2 Ịsamụwẹrị 4

Â wụ Isibọsẹtị

1Ịjị Isibọsẹtị ozi Ịsọọrụ wụ́ ka a raà wụ̀ Abịna Íhebirọnị, dị ẹngụ anị hi azọnọ. Dị angwa kuku ee hi avaba Anisirẹrị nị. 2Isibọsẹtị ộ nyị aza ẹnị ẹẹva anaā kụ́ azaa kú ẹngụ, dị ẹ kụ́ ịrẹkụ na wụ̀ aza. Ọnya ịnị ẹnịnị ọ rị Ibaana, dị ọsa rị Ịrakabị nị. Ẹnịnị vi ezi Irimoni ana vi ịrẹsụ Anịbẹnjamịnị ana ra Ịbẹẹrọtị. 3Anịbẹẹrọtị vi ene zwe nọ Igitayimi dị ẹ kụkụ ra ịzọọ hụrẹ ụmẹ ọnọọ ve tù ọyaanị nị. Ọnị ọ mẹ ka a kụkụụ re wa ka Anịbẹnjamịnị ẹ vị nị. 4#2 Ịsa 9.3Òóku Ijonatani ozi Ịsọọrụ ộ ma ozi ọnọrụ ọnya. Ozi ọnọọ vị ịrayị ẹẹhị ịnị ụmẹ ana a hụrẹ Ijezirẹẹrị va kà a ka Ịsọọrụ ọnịrị Ijonatani ê wusu. Dị ọnẹẹ ana si eyi pè e wụsẹ sị ọ ka eni èe zwe nị. Ọnẹẹ ọnọọ màa há eyi, di ozi ọnọọ hyẹdụ ana mẹ ka ahụ anị è sú nị. Ozi ọnọọ kụkụ vị ana vi oswahụ. Ịrẹha anị aā hị́ Imehwibọsẹtị nị.

5Ẹkụhị ọnya, dị Irekabi ọnịrị Ibaana ezi Irimoni ana vị Anịbẹẹrọtị si hu aa nọ ini eehi Isibọsẹtị nị. Dị ahịka ụmẹ ọọdụ gaaga ẹ sị na ngụ ịzọọ nị. É mè tù ịzọọ, di e ne tù ka Isibọsẹtị hụtụ aa kụ́ areyi ọọdụ nị. 6Di Irekabi nịnị ngụ ịnị ịnẹ eehi na, dị ọ sị mẹẹ ka vị ẹ yaa naa ká akụ nị. 7Ụmẹ ẹnị ẹ vavọọ si were ngụ eehi, ara ọ sị Isibọsẹtị dọ tụ́ ịnị ịbẹẹdị anị ini eehi. Ẹ́ mẹ̀ sị ọ wụ, dị ẹ jị ọ ịrẹsụ dị ẹ sị ịrẹsụ anị di e si zwe nị. Avaba ịrahụ ịhị ọnọọ ẹ sị zị ụsẹ, dị ahịka oze Araba ẹ zị nị.

8Irekabi ọnịrị Ibaana ệ sị ịrẹsụ Isibọsẹtị ne tù Idevidi Íhebirọnị. Dị ẹ ka, “Taarụ Ohinọyị, ịrẹsụ Isibọsẹtị ozi Ịsọọrụ ana vị ọnịvị awụ ene ee sì ka ọnị ọ̀ wụ̀ wụ yọ. Taarụ, Ẹnẹyịmavara o reè pè wu sí Ịsọọrụ atọ ajịnị agụvị ịsị ọnịrị ezi anị ka ẹnị aa mẹ wụ.”

9Di Idevidi vạ ohi yị wa dị ọ ka, “Ma sị Ẹnẹyịmavara ana dọ mị há hụụnị avaba akanya hị́ eku. 10#2 Ịsa 1.1-16Â nyị ẹkụhị ọnya ọnị ọza ịnya va kà a mị Izikiragi ka Ịsọọrụ ô wusu. Vi o ro ka enube ọyịza ọnị va kà a mị nị. Ọza ọnọọ vị ẹnị mị za dị mị wụ̀ ọ ịzọọ. Ọgụ ọnị ọ dọ ini enube ọnị ọ va kà ọ vị ọnọọ nị. 11Ẹwụ nịnị aza edivi ẹ va ngụ ini eehi ne tù aza ẹnẹ ẹ̀ yị nyị ịsị ẹ mẹ̀ wa wụ̀ ọ tụ́ ịnị ịbẹẹdị anị nịnị. Maa họ̀ wụ nịnị oponu anị, dị mị mụ̀ nịnị hụụnị ẹhẹ.”

12Di Idevidi ka aza anị ẹ̀ wụ̀ wa nị. Ịzẹyịza dị ẹ wụ̀ wa, dị ẹ dà wa ụvọ ọnịrị ahụ, di e zu ẹngụ ẹnịnị ana vọ gẹ ọchị hí ụtọ okuha Íhebirọnị nị. Dị ẹ sị ịrẹsụ Isibọsẹtị di e ne ne e tụ́ ini ikuta Abịna Ihebirọnị nị.

Currently Selected:

2 Ịsamụwẹrị 4: EBTP

Highlight

Copy

Compare