Ọda 7

Aza ọnị Ẹnẹyịmavara nyị

(Kụra 34.11-16)

1 # Ụkọ 13.19 “Imosiisi ka, Ẹnẹyịmavara Ohomorihi ẹnịnị vaa sị wa na ngụ ịnị ẹtẹ ana vaa vị ẹnịnị. Ọ vaa dụ anẹkụra ọrụrụ-ọrụrụ ana ra ịzọọ jịnẹ kwooze yị wa. Eyi ẹnịnị ọ vaa dụ Anẹkụra ẹbanyị-ẹbanyị ana nyị ụkata huna wa ịhịmba. Anẹkụra ẹnẹẹ ẹ vị Anihiti, Anigirigasi, Anamọrị, Anikenaani, Aniperizi, ọnịrị Anihivi ne beri Anijebusi. 2Ịjị Ẹnẹyịmavara Ohomorihi ẹnịnị ọ̀ọ sị anẹkụra ẹnẹẹ yị wa, dị ẹ nyị ẹbẹẹba ẹnịnị, ẹ wụ̀ avaba ẹnịnị ha bemi-bemi. Asị a nyị ọza ọnị ẹ vayị anị, dị asị a nyị oto ọnị ẹnịrị wa mẹ̀ yị ẹngụ. 3Asị ẹ nyị ezi anẹẹ ẹnịnị, dị asị ẹ rẹ sị ezi anẹẹ ga ọza ẹnyẹẹnyị ẹnịnị. 4Asị ẹnịnị kụ́ ezi ẹwụ nịnị na hẹkẹ ori. Ọ̀ọ vavọọ ya Ẹnẹyịmavara vaa kụ ayị, dị ọ wụ ẹnịnị obobooro ọnọọ. 5#Ọda 12.3Èe tu ịzọọ, e wu ụta ori ẹnịnị ha, ẹ chaka ịrẹta ori ẹnịnị rugurugu va ha, ẹ dà ọchị ana a sị mẹ uyi yị ori Asẹra, dị ẹ rị wa ịra.

Aza ẹnẹ Ẹnẹyịmavara nyị

6 # Kụra 19.5; Ọda 4.20; 14.2; 26.18; Ịta 2.14; 1 Ipi 2.9 “Wa vavọọ mẹ̀ ẹ agụvị ka wa sị vị Ẹnẹyịmavara ana vị Ohomorihi awụ nịnị. Ọnị ọ nyị wụ nịnị ka wa vị anị hụụnị akakana aza ene hi ịnị ẹhẹ nị. 7Ẹnẹyịmavara sì ịrẹyị wụ nịnị kẹnẹ, dị ọ nyị wụ ka wa vị aza anị nị. Ẹ yị vị agụvị ka ẹwụ nịnị ọ rụrụ hụụnị anẹkụra ana vọ nị. Ẹwụ nịnị ọ hyakụ weyi hu nị. 8Ama Ẹnẹyịmavara o sì ịrẹyị awụ nịnị, dị o si ka ọnị ọ sị ahụ ku ịrẹyị ọnị ọ hị́ eku anị yị ohiku awụ nịnị nị. Agụvị avọọ ọ sị ụkata anị dọ wụ nịnị ha, dị ọ tụ̀ wụ nịnị hụụnị udi ọrịhị ọnị ohinọyị Ijipiti sị wụ nịnị tụ. 9#Kụra 20.5,6; 34.6,7; Ịrị 14.18; Ọda 5.9,10Tamayị ka Ẹnẹyịmavara Ohomorihi awụ nịnị ọnị ịnya ọ vị ọnịzẹyịza nị. Ọ vaa sị ụvọ za oto ọnị ọ wo, dị aa sị oyisì anị zụ evere awụ ịrẹmị-ịrẹma oze akahị. 10Ama Ẹnẹyịmavara ẹ yị zụ mẹ ka ẹ yị sị ụya rị aza ene è yi sì ịrẹyị anị. 11Agụvị avọọ, booro aanị, wa na saasa ịsị a kọ wụ nịnị aanị; saasa avaba ọda ọnị mị mẹ yị wụ nịnị ajịnị aanị.

Aha ana ya ịnị ọyịwụ chire

(Ọda 28.1-14)

12 # Ọda 11.13-17 “Wàa wụ ọda ẹnẹnị nịnị, dị ụ sị ịzẹyịza aa saasa wa nịnị nị, ịjọnọọ, Ẹnẹyịmavara, Ohomorihi awụ nịnị vaa jẹẹ ịrẹsụ oto oni o wo yị wụ nịnị. O vee sì ịrẹyị awụ nịnị pooro anka ọ́ mẹ̀ wo oto yi ohiku awụ nịnị. 13O vee sì ịrẹyị awụ nịnị, dị ọ mẹ ka ò ze wụ nịnị. Ụ vaa ma ozi nịnị, dị ụ waa rụrụụ hu avọọ nịnị. Ọ va mẹ ka ò ze yị aarẹ awụ nịnị, dị akụ awụ nịnị, eche ọnịrị angwẹ orivi awụ nịnị aa mẹ; ọ vaa mẹ ka ò ze wu nịnị, dị ọ sị ịsụpa ọnịrị atẹmẹ tatarataa wụ nịnị. Ọ vaa mẹ avaba ize ẹnẹnịị yị wụ nịnị ịnị ẹtẹ oni o wo oto yị ohiku awụ nịnị ka ọnị vaa sịị yị wụ nịnị. 14Ẹ yị nyị aza ịnị ẹhẹ oni o vee zee yị anka ẹngụ awụ nịnị. Ẹ yị nyị ọza ịnị awụ nịnị à vị ịsụpa awụ nịnị ene vee kù ọbọrị. 15Ẹnẹyịmavara ẹ yị vaa zẹẹ ka ụkụ ọnyọọnyị ọ̀ za wụ nịnị. Ẹ yị vaa kụ́ ụkụ odivi oni u re nini ịnị ẹtẹ Ijipitii tu wu nịnị, ama ọ vaa kụ waa tu ọnịvị awụ nịnị.

Ẹnẹyịmavara kà è vu anẹkụra ẹnẹẹ ẹnịrị ori ẹnịnị ẹtẹ

16“Re ka avaba anẹkụra ọnị Ẹnẹyịmavara Ohomorihi awụ nịnị ọ̀ọ sị ụkata wụ ka we vu ẹtẹ, wee vu wa ẹtẹ nịnị; à sị ụ vayị ẹnịnị. Àsị u hẹkẹ ori ẹnịnị, agụvị ka ọ va vị ẹngụkata odivi yị wụ nịnị. 17A sị ụ kà a yị ẹngụ awụ nịnị ka aza ẹnẹnị ẹ rụrụ hu wu nịnị nị, agụvị avọọ, wẹ yị nyẹngụ dụ wa nịnị. 18À sị u hí angwa ẹnịnị; tamayị ịsị Ẹnẹyịmavara Ohomorihi awụ nịnị mẹ ohinọyị Ijipiti ọnịrị aza anị. 19Tamayị ụya edivi-edivi ẹnẹ ẹ rị, dị ụ sị eyi awụ nịnị re e. Tamayị ịvọpa ọnịrị ohyozirenu, ọnịrị ụkata ọbanyị ọnị Ẹnẹyịmavara Ohomorihi awụ nịnị sị ngwara wụ nịnị tịtẹ. Ọ́ mẹmẹ vu Anijipiti nịnị ẹtẹ gẹdẹ-gẹdẹ avọọ, avọọ ọ́ mẹ̀ rẹ vee vu aza ọnị u wee hí angwa anị nịnị aanị ẹtẹ nị. 20Ẹnịnị vaa sị vụrị ka ene e zwe na tẹ̀, ama Ẹnẹyịmavara Ohomorihi vee chire wa angwa, di o vu wa ẹtẹ. 21Agụvị avọọ asị ụ hí angwa aza ẹnẹnị agụvị ka Ẹnẹyịmavara Ohomorihi awụ nịnị ya pe wụ nịnị. Ọnị ọ banyị ana vọrọ ka eē hí angwa anị nị. 22Ẹnẹyịmavara Ohomorihi awụ nịnị vaa dụ anẹkụra ẹnẹnị cheeche kwooze eyi awụ nịnị nị. Ọ yị vaa vu wa ụpẹ ọnya wumi agụvị ka uye ịnị avị vaa sị rụrụ kara wụ nịnị. 23Ọ vaa sị ọnịvị awụ nịnị chere ẹwụnị ụvọ, dị ọ tụ wa angwahi ne tu ụmẹ ọnị ụ vaa sị wụ̀ wa ha. 24Ọ rẹ vaa sị ohinọyị ẹnịnị chere wụ ụvọ, dị ụ wụ̀ wa, dị ayị ẹnịnị hi ịnị ẹhẹ. 25Ụ vaa rị ọnyọọnọkụmị ori ẹnịnị ịra. Asị eyi awụ nọ ịnị igooru ọnịrị isiriva ene hi ini ori ẹnịnị. Asị kụ wa mẹ awụ agụvị ka ẹ vaa ịrẹpa za wụ. Ịsa enyisi ẹ vị yị Ẹnẹyịmavara Ohomorihi awụ nị. 26Asị ụ sị ịsa enyisi ẹnẹẹ va ngụ ịnị irehi awụ nịnị, ẹ vị ụ ka ẹwụrị irehi awụ o vu ẹtẹ. Nyị ịhyẹrẹ ori ọnịrị ịsa ẹnịnị. Asị ụ kanyị wa agụvị ka Ẹnẹyịmavara ọ raà chi hi wa.

Currently Selected:

Ọda 7: EBTP

Highlight

Copy

Compare