Ọda 20

Ọda ịrẹkụ ọyị kụ̀

1Imosiisi kà Anisirẹrị àa nọ ịrẹkụ, dị è re ka ọnịvị ẹnịnị ẹ rụrụ hụụnị ẹnị dị umaata ẹnịnị ọnịrị ịkẹkẹ ịrẹkụ ẹnịnị rụrụ huuna ẹnịnị nị, asị e hí angwa. Ẹnẹyịmavara ana dọ wa ha hụụnị ụvọ Anijipiti vaa kụ ịrẹkụ yị wa. 2Ama dị ẹ́ vaa nọ ịrẹkụ ọnọọ, ohirẹsụ irehi Ẹnẹyịmavara ọ̀ nọ ọvịdị isoja ẹnịnị, 3dị ọ kà a ka; Ẹwụ nị isoja Anisirẹrị sị ụtọ pe ẹtẹ. Wàa nọ ịrẹkụ ajịnị, asị ụ hị́ angwa ọnịvị. Wèe re wa asị ayị hụrẹ ẹwụ ịnẹ. 4Ẹnẹyịmavara ana vị Ohomorihi awụ nịnị vaa saasa awụ nị kụ ịrẹkụ dị ụ nyị ẹbẹẹba ọnịvị awụ nịnị. 5Ịjọnọọ dị ọdọvịdị awụ nịnị vaa ka yị ọkọnị isoja ana gụ ka; Ọza ọọ da irehi ọwọọwa ọnị ẹ yị kụ na ngụ, oo na eehi. Ẹ yị vọrọ ka ẹngụ ọza ọnọọ o su eyi ịrẹkụ dị ọzẹnẹsa kẹnẹ ọ naa ra ịnị irehi ọwọọwa anị. 6Ọza ọ̀ọ da ụbazị ịvayịnị ọnị ẹ̀ yị rị ịsa anị, o zụ aa nọ eehi. Ẹ yị vọrọ ka ẹngụ ọza ọnọọ o su eyi ịrẹkụ, dị ọzẹnẹsa kẹnẹ ọ naa rị ịsa ịnị ụbazị aanị. 7Ọza ọ̀ọ zị ụsẹ ọnẹẹ tụ oze, ọ zụ aa nọ eehi, dị ọ na nyị ose anị. Ẹ yị vọrọ ka o su tụ eyi ịrẹkụ, dị ọzẹnẹsa kẹnẹ ọ na nyị ọnẹẹ ọnọọ. 8Ịrẹma aza ẹnẹnị, ọza ene èe hí angwa, oo na eehi; ọza e yi si isoja ana vaa tụ aza ana vọ angwahi. 9Ịjị aa maanị raa mẹ ọda tịtẹ, dị ọdọvịdị nịnị nyị aza ana vaa vị ọga isoja nịnị. 10Ẹnịnị aa na gẹ ịrẹkụ tu ẹkụra, ẹ vịdị sị oze yị anẹkụra ẹnẹẹ ka ẹ jị ụvọ yị ẹnị. 11Ẹnịnị ẹ̀ẹ na avaba oze ana ngụ ẹkụra hi ẹtẹ, agụvị ka ẹ jị ụvọ yị wa nị, asị ẹnịnị sị ụya rị wa. 12Ama anẹkụra ọnọọ ọ yị ụvọ yị wa, dị ẹ nyị ka a gẹ ịrẹkụ nị, 13Ẹnẹyịmavara ana vị Ohomorihi ẹnịnị vaa sị ẹkụra ọnọọ chire wa ụvọ, dị ẹ wụ̀ avaba anọrụ ene hi ịzọọ. 14Anisirẹrị nịnị ẹ nyẹngụ kụ anẹẹ ẹnịrị ezi beri ịsụpa ọnịrị ogu ọnịvị ẹnịnị. Ẹnẹyịmavara ọ raà sị avaba ịsa ana vị ọnịvị ẹnịnị yị wa. 15Aanị ẹ mẹ vaa mẹ̀ ẹkụra ẹnẹ ẹ noze hị́ ịzị ẹ vaa ra nị. 16Àa nyị ẹkụra ọnị ẹnịnị dọ ịnị ẹtẹ ọnị Ẹnẹyịmavara aa sị yị wa, ẹ wụ̀ avaba aza ene hi ịzọọ. 17Ẹnịnị e vu avaba aza ene hi ịnị ẹkụra ẹnẹẹ, ọ vị Anihiti, Anamọrị, Anikenaani, Aniperizi, Anihivi, ọ vị Anijebusi, ẹnịnị ẹ saasa ọda Ẹnẹyịmavara. 18Imosiisi ka Anisirẹrị nịnị ẹ wụ̀ wa bemi-bemi agụvị asị ẹ zụ wa ịsa odivi ọnị ẹ ya mẹ hẹkẹ ori ana va mẹ̀ ka ẹnịnị ẹ rị ịvị Ẹnẹyịmavara. 19Ọ kà ẹnịnị àa dọ ẹkụra asị ẹ da ọchị anaā tụ̀ ẹtụtụ hi ẹtẹ, ẹnịnị ẹ daka ku ịzọọ. Avaba ọchị anaā tù ẹtụtụ ịzọọ ẹ yị kụkụ vị ọnịvị ẹnịnị. Agụvị avọọ ẹ ha wa rị, asị e du wa ha. 20Ẹnịnị ẹ zụ da ọchị ana vọ dị ẹ sị mẹ ọbụna na hịrẹ ọvọ ẹkụra agụvị dị ẹ zụ rị ẹkụra ọnọọ.

Currently Selected:

Ọda 20: EBTP

Highlight

Copy

Compare