Ọda 26
26
Ẹyịza ịsa ịnị aarẹ ịpaapa
1Ịjị wàa raà dọ ẹtẹ ọnị Ẹnẹyịmavara, Ohomorihi awụ nịnị aa sị wụ nịnị, dị ụ sị yaatụ nị. 2#Kụra 23.19Ọzọza ọ̀ sị ịsa ịpaapa ịsa ịnị aarẹ irenyi-irenyi ana mẹ̀ tụ́ ini uji, dị ẹnịrị uji ọnọọ nọ ịzị Ẹnẹyịmavara Ohomorihi awụ nịnị nyị ka aa hẹkẹ ọnị. 3Ne tu ohirẹsụ irehi Ohomorihi ana ya oze ụkọrọ ịzọọ ịnị ụmẹ ọnọọ. Kà a yọ ka wâ sị yẹ ka wa raà ngụ ịnị ẹtẹ ọnị Ẹnẹyịmavara Ohomorihi awụ nịnị wo oto anị yị ohiku awụ nịnị ka ọnị a sị wụ nịnị. 4Dị ohirẹsụ irehi Ohomorihi ọnọọ dọ wụ nịnị uji ọnịrị ịsa tụ́ ọvịdị ụta ịsọvọ Ẹnẹyịmavara Ohomorihi awụ nịnị. 5Vatụra ịrẹyị ẹnẹnị ọvịdị Ẹnẹyịmavara: Ohiku amị vị Anarami ana aa doodo zị, ẹ yị nyị irehi. Ộ kụ́ aza nọ ẹtẹ Ijipiti. Ẹnị chee ẹ vị ẹ mẹ ngụ ẹkụra ọnọọ nị. Ama ẹ vaa sị rụrụ, dị ẹ vị Anẹkụra ana nyị ụkata nị. 6Anijipiti nịnị ệ chamayị yị, dị ẹ sị ụkata za ayị mẹ̀ ụkọrọ anka ọrịhị ẹnịnị avọọ nị. 7Ệ mẹ̀ nowu hí Ẹnẹyịmavara Ohomorihi ohiku ayị ka ọ gụ yị ụvọ. Ộ wù, di o re ẹngụkata ọnịrị ụya beri ayodu ayị nị. 8Dị ọ sị ụkata anị dọ yị ha hụrẹ Ijipiti nị. Ộ mẹ̀ ịvọpa ọnịrị ohyọzirenu. Ộ mẹ̀ ịsa ọkatẹngụ-ọkatẹngụ ene chire ọza angwa. 9Ộ sị yị vẹ ịzẹnị, dị ọ sị ẹtẹ ozoza ọnọnị yị nị. 10Agụvị avọọ mị sị ịsa ịnị aarẹ ịpaapa ọnị Ẹnẹyịmavara sị yị mị va yọ aanị nị. Wàa vavọọ sị ka a, dị ụ sị uji tịtẹ ọvịdị Ẹnẹyịmavara dị ụ hẹkẹ ẹ nịnị. 11Kụ́ Ẹnẹyịmavara Ohomorihi awụ avọ agụvị ọyịza-ọyịza ọnị ọ mẹ̀ yị ẹwụrị ovwoovu awụ nịnị. Anireevi ẹnịrị azọga ana ra beri wụ nịnị è beri wụ nịnị jị ịrajẹ.
Ịrẹyị agẹẹwụ ịsa ịnị aarẹ
12 #
Ọda 14.28,29 Ịrayị ẹtẹẹta waā sị agẹẹwụ ịsa ịnị aarẹ awụ nịnị na yị Anireevi nịnị, azọga, ezi-oku, esoku agụvị ọzọza ọọ nyị ịsa ana aa rị. Wàa raà mẹ̀ ọsọnị, 13kà a yị Ẹnẹyịmavara kà ẹ yị nyị agẹẹwụ anị ana vọ tụ́ wụ irehi. Wa raà sị yị Anireevi nịnị, azọga, ezi-oku ọnịrị esoku anka ọda ana za ịrẹyị ịsa agẹẹwụ. 14Ẹ yị nyị ọnị mị rị mmi maa ba arụwẹ: Ẹ yị nyị ọnị mị sị jịnẹ hụụnị eehi amị, dị mị vaa za ido. Ẹ yị nyị ọnị mị sị mẹ̀ ịsọvọ yị oku. Mâ wụ́ chire wụ Ẹnẹyịmavara. Mâ mè avaba ịsa ọnị ụ mẹ̀ ọda anị yị mị. 15Kana eyi hụrị aha ọnịnị awụ ẹbẹẹba dị wa mẹ̀ aduwa yị aza awụ Isirẹrị. Sị ụvọ pe ẹtẹ ozoza ọnị ụ sị yị anka u me wo oto yị ohiku ayị nịnị.
Aza Ẹnẹyịmavara
16Ajịnị Ẹnẹyịmavara Ohomorihi awụ nịnị kà a wa saasa avaba ọda anị. Agụvị avọọ sị avaba ayị awụ nịnị sị ịzẹyịza saasa a. 17Ajịnị wa raà dọ beri Ẹnẹyịmavara ana vị Ohomorihi awụ nịnị; dị ụ wo oto ka ụ vaa wụ́ chire, dị ụ sị ụvọ za avaba ọda anị, dị ụ mẹ avaba ịsa ọnị ọ mẹ̀ ọda anị yị wụ nịnị. 18#Kụra 19.5; Ọda 4.20; 7.6; 14.2; Ịta 2.14; 1 Ipi 2.9Ajịnị Ẹnẹyịmavara ọ raà dọ wụ nịnị ka ụ vị aza anị anka ọ me wo oto yị wụ nịnị. Ộ mẹ ọda ka wa saasa avaba ịrẹyị anị. 19Ọ vaa mẹ̀ wụ nịnị banyị hụụnị Anẹkụra ọnyọọnyị ọnị ộ tụ́. Ụ vaa sị ụga ọnịrị ụbanyị yị ịrẹha anị. Aza anị ụ vaa vị anka ô me wo oto nị.
Currently Selected:
Ọda 26: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
