Ọda 34

Usu Imosiisi

1Imosiisi ộ hụrẹ inozi Imowabi hịrẹ nọ ịrẹsụ ataba Inebo na ngụ ịrẹsụ ataba Ipisiga ana va eyi ka ẹkụra ana aā hị́ Ijeriko. Ịzọọ Ẹnẹyịmavara ya sị avaba ẹtẹ Anisirẹrị zụ ọ nị Ẹtẹ ọnọọ ọ kwẹẹtẹ hụrị Igiriyadi va hịrẹ na ngụ ẹkụra ana aā hị́ Ịdaanị, 2avaba ẹtẹ Inahwitari, avaba ẹtẹ Ehwireemi ọnịrị ẹtẹ Ịmanasẹ ne beri avaba ẹtẹ Ijuda na ngụ oku Imeditareniya. 3Ávọọ ọ mẹ na ngụ Ịnẹgẹvị ụvẹtẹ Ijuda huu ne tu inozi Ijeriko na ngụ Izowa. 4#Oyn 12.7; Oyn 26.3; Oyn 28.13Dị Ẹnẹyịmavara kà yị Imosiisi ka, ẹtẹ ọnọnị ọnị hị́ eku anị ka ọnị vaa sị yị evere Abụrahamị, Ayiziiki ọnịrị Ijekọvụ. Ọnị ọ̀ navọ ka Imosiisi o re e ama ẹ yị vaa ngụ ịzọọ. 5Ịzẹyịza, dị Imosiisi ozi ahụ Ẹnẹyịmavara su ịnị ẹtẹ Imowabi anka Ẹnẹyịmavara vịdị kà a ọnị vaa mẹ. 6Ímosiisi me su, di o ne oku anị tụ ịnị upoporo ẹtẹ Imowabi o va eyi ka ẹkụra ana a hị́ Ịbẹtị-Ipo. Ama ẹ yị nyị ọza ịpa ọnị o ne e tụ pooro tu ajịnị. 7Imosiisi vị ịrayị ẹchẹhị tụra oohu dị o vee su. Ẹ yị nyị ụmẹ ọnị ọchẹngụ anị sị pẹkẹ a vị eyi anị sị hozi vụrụ-vụrụ. 8Dị avaba Anisirẹrị sị ẹkụhị ohurẹẹwụ tịtẹ zị ẹngụ anị ịnị inozi Imowabi ịzọọ nị. 9Ẹnẹyịmavara ộ sị ịrẹyọyẹ yị Ijosuwa ana vị ozi Inuni ọnị Imosiisi nyị dọ ẹngụ aanị ịrẹsụ. Dị avaba Anisirẹrị sị ịrẹsụ yọ dị ẹ saasa ọda ọnị Ẹnẹyịmavara vịdị sị tụ́ Imosiisi hì wa. 10#Kụra 33.11Ẹ yị vana nyị ọnịsẹ ịnị Isirẹrị anka Imosiisi. Ọnịrị Ẹnẹyịmavara vana gẹ ka ịrẹyị eyi-eyi. 11Ẹ yị vana nyị ọnịsẹ ana mẹ̀ ịvọpa anka ọnị Ẹnẹyịmavara tụ́ Imosiisi na mẹ hi ohinọyị Ijipiti ọnịrị ezi ahụ anị ne beri avaba Anijipiti. 12Ẹ yị vana nyị ọnịsẹ ana nyị ụkata mẹ̀ ịsa ẹbanyị-ẹbanyị ene chire ọza angwa anka ịsị Imosiisi mẹ̀ eyi avaba Anisirẹrị.

Currently Selected:

Ọda 34: EBTP

Highlight

Copy

Compare