2 Anịkọrịntị 12

Ẹtẹ ọbanyị ọnị Ịpọọrụ re

1Mâ yẹ ka ẹ yị nyị ịsị ẹ yà ini oto ò yi wo, ama â nyị ka me yii wo o. Maa kà ịrẹyị ẹtẹ oni mi re ọnịrị Ánanyị yị mẹmẹ sị ẹngụ zụ̀ mị. 2Mâ yẹ ọnọrụ ọnya aanị ọnị ọnịrị Ohinọyị oni Ohomorihi nyị ka ọ̀ dọ yị há sị vị ọnya. Ịnị ịrayị ẹwụrẹna ana parahu, a sị sị ọọ nọ ẹbẹẹba keekere nị. À vị ọnị nyẹmba a sị nọ ẹbẹẹba nị oo, à vị ọ re ẹtẹ kẹnẹ nị oo, mẹ yị yẹ. Ohomorihi ọnịnya kẹnẹ ọ yẹ nị. 3Ama mâ yẹ ka aa sị ọnọrụ ọnọọ nọ Aha ọyịza. Mị rẹ ka, à vị ọnị nyẹmba ọ na nị oo, à vị o re ẹtẹ nị oo, mẹ yị yẹ; Ohomorihi kẹnẹ ọ yẹ nị. 4Ịzọọ ộ wụ́ ịrẹyị ọnị ọza ẹ̀ yị zụ kà. Ọza ọ yị hyakụ nyayịnẹ sị irenu kà ịrẹyị ọnọọ. 5Ọza ọnọọ m mee sii wo oto nị, mẹ yị vaa sị ẹngụ amịị wo oto. Ahịmị kẹnẹ mi zụ si wo oto nị. 6Màa daka ka mee wo oto, mẹ yị vaa mẹ ụra, agụvị ka ịzẹyịza mị vaa kà nị. Me yi sì ka ọza òo si eyii re mị huna ọpa ịsa oni o re ịnị ẹngụ amị ọnịrị ịsị ọnị ọ wụ́ ka maa kà. 7Agụvị asị ẹtẹ ọbanyị oni mi re avọọ na mẹ ka maa sị ẹngụụ tụ́ ẹba baaba, Ohomorihi ộ navọ ka ma nyị ẹngụkata tụ́ ọchẹngụ amị anka ikeyi avọọ. Ọnị ọ vị ọnụtụ Echu ene ee tụ́ mi ka asị mị sị ẹngụ tụ́ ẹba baaba nị. 8Mâ hụ agụvị avọọ dá ịpẹ yị Ananyị yị tù ịpẹ ẹẹta ka ọ̀ sị ịsa ọnọọ kwooze mi. 9Ama dị o tụ́ mi ohi ka: Ẹyịza ọọhẹ anị ộ hụ mị nị. Ọ kà, ịnị ahịmị ọza, aza vaa yaa re ụkata ọbanyị anị ẹtẹẹtẹrẹ nị. Agụvị avọọ maa jẹ ka maa sị ahịmị amịị wo oto. Ọnọọ vaa mẹ ka ụkata oni Ohomorihi nyị ka ọ̀ dọ yị há ọ̀ yàrị ẹmị. 10Agụvị avọọ ahịmị amị, ụhụ ana aa kụ̀ mị, ọnịrị ẹngụkata beri ụya ana aa sịị rị mị, ọnịrị ezigi agụvị Ikirisiti, ee hine mi. Agụvị ka ịjị màa vị ọkụmị, ịjọnọọ mị sẹsẹ vaa nyị ụkata nị.

Ịrẹyị Anịkọrịntị yà ịnị ayị Ịpọọrụ

11Maa kà ịrẹyị anka ọnụra avọọ, ama ẹwụ nịnị ọ mẹ ka ma maanị wo oto, di maa ga ẹngụ amị nị. Ẹwụ nịnị a vọrọ ka ọ̀ọ ga ẹmị nị, ẹ̀ yị daka nyị ịsị mị vị, aza ọnị ụ sị mẹ ọga ezirẹma Ijeesu nịnị avọọ, e yi huna mị ini oze ọnyọọnyị. 12Ịsa ana sị zụ̀ ka ezirẹma Ijeesu obooro mị vị nị vị ọnị maa sị isuuru mẹ ịnị akakana awụ nịnị: ụkọrọ ohyozirenu ọnịrị apọtẹrẹwa irenyi-irenyi ệ mẹ. 13Ye re ebira ana a mẹ hi wu nịnị ana sị zụ̀ ka anịragụ Ohomorihi ana vọ ê huna wụ nịnị? Mâ yẹ kẹnẹ ka mẹ yị vị ẹnya tụra awụ nịnị. Àa vị ịnị ọnọọ yọ, aarịhịnị, vagu mi nịnị kẹ! 14Ụpẹ ọhụta oni mee vee hee wu nịnị yị. Mẹ yị yị vaa vị ẹnyaa tụra wụ nịnị. Ẹwụ nịnị ụvọta mi sì nị, ẹ yị vị ịsa awụ nịnị. Àa ka à na kà, ozi ọ mā tẹ aza ana ma ụkadara, aza ana ma ozi ẹẹ̄ tẹ ozi ụkadara nị. 15Ayị amị vee hine ka ma hụrị ụvọ avaba ịsị mi nyị neberi ẹngụ amị bẹẹ, dị ma sị gụ wụ nịnị ụvọ. Áá vị agụvị ka mee sì ịrẹyị awụ nịnịị hu avọọ, ụ wẹ̀ yị kụkụ zẹẹ sì ịrẹyị amị nịnịị? 16Ama wa sị yẹ nịnị ka mẹ yị vị ẹnya tụra wụ nịnị. Aza ẹnyị ẹ zụ aa yịị kà a ka m maa mẹ̀ apẹ, di mee sì ka ma sị ọbọ vene wu nịnị za nị. 17Mị ka ịnị avaba aza ọnị mị tụ́ hi wu nịnị, áá daka nyị ịzị mị yà mẹ wụ nịnị rị? 18Mâ dá ịpẹ yị Ịtayịtọsị, dị mị rẹ tụ́ anda ayị ọnya saasa a nị. Wáá zụ kà a ka Ịtayịtọsị ộ mẹ̀ wụ nịnị rị? Aanị ka ẹ yị vị ebira ọnya ẹmịrị ọ aa mẹ, dị ị raa sị ahụ ọnyọọnyaa hi ẹtẹ? 19Vi u wéé ro nịnị ka i yee sì ka ya dọ ẹngụ ayị tụ́ ịnị ụvọ awụ nịnị nị? Vụrụ-vụrụ. Yâ jẹẹ ọvịdị Ohomorihi aa kà ịrẹyị anka ọza ọnị ọnịrị Ikirisiti sị vị ọnya. Ẹwụ nịnị ẹyịnyara amị, avaba ịsị ị yaa mẹ vị ọnị yaa mẹ ka ya sị gụ wụ nịnị ụvọ. 20Mee roo ka ẹyịyara, mèe tù ịdị awụ nịnị, wẹ yị vaa yà, anka m mè sì ka wa yà nịnị. Ẹmị ẹ yị rẹ vaa yà anka u mè sì ka ma yà nịnị. Asị a hyakụ na nyị ịrazị ọnịrị ụhị ọyịkụ ne beri ọyịkụ! Asị a rẹ na nyị ebira ọza eneē sì ẹngụ anị kẹnẹ, ọnịrị aza eneē du ọza ịrẹsụ, ọnịrị ọza anaā kụ́ ịrẹka, ne beri ọza anaā mẹ eyi, ọnịrị ọza anaā mẹ̀ ebira jugu-jugu. 21Ọ́ maa navọ, màa na vẹ ịhị ọsa, asị Ohomorihi amị na kà mi chi ini eyi awụ nịnị. Dị maa jị òrèrè agụvị aza ọrụrụ-ọrụrụ ana vịdị mẹ ịvị dị è yi ro ịnẹ varẹma hụụnị ebira ịdọtị ẹnịnị ọnịrị ịrẹkọyịsẹ beri ebira kẹnẹ-kẹnẹ ẹnịnị.

Currently Selected:

2 Anịkọrịntị 12: EBTP

Highlight

Copy

Compare