2 Ohinọyị 13
13
Ijehoyahazi ộ rị ohinọyị Ísirẹrị
1Ịnị ana tụ́ ọ ịrayị ohurẹẹta ọnị Ijowasi ozi Ahaziya sị rị ohinọyị Ijuda, Ijehoyahazi ozi Ijehu ộ rị ohinọyị Ísirẹrị. Ịsamarịya ọ ya mẹ ohinọyị ana ịrayị ẹwụrịhịmba nị. 2Ộ mẹ̀ ebira odivi hi Ẹnẹyịmavara anka Ijerobowami ozi Inebati, ohinọyị ana vịdị rị tụ ọ mẹ̀ mẹ. Ộ kụ Anisirẹrị nịnị mẹ ịvị. Ẹ yị va hụrẹ oze edivi anị. 3Avọọ, ộ mẹ̀ ka Ẹnẹyịmavara ọ̀ kụ ayị hi Anisirẹrị nịnị, dị ọ hụrẹ wa ụvọ yị Ihazayẹrị ohinọyị Isiriya ọnịrị ozi anị Ịbẹnịhadadị ụmẹ ọrụrụ-ọrụrụ nị. 4Ama Ijehoyahazi ộ mẹ̀ aduwa hi Ẹnẹyịmavara, dị Ẹnẹyịmavara tụ́ ọ ohi agụvị ka ô re ohinọyị Ísiriya mẹmẹ aa mẹ ehunaa yị Anisirẹrị nịnị. 5Ẹnẹyịmavara ộ sị ọdọzaha ọnya va yị Anisirẹrị nịnị ana va dọ wa ha hụụnị ụvọ Anisiriya nịnị. Dị Anisirẹrị nịnị vana ra eehi ẹnịnị ịnị ẹngwọọrọ anka ịyẹẹyẹ nị. 6Ama ẹnịnị ẹ yị và hụụnị ịvị ọnị ohinọyị Ijerobowami kụ́ Anisirẹrị nịnị mẹ. Ẹnịnị vị anaa yịị mẹ wa, dị ẹ navọ uyi ori ọnẹẹ ana aā hị́ Asẹra tụ Ịsamarịya nị. 7Ohomorihi ộ mẹ̀ ka à sị Ihazayẹrị vọ isoja tịtẹ yị Ijehoyahazi, ẹ̀ yị vị aza ẹnị ẹvarẹwụ anaā sịị umaataa kụ̀ ịrẹkụ, aza ẹnị ẹẹwụ anaā tụra ịkẹkẹ ịrẹkụ, ọnịrị aza ẹnị akawụ-akawụ oze ẹẹhị anaā sịị ahụụ nọ ịrẹkụ. Ohinọyị Ísiriya o reè vu avaba ẹnị ana vọ ẹtẹ, dị ọ sị ahụ pịrị wa va hi ẹtẹ anka ezi avọọ nị. 8Â chẹrẹ avaba ịsa ana vọ ọnị Ijehoyazi mẹ ọnịrị ịsa ọnị ọ sị ọtụtụrụma mẹ hi ini iwe ịtọpa ohinọyị Anisirẹrị nịnị. 9Ijehoyahazi ô sú, di e ne e Ị́samarịya nị, dị ozi anị Ijowasi rị ohinọyị dọ ọ ịrẹsụ nị.
Ijehoyasi ohinọyị Isirẹrị
10Ịnị ana tụ ọ ịrayị ohurẹẹwụ tụra ịhịmba ọnị Ijowasi rị ohinọyị Íjuda, Ijehoyasi ozi Ijehoyahazi ọ́ rị ohinọyị Ísirẹrị. Ịsamarịya ọ yà mẹ ohinọyị anị ịrayị ẹwụrịhịnọnyị nị. 11Ọnị ộ rẹ mẹ ịvị hi Ẹnẹyịmavara. Ộ saasa ebira edivi ohinọyị Ijerobowami ana kụ Anisirẹrị nịnị na mẹ ịvị. 12Â chẹrẹ avaba ịsa ana vọ ọnị Ijehoyasi mẹ, ọnịrị ọ́ mẹmẹ sị ọtụtụrụma pe Amaziya, ohinọyị Íjuda kụ̀ ịrẹkụ hi ini iwe ịtọpa ohinọyị Anisirẹrị nịnị. 13Ijehoyasi ô sú, di e ne e tu ịzị eē ne ohinọyị nịnị hi Ị́samarịya, dị ozi anị Ijerobowami ọhụva, rị ohinọyị dọ ọ ịrẹsụ nị.
Isu Erisa
14 #
2 Ohi 2.12
Ụmẹ ọnya dị ohinọyị Ijowasi ve su, ẹngụ aa zị Erisa ana vị ọnịsẹ. Ẹngụ isu aa zị ọ nị. Ijowasi ohinọyị Ísirẹrị ô ne hee eyi, dị ọ jẹẹ akaha anị, dị aa jị òrèrè ka, “Tee! ẹwụ ada ayị! Sị aza anaā sịị ịkẹkẹ ọnịrị aza anaā sịị umaata kụ̀ ịrẹkụụ yị Ísirẹrị va zụụ mẹ ịrẹma awụ kẹ?” 15Erisa ộ kà a yọ ka, “Sị ọkịta awụ ọnịrị ọpa”. Ịzẹyịza dị ọ sị ọkịta anị ọnịrị ọpa anị nị. 16Ộ kà a yị ohinọyị Isirẹrị ka ọ̀ kụ́ ọkịta anị, ịzẹyịza, dị ọ kụ́ ọ nị. Erisa ộ sị ụvọ anị tụra ụvọ ohinọyị Ísirẹrị. 17Dị ọ kà a yọ ka, “Na ozokete ana và eyi ka ẹtẹ Isiriya,” ịzẹyịza, dị ọ na a nị. Dị Erisa ka, “Ne ọpa awụ,” dị o ne e nị. Ọ sị ọ ne, dị Erisa ka ọpa ọnọnị ộ sị zụ ka Ẹnẹyịmavara vaa sị wụ nyịị ẹbẹẹba Anisiriya nịnị. Ụ vaa pe Anisiriya nịnịị kụ̀ ịrẹkụ ịzị aā hị́ Ahwẹkị na ngụ ịjị wèe ree vu wa ẹtẹ nịnị saka-saka. 18Di Erisa kà a yị ohinọyị Ísirẹrị ka ọ̀ kụ ọpa anị ana vọ dị ọ sị nya ẹtẹ nị. Ộ sị nya ẹtẹ ụpẹ ẹẹta, dị ọ jẹẹ nị. 19Ịrẹyị ọnọnị ọ raà kụ Erisa ayị, dị ọ kà a yị ohinọyị Ísirẹrị ka: Ẹ̀hụ ụpẹ ẹẹhị à vị ịhịnọnyị avọọ ụ yaanị sị nya ẹtẹ, dị ụ yaanị nyị ẹbẹẹba Anisiriya nịnị saka-saka nị. Ama booro aanị, ụpẹ ẹẹta kẹnẹ ụ vaa nyị ẹbẹẹba ẹnịnị wàa nọ ịrẹkụ nịnị nị. 20Erisa ô su, di e ne e nị. Â nyị Animowabi nịnị anaā vẹ vaa zama Anisirẹrị nịnị ịrayị-ịrayị. 21Ẹkụhị ọnya, â nyị Anisirẹrị nịnị enee ne oku, dị e vene re ka Animowabi nịnị aa vẹ nị. Anisirẹrị ẹnẹnị ệ ne oku ọnọọ na ngụ ịnị ụsị ene e ne Erisa tụ́, dị ẹnịnị kụ ahụ kụ echi nị. Oku ọnọnị mẹ̀ yị sị ẹngụ kanyị ẹchụkụ Erisa kẹnẹ dị oku ọnọọ ha vavẹ, dị ọ kwẹẹtẹ jẹẹ nị.
Anisirẹrị nịnị ọnịrị Anisiriya nịnị ệ kụ̀ ịrẹkụ
22Ihazayẹrị ohinọyị Isiriya vị ana sị ụya rị Isirẹrị nịnị pooro ịnị avaba ụmẹ ọnị Ijehoyahazi sị vị ohinọyị Ísirẹrị. 23Ẹnẹyịmavara ộ vayị ẹnịnị, dị ọ mẹ ọyịza yị wa nị. Ẹ yị zẹẹ ka è vu wa ẹtẹ; ama ộ mẹ̀ ọgụvọ yị wa agụvị oto oni o wo yị Abụrahamị, Ayiziiki, ọnịrị Ijekọvụ. Ẹnẹyịmavara e yi hi ayị aza anị. 24Ịjị Ihazayẹrị ohinọyị Ísiriya wusu, di ozi anị Ịbẹnịhadadị rị ohinọyị dọ ọ ịrẹsụ nị. 25Ijehoyasi ohinọyị Ísirẹrị ộ nọ ịrẹkụ Ịbẹnịhadadị ụpẹ ẹẹta dị ọ nyị ẹbẹẹba anị nị. Ộ dọ ọ avaba ẹkụra ọnị Ịbẹnịhadadị vịdị dọ ịnị ụmẹ Ijehoyahazi, ada Ijehoyasi nị.
Currently Selected:
2 Ohinọyị 13: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
