2 Ịjọọnụ 1
1
Ụkụ
1Ẹmị ana vị ọzọkụ ịragụ Ohomorihi aa chẹrẹ iwe ọnọnịị tụ́ụ hi wu, onyeyiza ayị ọnị Ohomorihi nyị ọnịrị ezi anị. Mée sì ịrẹyị awụ nịnị ẹtẹẹtẹrẹ. Ẹ yị vị ẹmị ịnya kẹnẹ o sì ịrẹyị awụ nịnị, ama avaba aza ana sị ịzẹyịza dọ. 2Agụvị ka ịzẹyịza ọnọọ yà ịnị ayị ayị, vị ọ rẹ vaa yà ịnị ayị ayị pooro nị. 3Ohomorihi Ada ayị ọnịrị Ozi anị Ijeesu Ikirisiti ẹ̀ mẹ ọyịza yị yị, dị ẹ̀ rẹ sị ẹngwọọrọ yị yị. Ọ vaa sịị yị ị màa saasa ịzẹyịza anị, di i ree sì ịrẹyị ẹngụ.
À vẹ yee sì ịrẹyị ẹngụ
4Ịnẹ amị ô hine ẹtẹẹtẹrẹ m mè re ka ezi ewu ẹnyị aa mẹ ịzẹyịza anka Óhomorihi Ada ayị mẹ̀ mẹẹ ọdaa yị. 5#Ịjọ 13.34; 15.12,17Onyeyiza amị, aarịhịnị maa dá ịpẹẹ wụ; ẹ́ yị vị ka m maa chẹrẹ ọda ọwọọwa tụ́ụ hi wu nị. Ọda ọnị ị vịdị sị wụ́ hụrị ụmọrụmọ yịị yọ nị, ka ye sì ịrẹyị ẹngụ. 6Yèe sì ịrẹyị Ohomorihi, ị rẹ vaa saasa ọda anị. Ọda anị ọnọọ ọnị ụ vịdị sị wụ nịnị hụrị ụmọrụmọ ọ vị ka yee sì ịrẹyị ọza nị.
À vẹ yaa mẹ ịzẹyịza
7M maanị aa kà a agụvị ka enevene nịnị ẹ sị gara hi ẹhẹ. Ẹnịnị ẹ yị dọ ka Ijeesu ộ vẹ ẹhẹ anka ọza. Ẹngụ aza ẹnẹẹ vị enevene, ọnịvị Ikirisiti ẹ rẹ vị nị. 8Sị eyi pe ẹngụ awụ nịnị agụvị asị ụkọrọ awụ nịnị na vị osusu, ama dị ụ wa zụ rị ọgụ ụkọrọ awụ nịnị gụ. 9Ọza ẹnẹ ẹ̀ yị jẹẹ pe ịrẹyị ọnị Ikirisiti sị zụ̀ yị, ama di ee benee hi ọ nị, ọ yị yẹ Ohomorihi. Ama ọza ana àa jẹẹ pe ịrẹyị ọnị Ikirisiti sị zụ̀ yị, ọza ọnọọ ọ́ọ yẹ Ohomorihi Ada ayị ọnịrị Ozi Ohomorihi nị. 10Àa nyị ọza ana vẹ ini eehi awụ nịnị, dị ẹ̀ yị vị ịrẹyị ọnị Ijeesu sị zụ̀ yị ọ za vẹ nị, asị ụ dọ ọ tụ́ ini eehi awụ nịnị, asị ụ hyakụ kụ́ ọ nịnị vụrụ-vụrụ. 11Mị vavọọ aa kà a agụvị ka ọza ana àa kụ́ ọ, ọ sị bẹ tụ́ ịnị ụkọrọ odivi anị.
Ịrẹyị ọdịrẹma
12Máa nyị ịrẹyị ọrụrụ-ọrụrụ oni mi sì ka ma ka ma kà yị wụ, ama me yi sì ka ma chẹrẹ wa tụ́ hi wu. Mée ro ka mee vee hee wu, di ye dudu kà ịrẹyị eyi gẹrị eyi, dị ayị ayị ò zụ hine ẹtẹẹtẹrẹ. 13Ezi onyeyiza awụ ọnị Ohomorihi nyị, ene hi ịzẹnị, ka ẹnị kụ́ wụ.
Currently Selected:
2 Ịjọọnụ 1: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
