Ọda 11
11
Aha ana ya ịnị ọyị wụ̀ chire Ẹnẹyịmavara
1Sì ịrẹyị Ẹnẹyịmavara Ohomorihi awụ nịnị, mẹ avaba ịsa ọnị ọ ka yị wụ, saasa avaba ọda anị ịnị ụmẹ tụra ụmẹ. 2Tamayị ajịnị, ịsa ụ raà kọsẹ anị ịnị oze Ẹnẹyịmavara ịnị ẹhẹ awụ beri ọ, ẹ yị vị ezi ewu nịnị ama ẹwụ nịnị o re ịsa ẹnịnị nị. Ẹwụ nịnị ô re ụbanyị Ẹnẹyịmavara, ọnịrị ụkata anị beri ụzụ anị, 3#Kụra 7.8—12.13ọnịrị ohyozirenu anị. Wê re ịsị ọ mẹ Ohinọyị Ijipiti ọnịrị avaba ẹkụra anị. 4#Kụra 14.28Wê re Ẹnẹyịmavara mẹmẹ vu isoja Anijipiti ẹnịrị umaata ẹnịnị beri ịkẹkẹ ịrẹkụ ẹnịnị ẹtẹ saka-saka, di enyi Irehu Ịkẹ mụnẹ wa. 5Wâ yẹ ịsị Ẹnẹyịmavara mẹ̀ yị wụ nịnị ịnị ụnọmị pooro di u vaa ngụ ịzẹnị. 6#Ịrị 16.31,32Wê re ịsị Ẹnẹyịmavara mẹ Idatani ọnịrị Abiramị ana vị ezi Eriyabi ana vị Anirubẹnị. Eyi avaba aza ẹtẹ ộ ha irenu, dị ộ mụnẹ ẹnịrị ovwoovu ẹnịnị, ezi ahụ ọnịrị ịsụpa ẹnịnị beri ajẹngụ ẹnịnị. 7Eyi awụ nịnị Ẹnẹyịmavara mẹ̀ avaba ịsị ẹdẹngụ ẹnịnị nị.
Ize ana ya ịnị ẹtẹ ọnị Ẹnẹyịmavara wo oto anị
8Imosiisi kà a sị ụvọ za avaba ọda ọnị ọnị aa sị yị wa ajịnị agụvị ẹ nyị ụkata na dọ ẹtẹ ana ya akẹnẹ enyi, 9ọnị Ẹnẹyịmavara hị́ eku anị yị ohiku ẹnịnị ọnịrị ezi anị ka ẹ vaa ra a gọdọ. Ẹtẹ ọnọọ oo zoza ẹtẹẹtẹrẹ. 10Ẹtẹ ọnọọ e yi vene ẹtẹ Anijipiti ịzị ẹ vịdị ya, ọnị ẹ yaa dà enyi hi ịsa ịnị aarẹ ẹnịnị anka ụbazị ịsẹpẹ avọọ. 11Ama ẹtẹ ọnị ẹ ya vaa ngụ aanị vị ẹtẹ ana nyị ataba ọnịrị inozi ọnị orihi aa zụ hi. 12Ẹtẹ ọnị Ẹnẹyịmavara tẹsị anị ọ vị nị. Oō sị eyi pe e pooro dị ịrayị ọ gẹ ẹtẹ nị. 13#Ire 26.3-5; Ọda 7.12-16; 28.1-14Imosiisi kà ẹnịnị ẹ saasa ọda ọnị raà sị yị wa ajịnị. E sì ịrẹyị Ẹnẹyịmavara Ohomorihi ẹnịnị, dị ẹ sị avaba ayị ẹnịnị hẹkẹ ẹ. 14Ẹ̀ẹ vavọọ aa hẹkẹ ẹ, Ọ vaa zụ orihi yị wa ịnị ụmẹ ana vọrọ. Ọ vaa zụ orihi yị wa hụụnị orihi ịpaapa na ngụ orihi ọdịrẹma agụvị dị ẹ nyị ịsọyịrị ọnịrị eche ne beri angwẹ orivi. 15Ẹtẹ vee nyị avị yị ịsụpa ẹnịnị. Ẹnịnị vaa rị ịsa, dị ịnẹ ha wa. 16Ama ẹ sị ụvọ za ẹngụ ẹnịnị, asị aza vee vene wa hụrẹ oze Ẹnẹyịmavara na hẹkẹ ori nịnị. 17Ẹ̀ẹ vavọọ na mẹ, Ẹnẹyịmavara vaa kụ ayị hi wa dị ọ za orihi jẹẹ ka asị ọ zụ, dị ịsa ịnị aarẹ ẹnịnị ẹ yị mẹ, dị ẹnịnị su ịjịjọọ hụụnị ẹtẹ ozoza ọnị Ẹnẹyịmavara aa sị yị wa. 18#Ọda 6.6-9Ẹ sị ọda ẹnẹnị tụ ịnị ayị ọnịrị ịnị ivehu ẹnịnị, ẹ́ chẹrẹ ẹ tụ ịnị iwe, dị ẹ sụ ọ za ụvọ ọnịrị ibe ẹnịnị agụvị ọ vị ịsa ana tama wa ayị ịrẹyị Ohomorihi. 19Ẹẹ zụ ọ yị ezi ẹnịnị ụmẹ tụra ụmẹ, ẹ̀ẹ ya ini eehi, ẹ̀ẹ yaa zị ụsị oze, ẹ̀ẹ hụtẹtẹẹ aa tụ́ ụhwọ́, ọnịrị ẹ̀ẹ kwẹẹtẹ. 20Ẹ chẹrẹ ẹ tụ avaba ịrẹsụ ọchị oze irehi ẹnịnị ọnịrị ịrẹsụ oze ọbanyị ọbanyị ene hi ẹkụra ẹnịnị. 21Ẹnịnị ẹ vavọọ sị ụvọ za ịrẹyị Ẹnẹyịmavara Ohomorihi ẹnịnị, ẹnịrị ezi ẹnịnị vee kurobo ịnị ẹtẹ ọnị hị́ eku anị yị ohiku ẹnịnị. Ẹ vaa ra ịzọọ pooro anka eguhi ẹbẹẹba nị. 22Imosiisi ka ẹnịnị ẹ̀ẹ sị ịzẹyịza saasa avaba ọda ọnị ọnị aa sị yị wa aanị, èe sì ịrẹyị Ẹnẹyịmavara Ohomorihi ẹnịnị, ẹ̀ẹ sị ụvọ za ịrẹyị anị dị ẹ sị mẹ̀ ebira mẹ nị, 23ọ vaa dụ avaba anẹkụra ana nyị ụkata hu wa ene hi ịnị ẹtẹ ọnọọ eyi ẹnịnị, dị ọ sị ẹtẹ ẹnịnị yị wa. 24#Ijos 1.3-5Aha tụra aha ọnị ẹ sị ahụ ẹnịnị hi, ọ vaa vị ẹnịnị nị. Ịsị ẹ sị ọ hụrị ụnọmị eyi ụvẹtẹ na ngụ ịrẹsụ ataba Ịrẹbanọnị, hụrị irehu Iyuhwuretisi na ngụ Òkū Imeditareniya. 25Ẹ yị nyị aza ana vaa zụ va eyi ịrazị ka wa. Ẹnẹyịmavara Ohomorihi vaa mẹ ka avaba aza ee hí angwa ẹnịnị anka ọ mẹ raà wo oto anị yị wa. 26Imosiisi ka ọnị aa sị oze yị wa ịhị ọnọọ ka ẹ nyị ka ẹnị ẹ dọ aduwa Ẹnẹyịmavara, a vị ozirenu anị? 27Ọ kà ịhị ọnọọ ọnị aa sị ọda Ẹnẹyịmavara yị wa nị. Ẹ̀ẹ saasa a, Ọ vaa mẹ ka oo ze yị wa. 28Ama ẹnịnị ẹ̀ẹ mẹ akamawụ, dị ẹ na hẹkẹ ori nịnị ẹnẹ ẹ yị nyị ịsị ẹ mẹ̀ yị wa nị, Ẹnẹyịmavara vaa tụ ozirenu hi wa. 29#Ọda 27.11-14; Ijos 8.33-35Ịjị Ẹnẹyịmavara ọ̀ọ raa sị wa na ngụ ẹtẹ ọnị ẹ yaa ngụ ịnị anị na ra aanị, ẹ vaa mẹ̀ aduwa ọyịza ịrẹsụ ataba Igerizimi, dị ẹ tụ ozirenu ịrẹsụ ataba Ẹba. 30Ataba ẹẹva ẹnẹnị vị ana ya eyi ụvẹtẹ Okuha Ịjọdanị ini ẹtẹ Anikenaani nịnị ana ra inozi. Ataba ẹnịnị vị ana ya eyi ịzị ọyịị̄ zịị ngụ ẹtẹ oze ana gụrị ịzị chị ori Imore hi ana va eyi ka ataba Igirigari 31Ẹ̀ẹ raa jịnẹ Irehu Ijodani na dọ ẹtẹ ọnị Ẹnẹyịmavara Ohomorihi ẹnịnị vaa sị wa, ịjị ẹ̀ẹ sị ọ dọ, dị ẹ ra ịzọọ nị, 32ẹ saasa avaba ọda ọnị ọnị aa sị yị wa ọnịrị avaba ọnị aa zụ wa ajịnị.
Currently Selected:
Ọda 11: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
