Ọda 15
15
Ọda ana za ẹkẹhị ọyị dọ rere
(Ire 25.1-7)
1Ịrayị ịhịmba-ịhịmba ẹ̀ vaa sị eyi hụụnị ụta ana aa rị wa. 2Aanị a mẹ vaa mẹ̀ ẹ nị. Ọza tụra ọza anaa sị ẹkẹhị rere Anisirẹrị ọnọhụva anị vaa sị ayị hụụnị anị yọ. Asị ọ kụkụ varẹma na họ̀ ọ ụta. Ẹnẹyịmavara ọnị ụvọta ọ raà kụ ọ kwooze. 3Anikinami ana rị wa ụta kẹnẹ ẹ nyẹngụ dọ ẹkẹhị nị. Ama ẹnịnị ẹ yị nyayịnẹ dọ ọnọhụva ẹnịnị ana rị wa ụta. 4Ẹ yị vọrọ ka a nyị onosiye ịnị akakana ẹnịnị agụvị ka Ẹnẹyịmavara Ohomorihi ẹnịnị vaa mẹ̀ ka o zee yị wa ịnị ẹtẹ ọnị aa sị yị wa. 5Ẹnịnị ẹ̀ẹ saasa avaba ọda Ẹnẹyịmavara ọnị ọnị aa mẹ̀ ọda anị yị wa ajịnị, 6Ẹnẹyịmavara vaa mẹ̀ ka o zee yị wa anka o me wo oto anị yị wa. Ẹ vaa sị ẹkẹhị rere ẹkụra ọrụrụ ama ẹnị ẹ yị vaa dọ erere hụụnị ụvọ ọza. Ẹnị ẹ vaa mẹ̀ ohinọyị tụra ịrẹsụ ẹkụra ọrụrụ-ọrụrụ ama ẹ yị nyị ẹkụra ana vaa mẹ̀ ịjọva tụra ịrẹsụ. 7#Ire 25.35Ịjị ẹnịnị ẹ̀ na ngụ ẹtẹ ọnị Ẹnẹyịmavara aa sị yị wa, àa nyị ọza ịnị ẹngụ ẹnịnị ene re osiye ịnị ẹkụra ọnyọọnyị, asị ẹ̀ sị ụvọ kwoku yọ. 8Ẹ sị ẹhụ ẹkẹhị ana hụ wa mẹ̀ ọyịnẹngụ ẹnịnị rèré wa. 9Asị e rò ka ịrayị ịhịmba anaā sịị sị eyi hụụnị ụta yị ọza ọ sị gụrị ẹtẹ, agụvị avọọ wẹ yị sị. Onosiye ọnọọ òo na owu hị́ Ẹnẹyịmavara, ọza ọnọọ aa mẹ̀ ịvị. 10Ha ụvọ ha yị onosiye, asị ọza rị uhuhu tụ́ ịnị ịsa ana aa sị yị wa. Ọza ọ vavọọ a mẹ̀, Ẹnẹyịmavara vaa mẹ̀ ka o zee yọ ịnị ịsa tụra ịsa ọnị aa mẹ̀. 11#Imt 26.11; Ịmk 14.7; Ịjọ 12.8A mẹ hịka ẹ yị nyị ụmẹ ọnị anarịmanyị ẹ̀ vaa ya ịnị ẹhẹ, agụvị avọọ ọnị mẹ̀ ọda yị wa ka ẹ ha ụvọ tụ́ yị onosiye ọnịrị ọnụzọngwa nịnị.
Ọda ana za ọyị hụrẹ ọrịhị ụvọ
(Kụra 21.1-11)
12 #
Ire 25.39-46
Àa nyị Anihiburu, ọ̀ọ vị ọnọrụ, ọ̀ọ vị ọnẹẹ ana na ẹngụ anị ọrịhị yị ọza, ịrayị ịhịnọnyị kẹnẹ a sị ya ahụ ọza ọnọọ dị ọ nyị ẹngụ varẹma nị. 13Asị ọga anị hụrẹ ẹ ụvọ ka ọọ na ịnị osusu. 14Ọ nyị ịnị atẹmẹ anị ọnịrị ẹvụ anị yọ. Dị ọ rẹ ka akụ ọnịrị eche yọ. Ẹnẹyịmavara vaa mẹ̀ ka o zee yọ huu avọọ nị. 15Ẹnịnị tamayị ka ọrịhị ẹnị rẹẹ̀ vịdị vị ịnị ẹtẹ Ijipiti, dị Ẹnẹyịmavara va dọ wa ha nị. Agụvị avọọ ọnị mẹ̀ ọda yị wa ajịnị nị. 16Ama ọrịhị ọ̀ọ ka ọnị ẹ yị hụrẹ ịda ọga agụvị ka ọnị o sì ịrẹyị ọga anị ọnịrị ovwoovu anị, dị ọ rọ̀ ọnị ẹngụ nị. 17Ọ vavọọ kà a, dị ọga anị sị ọ na oze irehi anị, dị ọ sị osi jị ọ ụtọ ro, dị ọ kụkụ vị ọrịhị pooro. 18Asị ọza re ẹngụkata ụmẹ ọnị aa sị hụrẹ ọrịhị anị ụvọ agụvị ka ọ raà mẹ̀ ụkọrọ ene huna ọnịbaro yọ ịrayị ịhịnọnyị. Ẹnẹyịmavara Ohomorihi vaa mẹ̀ ka o zee yọ ịnị ịsa tụra ịsa ana aa mẹ̀ nị.
Ọda ana za ozi ịpaapa ịsụpa
(Ire 27.26-27; Ịrị 18.15-18)
19 #
Kụra 13.12
Ẹ sị ezi ịpaapa ịsụpa ẹnịnị ana vị araka tụ irenyi yị Ẹnẹyịmavara. Asị a kụ wa mẹ̀ ụkọrọ, dị asị rẹ kụ ẹyị ịsụpa ẹnẹẹ. 20Ịrayị-ịrayị, dị a kụ wa na aha ọnị Ẹnẹyịmavara Ohomorihi nyị ka a ya hẹkẹ ọnị. Dị a wụ̀ wa ịsa ịsọvọ yị Ẹnẹyịmavara, dị ọzọza ọnịrị ovwoovu anị rị ọ. 21Ama àa nyị ịsụpa ene che ahụ, a vị dị o gu eyi nị, a vị dị a nyị ịsa ọsa ana mẹ̀ ẹ nị, asị ẹ sị ẹngụ ịsụpa ẹnẹẹ mẹ̀ ịsọvọ yị Ẹnẹyịmavara Ohomorihi 22Ẹnịnị ẹ zụ wa ịzị ẹ ra, dị ẹ rị ọ anka uye epeni, a vị akọnọ ana wụ́ ịnị ube. Aza kẹnẹ ẹ zụ rị ọ. 23#Oyn 9.4; Ire 7.26,27; 17.10-14; 19.26; Ọda 12.16,23Ama asị a nyị ọza ana rị anya anị. A va a hi ẹtẹ anka enyi.
Currently Selected:
Ọda 15: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
