Ọda 23
23
Aza ẹnẹ ẹ̀ yị bẹ tụ ịnị aza Ẹnẹyịmavara
1Ọza ọ̀ọ ya, dị a nị ọ, à vị ka vị a kụ aha ọnọrụ anị kwooze nị, a sị dọ ọ beri aza Ẹnẹyịmavara. 2Ozi ọnị ọnyị anị ọnịrị ada anị ẹ̀ yị nyị ẹngụ anka ẹvarose obooro dị a ma a, a sị a za a ịrịka tụ ịnị aza Ẹnẹyịmavara. Asị a rẹ za evere ezi anị ịrẹma-ịrẹma vaka aza Ẹnẹyịmavara. 3#Ine 13.1,2Ọza ọ̀ọ vị Anaamọnị ọ̀ọ vị Animowabi, a sị dọ ọ tụ ịnị aza Ẹnẹyịmavara. Asị a nyị evere ezi ịrẹma-ịrẹma ana a dọ tụ ịnị aza Ẹnẹyịmavara. 4#Ịrị 22.1-6Ẹnịnị ê yii, ẹ yị da ịsọyịrị yị wụ nịnị ụ mẹ hụrẹ Ijipiti aa vẹ nịnị. Ẹnịnị ẹ yị ká enyi yị wụ nịnị hú. Vị́ ẹnịnị na hị́ ọnọrụ ana aā hị́ Ịbaraamị ozi Ịbẹyọ hụrị Ipetiho ka ò ve chì hi wu nịnị nị. Ipetiho vị ana ya ịnị ẹtẹ Imesopotamiya. 5#Ịrị 23.7—24.9Ama Ẹnẹyịmavara Ohomorihi awụ nịnị ẹ yị dọ ịrẹyị Ịbaraamị. Ohomorihi awụ nịnị ộ vara ozirenu ọnị Ịbaraamị tụ́ hi wu nịnị tụ ịnị ọyịza yị wụ nịnị, agụvị ka ô sì ịrẹyị awụ nịnị. 6A sị ụ mẹ̀ ịsa ọnyọọnyị ana vaa gụ wa ụvọ, à vị ịsị ẹ vaa mẹ ka ò ze yị wa pooro ịnị ẹhẹ awụ nịnị. 7A sị ụ sị eyi wụ Anedomi nịnị, agụvị ka anda awụ nịnị ẹ vị nị. Dị a sị ụ rẹ sị eyi wụ Anijipiti nịnị, agụvị ka azọga ana vịdị ra ịnị ẹtẹ ẹnịnị ụ vị nịnị nị. 8Hụụnị anụmẹ ọhụta daa vana, wa zụ dọ ezi ẹnịnị tụ ịnị aza Ẹnẹyịmavara.
Tenyi udi ọnị isoja nini hi, dị ọ̀ nị
9Imosiisi ộ kà a yị Anisirẹrị nịnị ka: Wàa nọ ịrẹkụ ọnịvị awụ nịnị, re ka udi ọnị u hi nịnị ọọ nị; a sị nyị ọza ana mẹ̀ ebira ịdọtị ịzọọ. 10Ọza ộ ha ara ve tu ka ọnị ộ va enyi hi ẹngụ, ọza ọnọọ ẹ yị kụkụ nị. Ọza ọnọọ ọ̀ jịnẹ hụrẹ udi ọnọọ na ra ẹhẹ. 11Oruva ọ̀ọ maanị ee vee tù, ọza ọnọọ nyịna ẹngụ anị. Ọyị ọ̀ọ sị ngụ ẹtẹ, dị ọ̀ vavẹ. 12Dà aha tụ ịrẹma udi awụ nịnị ịzị aza venee he ehe. 13Kụ ẹnya nịnị ọnịrị ẹdụ, dị ụ wa sị chị́ ụsị ịhyẹrẹ nịnị. Ọza òo ne he ehe, di à sị ịsa ku ọ. 14Agụvị ka Ẹnẹyịmavara Ohomorihi awụ ya avaba aha udi ọnọnị, di e sere wu, dị ọ dọ ha hụụnị ụvọ ọnịvị awụ. Navọ ịzị ụ kụ́ udi aanị ọ vị aha ọnịnị, agụvị dị asị o re ebira odivi ịnị akakana awụ nịnị dị ọ va varẹma wụ nịnị.
Ọrịhị ene zwè hụrị ẹkụra ọsa
15Ọrịhị òo zwè hụụ ịdị ọza ana nyị ọ ve tù wu nịnị, à sị ụ dụ ọ varẹma nịnị. 16Ịzị ee ze e eyi ịnị ẹkụra awụ nịnị dị ọ ka ọnị aà ra ịzọọ, naavọ ọ̀ ra pe wu nịnị. A sị ụ chamayị yọ nịnị. 17#Ire 19.29Imosiisi ka: A sị a nyị Anisirẹrị ọnyọọnyị, ọ̀ọ vị ọnọrụ, ọ̀ọ vị ọnẹẹ, anaa sẹ̀ ịrẹka ini irehi Ohomorihi. 18Ọza ọ̀ọ na sẹ̀ ịrẹka, ọ̀ọ vị ọnẹẹ, ọ̀ọ vị ọnọrụ, dị ọ dọ ẹkẹhị ịnị anị nị, a sị ụ sị ẹngụ ẹkẹhị ọnọọ vẹ ini irehi Ẹnẹyịmavara Ohomorihi awụ. A sị ụ sị ve sí ụta ịsa ọnị ụ vịdị wo oto ka ụ vaa mẹ. Ẹnẹyịmavara ộ nyị ịhyẹrẹ ọsẹrẹka ini irehi Ohomorihi. 19#Kụra 22.25; Ire 25.36,37; Ọda 15.7-11Wàa sị ẹkẹhị, àa vị ịsọyịrị, àa vị ịsa ọnyọọnyị ọsa rere Anisirẹrị ọhụva awụ, à sị ụ dọ ọtụrọsarẹsụ tụ ịnị anị. 20Wàa vavọọ sị ịsa rere anẹkụra ọsa, wa zụ dọ ọtụrọsarẹsụ tụ ọ. Ama àa vị Anisirẹrị yọ nị a sị ụ dọ ọtụrọsarẹsụ, saasa ọda ọnọnị, ka Ẹnẹyịmavara Ohomorihi awụ vaa mẹ ọyịzaa yị wụ ịnị avaba ịsa ọnị ụ vaa mẹ ịnị ẹtẹ ọnị ụ waa naa ra nịnị aanị. 21#Ịrị 30.1-16; Imt 5.33Wèe wo oto ka ụ vaa mẹ̀ ịsaa yị Ẹnẹyịmavara Ohomorihi awụ, re ka ụmẹ anị òo sì tu, waa mẹ̀ ẹ. Ẹnẹyịmavara vaa họ̀ wụ use ịsa oni u wo oto anịị yọ. Wẹ̀ yị mẹ̀ ẹ, ịvị ọ vị yị wụ nị. 22Wẹ yị rị ịvị Ẹnẹyịmavara wè yi wo otoo ịsa ọnyọọnyịị yọ. 23Ama ịsa tụra ịsa ọnị ụ wàa ha irenu wo oto anị, re ka waa mẹ̀ ẹ, anka ọ me ze wu eyi, dị u sị irenu awụ wo oto anị yị Ẹnẹyịmavara Ohomorihi awụ. 24Wàa ngụ ịnị aarẹ ọnọhụva awụ ọnị o chire ịvayịnị hi, wa zụ rị avaba ẹtụtụ ịvayịnị o mè ze wu eyi. Ama wẹ yị nyayịnẹ ha a hi ịnị ẹnya, dị ụ wa sị ọ hụụ ịzọọ. 25Wàa zị oze ịnị aarẹ ọnọhụva awụ ọnị ọ mẹ akụ tụ, wa zụ sị ụvọ wọrọ akụ dị ụ wa rị ọ. Ama wẹ yị nyayịnẹ sị ọ̀kụ́ nọ ịnị aarẹ ọnọhụva awụ na kụ́ akụ ọnị ọ mẹ jẹẹ.
Currently Selected:
Ọda 23: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
