Emọsị 2
2
Imowabi
1 #
Ayị 15.1—16.14; 25.10-12; Ijer 48.1-47; Ezk 25.8-11; Ịzhw 2.8-11 Ẹnẹyịmavara kà ọnị aa pịva yị Animowabi agụvị ebira odivi odivi ẹnị ẹ mẹ̀. Ẹnịnị ệ kụ ẹchụkụ ohinọyị Anedomi dị ẹ rị ọ ịra dị ọ sụ atịtọ nị. Ẹnịnị ẹ yị mẹ̀ ẹ sị rị. 2Agụvị avọọ ọnị vaa sị ịra du ẹtẹ Imowabi ha, dị ọnị rị avaba irehi ohinọyị ẹnịnị ana ya Ikeriyoti ịra va ha. Owu ịrẹkụ vị ana vaa dọ ẹtẹ, dị ọnịvị ẹnịnị ee hú ịkakanchị ẹ maa wụ́ Animowabi nịnị vaa ha. 3Ọ kà ọnị vaa wụ̀ Ohinọyị ọnịrị ọdọvịdị Animowabi nịnịị ha.
Ijuda
4Ẹnẹyịmavara kà ọnị aa pịva yị Anịjuda agụvị ebira odivi ẹnẹ ẹ mẹ̀. Ẹnịnị ẹ yị dọ ịrẹyị Ẹnẹyịmavara tụ́ ịzọọ, dị ẹ yaa mẹ akamawụụ hi ọ nị. Ẹnịnị ệ saasa ohiku ẹnịnị nyeeyi agụvị ka ệ dọ ịrẹyị ireche ọnị ori ẹnịnị ka yị wa wụ. 5Ẹnẹyịmavara kà ọnị vaa jị ịraa tụ́ Ijuda, dị ọ rị avaba irehi ohinọyị ẹnịnị ana ya Ijerusarẹmị ịra.
Isirẹrị
6Ẹnẹyịmavara kà ọnị aa pịva yị Anisirẹrị nịnị agụvị ebira odivi ẹnị ẹ mẹ̀. Ẹnịnị ệ ná aza ọyịza dọ ẹkẹhị, dị ẹ ná onuruwa nịnị ẹhụ ẹkẹhị adava ụkụha nị. Ẹnịnị ẹ yi vaa mẹ̀ ẹ sịị rị. 7Ẹnịnị a sị onosiye nịnị ịrẹsụ nyịna ịpapara, dị ẹ yi tẹsị aza anaa rị ụya nị. Dị ada ẹnịrị ezi ẹnịnị aa sị ọnẹẹ ọnyara nị. Ẹnịnị ẹ raa sị ịrẹha Ẹnẹyịmavara sisi ẹtẹ 8Avaba ịzị a yaa mẹ ahẹkẹ, vị ẹnẹẹ̄ tụ́ achị ẹnẹ ẹ dọ onuruwa ana rị wa ụtaa hụtụ. Ini irehi Ohomorihi ẹnịnị vị anaā sịị ọtụrọsarẹsụ ẹkẹhị ẹnẹ ẹ dà yị ọnụta ẹnịnịị hị́ echee hú. 9#Ọda 3.8-11Ẹnẹyịmavara kà eyi Anisirẹrị nịnị ọnị wụ̀ Anamọnị ha nị. Aza ẹnẹẹ vị ana hụ anka ụchẹba, dị ẹ nyị ụkata anka ọbanjere. Ẹ yị nyị ọza ana vọ ẹtẹ ịnị ẹnịnị vụrụ-vụrụ. 10Avọọ ọnị mẹ dọ wa ha hụụnị ụvọ Anijipiti nịnị, dị ẹ ya ịnị ụnọmị ịrayị ẹbẹẹva nị. Dị ẹ dọ ẹtẹ Anamọnị nịnị nị. 11#Ịrị 6.1-8Dị Ẹnẹyịmavara kà ọnị ọ nyị ezi ẹnịnị ẹnyị ka ẹ vị ọnụtụ anị. Dị ọnị sị aza ẹnyị tụ́ irenyi yị ẹngụ anị nị. Dị ọ họ̀ wa ka ịzẹyịza waa yọ nị? 12Dị ẹnịnị aa ka aza Ẹnẹyịmavara eche, dị ẹ raa dụ ọnụtụ Ohomorihi ka asị ẹ kà etore ẹnịnị nị. 13Ọ kà ọnị vaa pịrị wa za ẹtẹ anka umoto ana za ẹnya mẹẹ̄ pịrị ịsa za ẹtẹ avọọ. 14Ịzị ẹnịnị ẹẹ rẹ na za, ẹnịnị ẹ yị vaa ha. Ẹ yị nyị ẹ mẹmẹ nyị ụkata na za, ẹ vaa tụ ọkụmị. Ẹnịnị ẹ yị vaa zụ dọ ẹngụ ẹnịnịị ha. 15Ọ kà ẹnịnị ana yara ne ọpa ẹ yị vaa nyẹngụ jẹẹ. Aza ana rẹ ẹ yị vaa zụ dọ ẹngụ nịnịị ha. Avọọ aza anaā sịị umaata kụ ịrẹkụ ẹ yị mẹ̀ vaa zụ ha hụụnị akanya nị. 16Anayọvị ịnị ẹngụ ẹnịnị vi ene vee zwe echi ahwaahụ ịhị ọnọọ.
Currently Selected:
Emọsị 2: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
