Emọsị 9

Emọsị ô re re Ẹnẹyịmavara ịrẹsụ ụta ịsọvọ.

1Emọsị kà ọnị ô rẹ Ananyị yị ka ò jẹẹ akaha ụta ịsọvọ. Dị ọ ka yị Emọsị ka o va ịsa hi ịrẹsụ irehi Ohomorihi ẹnẹẹ ẹtẹẹtẹrẹ, di ohyẹtẹ ẹnịnị e ziizi. Dị ọọ chaka a, dị ọ wu za aza ene hi uruvo anị. Àa na nyị aza ana ha, dị ọnị wụ́ wa eyi ịrẹkụ, vaa nyị ọza ana va ha. 2Ẹnẹyịmavara kà ẹnịnị ẹ daka chị ẹtẹ dị ẹ ngụ ọ na yaa nị, ọnị vaa tụ́ wa hị́ ẹhẹ. Ẹnịnị ẹ hịrẹ na ẹbẹẹba, ọnị vaa tura wa chi vẹ ẹtẹ. 3Ẹnịnị ẹ̀ẹ na tẹ̀ ịrẹsụ ataba Ịkamẹrị, ọnị vaa sị wa hụụ ịzọọ. Ẹnịnị ẹ̀ẹ hyakụ na tẹ̀ iruvo òkū, di ọnị ka yị ẹ́wụ́ ka ọ̀ mẹ wa. 4Ọnịrị ẹnịnị ẹ daka za wa ọrịhị ne hi ẹtẹ Anikinami ọnị va mẹ ọda ka a wụ̀ wa ịzọọ. Ẹnẹyịmavara kà ọnị o tenyi ẹngụ ka ọnị e vu wa ẹtẹ, ọnị ẹ yị vaa gụ wa ụvọ. 5Ẹnẹyịmavara Ochẹtẹẹngụ Ananyị yị, Ọ sị ụvọ kanyị ẹtẹ kẹnẹ dị o su enyi, dị avaba aza aa zị ẹngụ nị. Ẹtẹ va sị mẹẹ́ irehu Ịnayịrị Ijipiti enee hi dị ọ hụ avọọ nị. 6Ẹnẹyịmavara vị ana da irehi anị tụ ẹbẹẹba dị ọ sị eteesu mẹ ohyẹtẹ anị. Ọnị o tura enyi hịrẹ hụrẹ ịnị oku, dị ọ vara eyi zụ ọ orihi hi ẹtẹ nị. 7Ẹnẹyịmavara kà aro ọnị ọnị nyị Anisirẹrị ọnị rẹ nyị yị Anetiyopiya nị. Ọnị ọ kụ Anihwirisiti hụrẹ ẹtẹ Ikiriti ọnịrị Anisiriya hụrẹ ẹtẹ Ikiri nị. Avọọ ọnị mẹ rẹ kụ Anisirẹrị hụrẹ Ijipiti nị. 8Ẹnẹyịmavara, Ochẹtẹẹngụ ka ọnị ô re avaba udivi Anisirẹrị nịnị. Agụvị avọọ ọnị vee vu wa ẹtẹ dị ahịka aza chee ẹnịnị kẹnẹ ọnị navọ tụ́ ẹhẹ nị. 9Ọ kà ọnị vaa mẹ̀ ọda, dị ọnị ziizi Anisirẹrị nịnị beri avaba anẹkụra ana vọ anka aā mẹ sị ọbanyịsa banyị ịsa avọọ. Ẹ yị vaa nyị ọza ọyịza ikonya ene ve che ne ta. 10Aza ẹnyị ịnị ẹngụ ẹnịnị anaā mẹ̀ odivi ka ụvọ e yị vee kú ẹnị vị ana vee su usu ụhwọ.

Ọyị va Isisrẹrị na Udi

11 # Ụkọ 15.16-18 Ẹnẹyịmavara kà ụmẹ aa vẹ ọnị vaa varẹma tenyi ẹkụra Idevidi ene du. Ọ kà ọnị vee tenyi eburu irehi anị ene wú. Ọnị vee tenyi ọ̀ da, anka ọ mẹ vịdị yaa ịyẹẹyẹ 12Ọ kà Anisirẹrị nịnị vaa dọ Anedomi ẹtẹ ọnịrị avaba ẹtẹ Anẹkụra ana vọ ana vị anị. Ọ kà ọnị Ẹnẹyịmavara vaa mẹ̀ ọnị mẹ ka avọọ. 13Ẹnẹyịmavara kà ụmẹ aa vẹ ịnị ụmẹ ọnọọ, dị aza ana kụ ịsọyịna gụ aa dọ aza ana jị ịrụkụ oro dị ọza anaa kwọrọ ẹtụtụ igirepi ọnịrị aza anaa ha a aa dọ ẹngụ oro. Ụbazị ịvayịnị ene hi ịrẹsụ ataba ọnịrị ịrẹsụ otutu vaa tụ́ hyọvọ-hyọvọ dị eche gwẹẹtẹ. 14Ẹnẹyịmavara kà ọnị vaa kụ aza anị anaa za ọrịhị hi ikinamị vaa vẹ eehi. Ẹnịnị vee tenyi eburu ẹkụra ẹnịnị da, dị ẹ̀ ra hi ịnị anị. Ẹ vaa kụ ụbazị ịvayịnị, dị e yee hu eche anị, ẹ vaa da ụbazị, dị ẹ yaa rị ịsa anị. 15Ẹnẹyịmavara Ohomorihi ẹnịnị ka, ọnị vaa sị wa ahụ hi ẹtẹ geri-geri ịnị ẹtẹ ọnị ọnị sị yi wa. Ọza e yi me vene hu wa ahụ hụrẹ ịzị ẹ ya paa.

Currently Selected:

Emọsị 9: EBTP

Highlight

Copy

Compare