2 Itimoti 1

1Ẹma vị Ịpọọrụ nị. Ohomorihi ô sì ọ ka ma vị odeyi Ijeesu Ikirisiti, dị ma na kà a yị aza ịrẹyị oni Ohomorihi kà, ka ẹ yị zị nyị ka ọnị ọ yị vaa mẹ ka aza ẹnẹ ẹnịrị Ijeesu Ikirisiti sị vị ọnya, ẹ̀ yàra ịdị anị pooro zịna-zịna. 2#Ụkọ 16.1Maa chẹrẹ iwe ọnọnịị tụ́ụ hi wu Itimoti ozi emi, mée sì ịrẹyị awụ. Ohomorihi Ada ayị ọnịrị Ijeesu Ikirisiti Ananyị yị ẹ̀ mẹ ọyịza wụ, dị ẹ̀ vayị awụ, dị ẹ̀ rẹ mẹ ẹngwọọrọ yị wụ.

Ịpọọrụ ộ tụ́ Itimoti ọtụtụrụma

3Máa kụ́ Ohomorihi avọ, ọnị maa sị ayị ọnyaa hẹkẹ anka ohiku ayị nịnị avọọ. Màaa mẹ̀ aduwa ụmẹ tụra ụmẹ, ọọdụ ọnịrị ịrahụ, mịị̄ tamayị awụ. 4Mâ tamayị ụ maa jị òrèrè. Eyi awụ aa tụra mị ẹtẹẹtẹrẹ; mee sì ka me re wu dị ayị amị ò zụ hine ẹtẹẹtẹrẹ. 5#Ụkọ 16.1Ma rẹ tamayị, ụ mẹmẹ sị ayị ọnya tụra Ohomorihi. Avọọ Ịrọyịsị ọnyị awụ ọbanyị ọnịrị Iyunisi ọnyị awụ mẹ̀ rẹ sị ayị ọnya tụra Ohomorihi nị. Mâ yẹ kaakara ka avọọ ẹwụ mẹ̀ rẹ sị ayị ọnya tụra Ohomorihi nị. 6Agụvị avọọ, mee sì ka wa tamayị ụkata oni Ohomorihi sị wụ, m mẹ̀ sị ụvọ tụra wụ, dị mị mẹ̀ aduwaa wụ. Waa sị ụkata ọnọọ mẹ̀ ịsaa hu avọọ. 7Ụhwẹ Ọnịnị oni Ohomorihi sị yị, ọ mā mẹ ka yee hí angwa. Ama Ụhwẹ Ọnịnị ọnọọ vị anaa mẹ ka yaa nyị ụkata, di yee sì ịrẹyị ọza, dị yaa rẹẹ sị ụvọọ za ẹngụ ayị.

8Asị ụ na nyị ụhị ọ̀yị kà ịrẹyị Ananyị yị! Asị ụ rẹ na nyị ụhị agụvị ẹmị ana yà ịnị ẹngwa agụvị anị. Ama è wè re tenyi ẹngụ anka Óhomorihi ọ̀ọ mẹ̀ sị ụkata wụ, dị ụ wa nyị ụvọ tụ́ ịnị ụya ọnị ọzaa rị agụvị enube ọyịza. 9Ohomorihi ọ dọ yị ha, dị ọ hị́ yị ka yaa mẹ̀ ebira ọnịnị nị. Ẹ́ yị vị agụvị ịsị ị mẹ ọ vavọọ sị mẹ; ama agụvị ayamva anị kẹnẹ ọnịrị agụvị eto ọnị ọ vịdị sị mẹ yọ nị. Ini oze Ikirisiti ọ vavọọ sị vayị ayị hụrị ụmọrụmọ dị a va yẹ ka aa mẹ ẹhẹ nị. 10Ijeesu Ikirisiti Ọdọzaha ayị mẹ̀ vavẹ ẹhẹ aanị, Ohomorihi ọ raà mẹ ka aza è ree. Ijeesu ọ va raà kụ́ ụkata isu kwooze; ọ raà mẹ ka aza ẹ̀ kụkụ yára pooro dị asị e kuku sú. Ini oze enube ọyịza ị ya yẹ ọsọnị nị. 11#1 Itim 2.7Agụvị enube ọyịza ọnọọ Óhomorihi nyị mị ka ma vị odeyi, dị maa kà a, dị ma rẹ sịị zụ̀ aza nị. 12Agụvị avọọ m maanị aa rị ụya aanị nị. Ama ụhị ẹ yị hụ agụvị avọọ nyị mị, agụvị ka mâ yẹ ọza ọnị mị sị ayị tụra. Mâ yẹ kaakara ka ịsị o si chire mị ụvọ, o zụ si eyi pee pooro ne tù ẹkụhị ọkarẹyị. 13Ịrẹyị ịzẹyịza ọnị mị raà sị zụ̀ wụ, sị ụvọ zaa; ọ̀ vị ịrẹyị ọnị ụ waa saasa. Wa vavọọ mẹ ini oze ọ́yị sị ayị tụra Ijeesu Ikirisiti ọnịrị ịrẹyị anị oyisì. 14Sị ụkata Ụhwẹ Ọnịnị ana yà ịnị ayị ayị, dị ụ wa sị sị eyi pe ịsị Ohomorihi si chire wu ụvọ. 15Wâ yẹ ka avaba ẹnịnị ene hi Esiya vana và hụụ ịrẹma amị. Ihwigẹlọsị ọnịrị Iherimogene yà ịnị aza ẹnẹẹ. 16Ohomorihi ọ̀ vayị aneehi Onesihworọsị. Ụmẹ tụra ụmẹ ọ sịị kụ́ mị ẹngụụ nịya nị. Ụhị ọyị nyị ọ ka mị yà ịnị ẹngwa 17Ọ màa yị va ngụ Iroomi kẹnẹ ô sì mi avaba aha, di o ve re mi nị. 18Ananyị yị ọ̀ navọ ịnị ẹkụhị ọkarẹyị, ọ̀ vayị Onesihworọsị oo! Wâ yẹ ka vị ọ nyayịnẹ gụ mị ụvọ Ẹ́hwẹsọsị ẹtẹẹtẹrẹ nị.

Currently Selected:

2 Itimoti 1: EBTP

Highlight

Copy

Compare