Odeyi 12

Ịhẹrọdị ộ kụ́ ẹngụkata tu Ịragụ Ohomorihi

1Ịnị ụmẹ ọnọọ, Ịhẹrọdị ohinọyị ô nyima aa chamayịị yị anịragụ Ohomorihi ẹnyị. 2Ộ za Ijemiisi ẹnẹbẹnị Ịjọọnụ, ộ sị ụ̀hwọ̀ wụ̀ ọọ. 3O mè re ka ô hine Aniju nịnị, dị ọ rẹ na za Ipita nị. Ụmẹ ọnọọ, a sịị̄ rị Eche Ịbụrẹẹdị ọnị ọza ọ̀ yị mā sị òwù tụ́ nị. 4#Kụra 12.1-27Ịjị ọ sị Ipita za, dị ọ sị ọọ na tụ́ ịnị ẹngwa nị. Dị ọ sị ọọ chire isoja nịnị ana a gà ẹnẹẹna hi oze ẹẹna ụvọ, dị ọ ka è sị eyi pe e nị. Di o ro ka àa sị Eche Ọyịparahu rị kwooze, dị à va mẹ̀ ọkarẹyị anị éyi avaba aza nị. 5A mẹ̀ sị Ipita tụ́ ịnị ẹngwa, dị anịragụ ẹnẹẹ ẹ̀ yị tụ́ ụhwọ́, dị ẹyaa mẹ̀ aduwaa hi Ohomorihi ẹtẹẹtẹrẹ agụvị ịrẹyị Ipita nị.

Ohomorihi ộ dọ Ipita hụụnị ẹngwa

6Ịnị ịrahụ ịhị ọnị Ịhẹrọdị ro ka ọnị aa sị Ipita nee tù aza aanị, dị Ipita ọnị aa sụ̀ ara ịnị akakana isoja ẹẹva nịnị nị. Dị a sị ẹba ẹẹva sụ́ ọọ, di oserẹtẹ nịnị jẹẹ oze, di eyee sere ẹngwa nị. 7Kẹnẹ, dị anggẹẹrị Ohomorihi vana va jẹẹ ịzọọ dị ẹtẹ hweyi ini irehi ẹngwa nị. Dị anggẹẹrị ọnọọ sị ụvọ nya Ipita ịza, dị ọ ha a, dị ọ ka ọ̀ wụsẹ kwẹẹtẹ nị. Dị ẹba ẹnẹẹ wụsẹ ngwara hụụnị ụvọ Ipita nị. 8Dị anggẹẹrị ọnọọ ka ò tenyi ẹngụ anị, dị ọ̀ kụ́ adava anị hi ahụ nị. Dị Ipita vavọọ mẹ nị. Dị anggẹẹrị ọnọọ rẹ ka ọ̀ sị awuru anị chire, dị ọ̀ọ dụ ọnịị vẹ nị. 9Ipita ộ saasaa jịnẹ hụụnị ẹngwa. Ama ọ yị yẹ ka ịsị anggẹẹrị ọnọnị aa mẹ vị ịzẹyịza, vi o ro ka vi oni ee re ẹtẹ nị. 10Ệ para oserẹtẹ ịpaapa hu, ệ para ụpẹ ọhụva hu, di e kuku ve tù oze enyusẹ ana na ngụ ini ubooro nị. Dị oze ọnọọ ọnị ụvọta na yị ẹngụ anị, dị ẹnịnị para hu na jịnẹ nị. Dị ẹ và tụra oze ọnya aa na, dị anggẹẹrị ọnọọ vana hụụ ịdị Ipita nị. 11Dị Ipita sị yẹ ịsị ẹ mẹ, dị ọ ka, “Booro aanị, ma sị yẹ ka ịzẹyịza yọ. Ananyị yị ọ raà tụ́ anggẹẹrị anị ka ọ̀ va dọ mị hụụnị ụvọ Ịhẹrọdị ọnịrị avaba ịsa ana Aniju nịnị ro ka ẹnị vaa mẹ.”

12Ịjị Ipita maanị sị yẹ, dị ọ nọ ini eehi Imeri ana vị ọnyị Ịjọọnụ ọnị ịrẹha ẹtẹ anị rị Ịmaakị nị. Aza ọrụrụ-ọrụrụ vị ana kụ́ gụ ịzọọ, dị ẹyaa mẹ̀ aduwa. 13Ipita ộ sị ụvọ ká oze ẹ́hẹ, di ozi ahụ ọnẹẹ ọnya aanị ana aā hị́ Iroda vẹ ka ọnị ò ve batọ nị. 14Ọ mẹ̀ wụ́ ọngwẹ Ipita, ayị anị o si hine, ọ yị na oze, dị ọ wụsẹ varẹma na kà a ka Ipita jẹẹ ẹhẹ nị. 15Dị ẹ ka, “U wáá rụ ụra nị?” Dị aa yịị kà a ka ịzẹyịza yọ nọ! Dị ẹ kụkụ ka anggẹẹrị anịị yọ nị. 16Dị Ipita ọnị aa yịị sị ụvọọ ká oze nị. Ẹ mẹ̀ na na oze, di e re e, ộ hí wa irenu. 17Di o mi wa ụvọ ka è kú irenu nị. Dị ọ kà a yị wa, Ánanyị yị mẹmẹ sị ọ hụụnị ẹngwa nị. Dị ọ hụụ ịzọọ nọ aha ọsa nị.

18Ịjị eyi sị nị, isoja ẹnẹẹ ẹ yị nyị eyi vụrụ-vụrụ. Dị ẹ ka ịzị Ipita yà kẹ? 19Dị Ịhẹrọdị mẹ ọda ka èe sì ọọ nị, ama ẹnịnị e yi re e. Dị ọ họ̀ oserẹtẹ ẹnẹẹ use ịrẹyị nị. Dị ọ ka à wụ̀ wa nị. Dị Ịhẹrọdị hụrẹ Ijudiya chí nọ Isesariya, dị ọ na yà ịzọọ nị.

Ị́hẹrọọdụ meme sú

20Ịhẹrọdị vị ana nyayịnẹ aa kụ́ ayịị hi Anitaya ọnịrị Anisidoni. Ẹnịnị ệ tụ́ aza ka è ve re Ịhẹrọdị, di e vịdị ne tù Ibirasitọsị ana vị ọnụkọrọ ohinọyị ana nyị ụbanyị ẹtẹẹtẹrẹ, dị ọnịrị wa si ze nị. Di e dudu va na dá ịpẹ yị ohinọyị ka ịrẹyị ọ̀ ta nị, agụvị ka ịnị ẹkụra ohinọyị ị́sọyịrị aa hụrẹẹ vẹ ana anẹkụra ẹnẹẹ aa rị nị. 21Ịhị ẹkụhị ana a jị si tù, dị Ịhẹrọdị chire awuru ohinọyị anị, dị ọ yaayịtẹ ịnị aga ohinọyị, dị aa kà ịrẹyịị yị aza nị. 22Di e nowu zẹtẹ, dị ẹ ka ẹ yị kụkụ vị ọza kẹnẹ aa kà ịrẹyị aanị, Ohomorihii yọ nị. 23Obooboro ọnọọ, dị anggẹẹrị Ohomorihi nya Ịhẹrọdị ịsa zẹtẹ nị, agụvị ka ọ yị sị ụbanyị yị Ohomorihi. Dị ikukurumi vẹ, dị ẹ rị ọọ, di o sú nị.

24Dị ịrẹyị Ohomorihi ọnị aa yịị ganaa hu avọọ, dị aa banyị nị. 25Ị́banabasị ọnịrị Ịsọọrụ mẹ̀ sị ụtụ ẹnịnị zị ta, dị ẹ hụrẹ Ijerusarẹmị aa vẹ, ệ sị Ịjọọnụ ọnị ịrẹha ẹtẹ anị rị Ịmaakị za.

Currently Selected:

Odeyi 12: EBTP

Highlight

Copy