2 Anịkọrịntị 10

Ịpọọrụ ọ́ọ và ịrẹyị anaa kà yọ

1Ẹmị Ịpọọrụ, mâ sị ịrẹswọkahi ọnịrị ebira hẹẹ Ikirisiti dá ịpẹ wụ nịnị. Aza ẹnyị aa kà a ka màa yà ịdị awụ nịnị, ma mā nyayịnẹ kà ịrẹyị; ama màa va sị hụụ ịdị awụ nịnị, dị maa kà ọnọrụ. 2Aarịhịnị, asị ụ mẹ̀ mị nịnị ka ma vị́ ayị tụ́ wu nịnị, màa vẹ ịdị awụ nịnị! Mâ yẹ ka ayị amị ọ zụ vị́ tù aza ana aa kà a ka ụsẹ ẹhẹ kẹnẹ aa za yịị zị nị. 3Ịzẹyịza ịnị ẹhẹ ị yà nị, ama yẹ yị vụ̀ ịrẹvụ ịsa ẹhẹ ọnọnị. 4Ẹnya ịrẹkụ ọnị yaa sịị kụ̀ ịrẹkụ, ọyị rẹ vị ẹnya ịrẹkụ ẹhẹ ọnọnị. Ẹnya ịrẹkụ oni Ohomorihi mẹ ka ẹ̀ nyị ụkata ẹ vị nị. Ọnị ị yaa sịị gara ịzị ọza ọ̀ yị zụ hụra tù nị. 5Yaa gara avaba ahankata ireche ha. Ịsị ẹẹ̄ sị ẹngụụ tụ́ ẹba ẹnẹ ẹ̀yị mā zẹẹ ka aza ẹ̀ yẹ Ohomorihi vị ọnị ị raa garaa ha. Ị raa za ariro aza ka ẹ̀ẹ wụ́ụ chire Ikirisiti. 6Ẹwụ nịnị ọ̀ọ raà sị avaba ẹngụ awụ nịnị yị Ohomorihi saka-saka, avaba aza ana àa kụkụ aa mẹ akamawụụ hi Ohomorihi, dị ị sị ụya rị wa. 7Wáá yẹ nịnị ka ịzẹyịza ọ yị kà a ka asị ọza kà ọnị? Àa nyị aza ana dọ ka hịịn Óohinọyị oni Ohomorihi nyị ka ọ̀ dọ yị há ẹnị vị nị, aza ẹnẹẹ ẹ̀ tamayị ka, ẹnị mẹ̀ vị Óohinọyị oni Ohomorihi nyị ka ọ̀ dọ yị há avọọ, avọọ ẹyị mẹ̀ rẹ vị aanị nị. 8Màa daka raà sị ụkata ana Ananyị yị sị yị wo oto baaba, ụhị ọ yị hụ ụvị avọọ nyị yị. Vị Ananyị yị sị ụkata yị ka ya sị gụ wụ nịnị ụvọ nị, ọ yị kà a ka ya sị gụ wụ nịnị hyẹdụ. 9Me yi sì ka ma mẹ, anka m mèe rere aa sị iwe chire wu nịnị angwa avọọ. 10Aza ẹnyị aa kà a ka ịrẹyị ini iwe Ịpọọrụ ộ katẹngụ, o zụ henyi ọza. Ama ọnị ụvọta ọ̀ọ va sị ngụ ịdị ayị dị ọ sị vara ọza gụyẹ-gụyẹ, dị ẹ yị nyị ịsị ịrẹyị anị vị. 11Ẹngụ aza ẹnẹẹ ẹ̀ yẹ ka ịsị ọnị chẹrẹ, ị yẹ̀ yị mẹ̀ yà ịdị awụ nịnị, yàa vẹ, ọnị ị rẹ vaa mẹ nị o. 12Yẹ yị vaa sị ẹngụ ayịị tụ́ ịnị aza anaā ga ẹngụ ẹnịnị, yẹ yị hyakụ sì ka ye pe wa mẹ ọpa. Aza ana aa sị ẹngụ ẹnẹnịị pe anda ẹnịnị mẹ ọpa vị ọnụra obooro! 13Ama ẹyị e yi vee wo oto huna ọ mẹ̀ vọrọ. Ẹhụ ịzị Ohomorihi ọ̀ọ sị yị, ị vaa jẹẹ nị; ộ mẹ̀ ka ya hyakụ tù ịdị awụ nịnị. 14Yâ kà enube ọyịza Ikirisiti pooro ve tù ịdị awụ nịnị. Agụvị avọọ yẹẹ̀ yị jịnẹ ẹhwị ẹtẹ ayị. 15Yẹ yị rị ụvọ wo oto na ngụ ịnị ụkọrọ ọnị ọza ẹnẹsa mẹ. Ama yaa tụra eyi ka ụ màa sị ayịị tụra Ijeesu nịnịị hu avọọ, dị ya zụụ mẹ ụkọrọọ hu avọọ ịnị akakana awụ nịnị pooro na ngụ ẹhwị ẹtẹ ayị. 16Dị ya zụ kà enube ọyịza ịnị ẹkụra ana yà akẹnẹ awụ nịnị. Ẹ yị nyị ka ya sị ụkọrọ ọnị ọza ẹnẹsa sị mẹ, di ye sii wo oto. 17#Ijer 9.24Ọza ana àa ka ọnị ee wo oto, ọ̀ọ sị Ananyị yịị wo oto. 18Ọza ana àa ga ẹngụ anị, ọza ọ mā kà ọdaa yọ, ẹ̀ yị vị ọza ọnị Ananyị yị ga.

Currently Selected:

2 Anịkọrịntị 10: EBTP

Highlight

Copy

Compare