ ụhwọ́ nị, ama ọza ẹ ma ka a ka ọ sị hụ ọnị ọgọnị. 8Sị ọyẹrẹyị vana va sị dahi huni onututu kẹ? Ọgụ sị onosiye vaa rị ịnị ịrẹyọyẹ anị ka ọnị ọ yara mẹ̀ ebira ana vọrọ ịnị ẹhẹ kẹ? 9Ịsa ọnị ọza nyị rị ụvọ ọ dahi huni ịsa ana aa va ụvọ anị nị. Ẹngụ ẹhẹ ọnọnị vị osusu, vị ọ sị mẹ̀ ẹ anka ọza oo rere e si ka ọnị ọ̀ dụ ahị za avọọ nị. 10Aa vịdị sị eto avaba ịsa mẹ tịtẹ o si ku ana hụrẹ yẹ ịsị ọzọza vaa vị. Ẹ yị nyị ọza ene zụ pe Ohomorihi nyị ahankata tụ ịrẹsụ ẹhẹ anị. 11Wàa kụ ịrẹka pooro, osusu ọ vị nị, avọọ ọgụ sị ọza àa rị ịnị ẹngụ ahankata ẹnẹẹ? 12Ẹnẹ ka ọnị ọọ yẹ ịsị e rere ọza hu ịnị ụmẹ chee ọnị ọ nyị ọyị mẹ ịnị ẹhẹ osusu ọnọnị? Ẹhẹ vị anaa para hu anka ụmọmọ́ avọọ. Ẹnẹ nyẹngụ ka a ịsị ẹ vaa mẹ ịrẹma ọza, ọọ sị hụụnị ẹhẹ kẹ?

Currently Selected:

Ịrẹyị Ọzwọzịsa 6: EBTP

Highlight

Copy

Compare