Ọda 29

Oto ọnị Ẹnẹyịmavara mẹ̀ beri Anisirẹrị ịnị ẹtẹ Imowabi

1Ẹsẹnị ẹ vị ebira ọnị Ẹnẹyịmavaraa kà yị Imosiisi ka Anisirẹrị ẹ̀ mẹ agụvị ọta ọnị ọnịrị wa mẹ yị ẹngụ ịnị ẹtẹ Imowabi nị. Ịrẹyị ẹnẹnị vị irenyi ịsa ọnị ọ vịdị kà yị wa ịrẹsụ ataba Ịhọrẹbị. 2Imosiisi ô hị́ Anisirẹrị nịnị gụ, dị ọ kà; Eyi ẹnịnị ê re ịsị ọnị Ẹnẹyịmavara mẹ ohinọyị Anijipiti ọnịrị ọdọvịdị ẹnịnị ne beri avaba Ẹkụra ọnọọ. 3Ẹnịnị ê re ẹngụkata odivi-odivi ọnịrị ịvọpa beri ohyozirenu ọbanyị-ọbanyị ọnị Ẹnẹyịmavara mẹ̀. 4Booro ve tu ajịnị, Ẹnẹyịmavara ẹ yị zẹ ka eyi ẹnịnị o hweyi tu ọ. 5Ịrayị ẹbẹẹva Ẹnẹyịmavara zụ ẹnịnị oze ịnị ụnọmị nị. Ịnị avaba ụmẹ ọnọọ achị ẹnịnị ọnịrị adava ẹnịnị e yi re vee bó za wa ẹngụ. 6Ẹnịnị ẹ yị nyị ịbụrẹdị ana vọrọ ka ẹ rị a vị eche ana vọrọ ka e hu, ama Ẹnẹyịmavara ộ ọnẹẹ avaba ịsa ọnị ẹ yee si yị wa agụvị dị ẹ kọsẹ ka Ẹnẹyịmavara ọ vị Ohomorihi ẹnịnị nị. 7#Ịrị 21.21-30; Ịrị 21.31-35Ịjị ọnị ẹ va ngụ ẹtẹ Imowabi, Isihoni ana vị ohinọyị Ịhẹsịbọnị ọnịrị Ọgị ohinọyị Anịbasanị ẹẹ gẹ ịrẹkụ tu ẹnị. Ama dị ẹnị nyị ẹbẹẹba ẹnịnị, 8#Ịrị 32.33dị ẹnị dọ wa ẹtẹ ẹnịnị, dị ẹnị ga yị Evere Iruveni ọnịrị Igadi ne beri Ịmanasẹ nị. 9Avọọ ẹnịnị ẹ saasa avaba ịrẹyị oto ọnọọ, dị ò zee yị wa ịnị ịsa tụra ịsa ọnị ẹ yaa mẹ̀. 10Ajịnị avaba awụ nịnị ọ jẹẹ ọvịdị Ẹnẹyịmavara Ohomorihi ẹnịnị, avaba ẹnịnị azọkụ ọnịrị ọdọvịdị ne beri avaba anọrụ. 11Ezweyi, anẹẹ ọnịrị azọga ana ra vahụra wa. Azọga ẹnẹẹ aa da ọkụ, dị ẹ yaa da enyi yị wa nị. 12Ụ ya ịzẹnị ajịnị ka ẹwụrị Ẹnẹyịmavara Ohomorihi ọ mẹ ọkatịtẹ, dị wa hị́ eku tụ ọ ya ẹngụ. 13Ẹnẹyịmavara vaa dọ ka aza anị ẹ vị nị, dị ọnị vị Ohomorihi ẹnịnị nị anka ọnị mẹ wo oto yị ohiku ẹnịnị, Abụrahamị, Ayiziiki, ọnịrị Ijekọvụ. 14Imosiisi kà, ẹ yị vị Anisirẹrị nịnị ịnya Ẹnẹyịmavara aa mẹ̀ oto ọnịrị ịzẹzẹ ọnọnị yị. 15Ẹ yị vị ẹnị ene hi ịzẹnị ajịnị kẹnẹ ịrẹyị ọnọọ za. Ọ za ezi a vana ma.

Ẹrị, Ajịnị ọnịrị ụhwọ Isirẹrị

16Wâ yẹ ẹngụ ẹhẹ ọnị ị ra Ijipiti ọnịrị ị mẹmẹ para ẹkụra irenyi-irenyi hu va ngụ ịzị ị ya aanị. 17Wê re ori ẹnịnị ẹnẹ ẹ sị ọchị ọnịrị ịrẹta bẹ̀, dị ệ sị isiriva ọnịrị igooru tu mẹ nyị ọza ịhyẹrẹ. 18#Ihib 12.15Re ka ẹ yị nyị ọnọrụ, a vị ọnyẹnẹẹ, a vị ovwoovu ọnyọọnyị, a vị ịrẹsụ ana ya ịzẹnị ajịnị ana va hụrẹ ịrẹma Ẹnẹyịmavara Ohomorihi ayị na hẹkẹ ori anẹkụra ẹnẹẹ. Re ka ẹ yị nyị ọza awụ nịnị ana vị ẹchịpa ọnyịrẹyị. 19Re ka, asị a nyị ọza ịzẹnị ana wụ́ ịrẹyị ana za oto ọnọnị ajịnị, ene ro ka ọnị vaa ha ọnị ọ̀ọ sị ayị ọkatẹngụ aa mẹ ịsị ene ze e eyi udivi anị vaa mẹ ka aza ọyịza ọnịrị aza edivi e vu ẹtẹ vabẹ. 20Ẹnẹyịmavara ẹ yị vaa vagu ẹngụ ọza ọnọọ. Ọ nyayịnẹ vee du ayị hi ọ nị. Avaba odivi ana chẹrẹ tụ́ ịnị iwe ọnọnị vị ana vaa nọ ịrẹsụ anị pooro di o vu ẹtẹ saka-saka. 21Ẹnẹyịmavara vaa sị ọ mẹ̀ apojuwe yị avaba ịrẹsụ ene hi Isirẹrị. Ọ vaa kụ́ akanya tu ọ anka avaba ozirenu ana saasa oto ana chẹrẹ tụ́ ịnị iwe Ẹnẹyịmavara anaa sị ịrẹyị anị zụ. 22Ezi ịrẹma awụ nịnị ọnịrị anikinami ene hi aha ene noze vee re akanya ọnịrị ụya ọnị Ẹnẹyịmavara kụ́ tu ẹtẹ awụ nịnị. 23#Oyn 19.24,25Ẹnẹyịmavara vaa sị ohuuru ọnịrị anọ du ẹtẹ awụ nịnị ha. Ẹ yị nyị ịsa ana zụ chire, dị ọ hyakụ va chị. Ẹ yị nyị avị ọnị ọza vee re ịzọọ. Ịzọọ vaa tụ́ osusu anka Isodọmị ọnịrị Igomora ne beri Adima ọnịrị Izeboyimi ọnị Ẹnẹyịmavara sị ọyịkụ-ọyịkụ vu ẹtẹ. 24Ịjọnọọ avaba anẹkụra ana vọ ịnị ẹhẹ vee họ̀ use ka sị ẹ vẹ dị Ẹnẹyịmavara maanị mẹ ẹtẹ awụ nịnị? Sị ẹ vẹ dị ọ maanị nyayịnẹ kụ́ ayị? 25Ohi anị vaa vị ka agụvị ka ẹnịnị ệ sị ahụ jịnẹ oto ọnị ẹnịrị Ohomorihi ohiku ẹnịnị mẹ̀ yị ẹngụ ịnị ụmẹ ọnị ộ sị kụ́ wa hụrẹ Ijipiti. 26Ệ hẹkẹ ori ọnị ẹnịnị ẹ yị vịdị hẹkẹ da. Ẹnẹyịmavara ô gu wa ka asị ẹ hẹkẹ ori ẹnẹẹ. 27Agụvị avọọ ayị kụ́ Ẹnẹyịmavara tu aza anị, dị ọ kụ́ akanya ana ya ịnị iwe ọnọnị tu ẹtẹ ẹnịnị nị. 28Ẹnẹyịmavara ô du ayị ẹtẹẹtẹrẹ hi wa, dị ọ kụ́ wa hụrẹ ẹtẹ ẹnịnị ne hi ikinamị ịzị ẹ ya va ngụ ajịnị nị. 29A nyị ịsa ẹnyị ọnị Ẹnẹyịmavara Ohomorihi sị tẹ̀ yị ẹyị aza: Ama ộ sị ọda anị zụ yị ka ẹnịrị evere ayị ẹ saasa pooro zịna-zịna.

Currently Selected:

Ọda 29: EBTP

Highlight

Copy

Compare