2 Ịtọpa 31
31
Ihezekaya ộ va ahẹkẹ Aniju nịnị vẹ
Aza â gara irehi ori nini ha
(2 Ohi 18.4)
1Ịrẹma ọnị eche ọyịparahu ọnọọ ta wa rị, dị avaba Isirẹrị ana nọ Ijerusarẹmị kụ́ ẹngụ aa ngụ ẹkụra-ẹkụra ene hi ẹtẹ Ijuda, Ịbẹnjamịnị, Ehwireemi ọnịrị Ịmanasẹ nị. Ịzị èe tu dị ẹ́ gara ịrẹta ori ana a kụ́ gụ, di é che avaba ọchị ana a bẹ jẹẹ yị ori ọnẹẹ ana aā hị́ Asẹra, dị ẹ́ chata ụta ịsọvọ, di é wú avaba irehi ori ẹnịnị ha. Ịjị ẹ sị mẹ̀ ta, dị ọzọza va nọ eehi anị nị.
Ịsọvọ yị Ohirẹsụ irehi Ohomorihi ọnịrị Anireevi nịnị
2Ohinọyị Ihezekaya ô tenyi ohirẹsụ irehi Ohomorihi ọnịrị Ireevi nịnị ga hi ogwoogu, dị ộ ga ụkọrọ yị ogu ọzọza ana aa mẹ̀ nị. Ẹ yaa mẹ̀ ịsọvọ ọyịrịịra, dị ẹ yaa mẹ̀ ịsọvọ ayohine, dị ẹ rẹẹ̀ nyị tụ́ ịnị ụkọrọ ahẹkẹ nị. Ẹ yaa kụ́ avọ, dị ẹ yaa jị ahẹ ga Ẹnẹyịmavara ịnị irehi anị nị. 3#Ịrị 28.1—29.39Ộ nyị ịnị ịsụpa anị ọnị ọ ka aa sị mẹ̀ ịsọvọ ọyịrịịra ẹnẹnẹ ọnịrị oruva, ịsa ịsọvọ ẹkụhị ụhwọtụ, eche ụhwẹ ọwọọwa ọnịrị eche irenyi-irenyi ana vọ ọnị Ẹnẹyịmavara mẹ̀ ọda anị yị wa. 4#Ịrị 18.12,13,21Ihezekaya ộ kà yị ẹnyị ene hi Ijerusarẹmị ka ẹnịnị ẹ sị ịsa ana vị ohirẹsụ irehi Ohomorihi ọnịrị Anireevi nịnị yị wa agụvị ẹnịnị ẹ nyị ụmẹ sị ịrẹyị ọda Ẹnẹyịmavara zụ aza. 5Obobooro ana a mẹ̀ ọda ọnọnị, ọzọza nyima aa kụ́ ẹyịza hụụnị ịsa ịnị aarẹ ẹnịnị vẹ ịnị irehi Ohomorihi nị. Ệ sị akụ ene zoza, eche, angwẹ orivi, ẹhụ ọnịrị ịsa ịnị aarẹ ẹnịnị ana vọ vẹ. 6Avaba aza ana ra ịnị ẹkụra ene hi Ijuda ệ sị agẹẹwụ imaaru ọnịrị atẹmẹ ẹnịnị vẹ. Ệ rẹ kụ́ ịsa ọrụrụ ẹnẹ ẹ sị yị Ẹnẹyịmavara, Ohomorihi vẹ ịnị irehi anị. 7Ẹyịza vi ene nyima aa ngụ irehi Ohomorihi ịnị ụhwẹ ọhụta dị ọ vavọọ vẹ tụra ẹngụ tụra ẹngụ ụhwẹ ẹẹna nị. 8Ohinọyị Ihezekaya ọnịrị ọdọvịdị anị nịnị mẹ maanị ịsa ana a kụ́ vẹ, dị ệ ga Ẹnẹyịmavara ọnịrị aza ana kụ́ ọ vẹ nị. 9Dị ohinọyị ka ịrẹyị ịsa ẹnẹẹ yị ohirẹsụ irehi Ohomorihi ọnịrị Anireevi nịnị nị. 10Azariya ana vị ohirẹsụ ọbanyị irehi Ohomorihi ohirẹsụ ana vị ozi Ịzadọkị kà a yị ohinọyị ka hụrẹ ụmẹ ọnị aza aa kụ́ ịsa vẹ ịsọyịrị vị ana gwẹẹtẹ dị ọ vọ ẹtẹ. Ộ maanị zee yị ẹnị agụvị ka Ẹnẹyịmavara ộ mẹ̀ ka o zee yị aza anị. 11Dị ohinọyị mẹ ọda ka a dà aku rụrụ ana a kụ́ ịsa gụrị irehi Ohomorihi. 12Dị aa kụ́ avaba ẹyịza ọnịrị agẹẹwụ tụ́ ịnị ẹnịnị. Dị a sị Anireevi ana a hị́ Ikonanịya ka o sị eyi pe e dị ọhụva anị ọọ gụ ọ ụvọ. 13Dị ohinọyị kụ́ Anireevi ẹẹwụ yị wa ka ẹ beri waa mẹ̀ ụkọrọ. Aza ẹnịnị ẹ vị Ijehịrẹrị, Azaziya, Inahati, Asahẹrị Ijerimoti, Ijozabadi, Eriyẹrị, Isimakaya, Imahati ọnịrị Ịbẹnaya, ohinọyị Ihezekaya ọnịrị Azariya ohirẹsụ ọbanyị irehi Ohomorihi ohirẹsụ e si eyi pe avaba ụkọrọ ẹnẹnị nị. 14Ikore ozi Imina ọ vị Anireevi ana vị ọga aza ene sere oze ovwoovu irehi Ohomorihi ana ya eyi ịzị ọyị hụrẹ vẹ nị. Ọnị aa dọ avaba ẹyịza ana kụ́ va yị Ẹnẹyịmavara dị ọ rẹ ga yị aza nị. 15Anireevi ana sị ụvọ pe ụkọrọ ọnọnị yọ ịnị ẹkụra ana vọ ọnị ohirẹsụ Irehi Ohomorihi nịnị ra hi ẹ vị: Edẹnị, Iminiyamini, Ijesuwa Ịsẹmaya, Amarịya, ọnịrị Isekaniya. Aza ẹnịnị ê beri ọ ga ịsọyịrị ẹbẹẹbẹ yị anda ẹnịnị, Anireevi ịnị ụmẹ ụkọrọ ọzọza. 16Ẹnịnị ệ ga ụkọrọ yị ezi anọrụ ana vị ẹhụ ịrayị ohurẹẹwụ da va hịrẹ ana nyị ụkọrọ ana a mẹ ịnị Irehi Ohomorihi eyinị-eyinị anka udi ọzọza. 17Ẹnị ohirẹsụ irehi Ohomorihi vị ana a gà ụkọrọ ẹnịnịị yị. Ovwoovu-ovwoovu a gà ụkọrọ ẹnịnị yị wa nị. Anireevi nịnị ana vị ịrayị oohu daa va hịrẹ vị ana a gà ụkọrọ ogu-ogu. 18Avaba ẹnịnị vị ana a chẹrẹ vaka ose ẹnịnị, ezi, ọnịrị aza ana vọ ene e ku pe ẹngụ, ka ụmẹ ọnyọọnyị a zụ sị hị́ wa ka ẹ̀ va mẹ̀ ụkọrọ oni Ohomorihi sị yị wa nị. 19Â nyị ẹnị ohirẹsụ irehi Ohomorihi ana ra hi ịzị a dà tịtẹ yị evere Eerọnị, dị a nyị ẹnị ana ra hi ịzị aa kụ ịsụpa rị ana a sị vaka ẹtẹ ẹnịnị yị wa nị. Ịnị ẹngụ ẹnịnị, â nyị aza ana a nyị ka ẹẹ gà ịsọyịrị yị avaba anọrụ ini ovwoovu ohirẹsụ irehi Ohomorihi nịnị, dị ẹ̀ rẹẹ sị ịsọyịrịị yị avaba ẹnị ana a chẹrẹ ịrẹha ẹnịnị tụ ezi Ireevi nịnị. 20Ịnị avaba ẹtẹ Ijuda, ohinọyị Ihezekaya ộ mẹ̀ ịsa ana vọrọ, di o hine Ẹnẹyịmavara, Ohomorihi anị. 21Ô zee yị Ihezekaya ẹtẹẹtẹrẹ, agụvị ka avaba ịsa ọnị ọ mẹ yị Irehi Ohomorihi, ọnịrị ọ́ mẹmẹ saasa ọda Ohomorihi, vị ọnị ọ́ mẹ agụvị ka ộ sị ayị yị Ohomorihi anị ọnịnya, dị ọ kụ́ ẹngụ hi ịrẹyị anị nị.
Currently Selected:
2 Ịtọpa 31: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
