2 Ịtọpa 8
8
Avaba ụkọrọ ọnị Isoromọnị mẹ̀
(1 Ohi 9.10-28)
1Ịrayị oohu Isoromọnị sị dà irehi Ẹnẹyịmavara ọnịrị irehi ohinọyị yị ẹngụ anị nị. 2Dị o tenyi avaba ẹkụra ọnị Ihurami sị yọ dà, dị ọ kụ́ Anisirẹrị nịnị ẹnyị na ra hi ẹkụra ẹnẹẹ nị. 3Ịrẹma anị, Isoromọnị kụ́ ịrẹkụ na dọ ẹtẹ Ihamati Izoba nị. 4Ô tenyi ẹkụra ana a hị́ Igadimo ana ya ịnị ụnọmị dà, dị ọ rẹ dà avaba ẹkụra anaa kụ́ ịsa tẹ̀ ene hi ịnị ẹtẹ Ihamati nị. 5Avọọ ọ mẹ rẹ dà Ịbẹtị-Ihoroni ẹbẹẹba ọnịrị ụvẹtẹ, dị ọ jị ọvọ kara wa, dị ọ mẹ̀ oze ọkatẹngụ ọnịrị ẹza anị chire e. 6Isoromọnị ô tenyi ẹkụra ana a hị́ Ịbaaratị ọnịrị avaba ẹkụra ana aa kụ́ ẹnya na tẹ̀ tụ́ ana vị anị. Ộ dà ẹkụra ọrụrụ-ọrụrụ ịzị ọ kụ́ ịkẹkẹ ịrẹkụ ọnịrị umaata ịrẹkụ anị hi. Avaba irehi ọnị ô mẹ̀ eto anị ka ọnị a dà tụ́ Ijerusarẹmị, Ịrẹbanọnị nị ọnịrị avaba ẹkụra ene hi ịnị ẹtẹ anị. 7Â nyị anẹkụra ẹnyị ọnị ịrẹkụ ẹ̀ yị rị ene hi ẹtẹ Ikenani. Anẹkụra ẹnẹẹ ẹ vị Anihiti, Anamọrị, Aniperizi, Anihivi ọnịrị Anijebusi. Ẹnịnị ẹ yị vị Anisirẹrị. 8Ezi anẹkụra ẹnẹnị vị anaa ra beri Anisirẹrị nịnị, ọza ẹ yị wụ́ wa ama Isoromọnị vị ana za wa ọrịhị ka ẹẹ mẹ̀ ụkọrọ ẹngụkata yị Anisirẹrị nịnị pooro ve tu ajịnị. 9Isoromọnị ộ yị za Anisirẹrị ọnyọọnyị ọrịhị ka ọ mẹ̀ ụkọrọ yị ọnị. Anisirẹrị ẹ vị isoja, ọnịrị ọga isoja ne beri ọdọvịdị aza anaa sị ịkẹkẹ ịrẹkụ ọnịrị umaata kụ́ ịrẹkụ nị. 10Aza ẹnịnị ana vị ọdọvịdị ene si eyi pè anụkọrọ yị Isoromọnị aanị vị aza ịrẹka tụra ẹvarẹwụ. 11Isoromọnị ộ sị ose anị ana vị ozi ohinọyị Ijipiti hụrẹ Ijerusarẹmị ana vị ẹkụra Idevidi na tụ́ irehi ọwọọwa ọnị ộ dà yọ. Ộ kà a enyisi ọ vị nị ka ọnẹẹ ọnọọ ọ ra ịnị ẹkụra ana a sị apoti oto Ẹnẹyịmavara tụ. 12Isoromọnị ộ mẹ̀ ịsọvọ ọrụrụ-ọrụrụ ọnị ọ rị ịra ịrẹsụ ụta yị Ẹnẹyịmavara ọvịdị irehi Ohomorihi. 13#Ịrị 28.9,10; Ịrị 28.11-15; Kụra 23.14-17; 34.22,23; Ịrị 28.16—29.39; Ọda 16.16Ộ mẹ̀ ịsọvọ ana a rị ịra irenyi-irenyi anka ọda Imosiisi mẹ ka a ịnị oze ịsọvọ Ẹnẹyịmavara ịnị eyinị-eyinị, ẹkụhị ụhwọtụ, eche ụhwẹ ọwọọwa ọnịrị eche asụsụ ịrayị ẹyịta. Eche asụsụ ịrayị ẹyịta ẹnẹẹ ẹ vị eche ịbụrẹdị ẹnẹ ẹ yị nyị owu ọnịrị eche ịsa ọyịna ne beri eche ajẹngụ. 14Idevidi ada Isoromọnị ộ saasa ọda ọnị ada anị Idevidi vịdị mẹ̀ tịtẹ ka aa sịị mẹ̀ ụkọrọ ịnị irehi Ohomorihi. Ohirẹsụ irehi Ohomorihi vị ọnị ọ́ nyị ka ẹẹ mẹ̀ ụkọrọ ịnị irehi Ohomorihi, dị Anireevi nịnị ẹẹ̄ gụ wa ụvọ dị ẹẹ̄ jị ahẹ. Dị ộ ga ụkọrọ yị oserẹtẹ nịnị eneē sere oze ọnyọọnya eyinị-eyinị. Avọọ Idevidi ọza Ohomorihi mẹ mẹ̀ ọda yị wa nị. 15Avaba Anisirẹrị nịnị vị ana nyayịnẹ sị ahụ ku ọda ọnị Idevidi mẹ̀ tịtẹ yị ohirẹsụ irehi Ohomorihi nịnị ọnịrị Anireevi nịnị ịnị oze ọnyọọnyị ọnịrị aha anaā sịị ịsa tẹ̀. 16Aanị Isoromọnị mẹ mẹ̀ avaba ụkọrọ irehi Ohomorihi hụụnị ụmẹ ana a ka irehi ẹtẹ na ngụ ụmẹ ana a dà a ta nị. 17Ịjị irehi ta a dà, dị Isoromọnị nọ Eziyọnị-Igeberi ọnịrị Erati ana ya utenyi Edomi. 18Dị Ihurami tụ́ ọdọvịdị anị nịnị ọnịrị aza ana yara họ̀ ẹpa ka ẹ̀ kụ́ ẹpa naa yọ nị. Dị aza ẹnẹẹ ẹnịrị aza Imosiisi sị ẹpa ẹnẹẹ na Ohwiri ịzị ẹ̀ kụ́ Igooru ẹhụ ikirogirami akawụ-akawụ oze ịhịmba tụra akahị (15,000) va yị Isoromọnị ohinọyị.
Currently Selected:
2 Ịtọpa 8: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
