2 Ịtọpa 26
26
Uzaya ộ vị ohinọyị Ijuda
(2 Ohi 14.21,22; 15.1-7)
1Amaziya me wusu kwooze, avaba Anijuda nini si Uzaya ozi anị rị ohinọyị tụ́ udi ada anị. Ụmẹ ọnọọ Uzaya vị ịrayị ẹwụrịhịnọnyị. 2Ọnị ọ dọ ẹkụra ana a hị́ Erati, di o tenyi ọ dà ịrẹma ada anị su nị. 3Ịrayị ẹwụrịhịnọnyị kẹnẹ ọ vị dị a sị ọ rị ohinọyị ọnị ọ mẹ ịrayị ẹvarẹwụ tụra ẹẹva Ijerusarẹmị nị. Ịrẹha ọnyị anị ọ rị Ijekoriya. Anijerusarẹmị ọ vị nị. 4Uzaya ộ hama ada anị mẹ̀ ebira ozoza ana ngụ Ẹnẹyịmavara eyi. 5Ịzakaraya ọ vị anajuwe anị nị. Pooro di o ve su, Uzaya vị ana sị ịzẹyịza hẹkẹ Ẹnẹyịmavara. Ẹnẹyịmavara ộ mẹ̀ ka o zee yọ ịnị ụmẹ ọnọọ nị. 6Uzaya ộ nọ ịrẹkụ Anihwirisiti nịnị, dị ọ wú avaba ẹkụra ene hi ẹtẹ Igati, Ijamina, ọnịrị Asidodi. Dị ọ varẹma dà ẹkụra ọnị ọ jị ọvọ kara hi ọ gụrị Asidodi ọnịrị ẹtẹ Anihwirisiti ana vọ nị. 7Ohomorihi ộ gụ ọ ụvọ dị ọ huna Anihwirisiti, ọnịrị Anarabi ana ra Iguri-Ịbaarị ne beri Animewu eyi ịrẹkụ nị. 8Anamọnị nịnị ệ kụ́ ẹkẹhị irehi ẹnịnị va yị Uzaya, dị ọ vana nyị ụkata huu avọọ, dị ọ ngụrẹyị huu na ngụ ẹtẹ Anijipiti nị. 9Uzaya ộ vana dà irehi ọgọdọ-ọgọdọ tụ́ oze ọbanyị ana ngụ ẹkụra Ijerusarẹmị ana a hi oze ojesi, oze inozi ọnịrị ịzị ọvọ ya jesi. 10Ộ rẹ dà irehi ọyịtẹ̀ ọgọdọ tụ́ ịnị akakana ẹkụra, dị ọ chị iruku enyi ọrụrụ-ọrụrụ hi ẹtẹ agụvị ka ộ nyị ụnọ ana dẹngụ tụ́ iruvo ataba ene hi eyi ụvẹtẹ ọnịrị inozi. Ka ô sì ịrẹyị aarẹ, dị ọ tụ́ aza ọtụtụrụma ka ẹ dà ụbazị ịvayịnị rụrụ tụ́ ịnị ataba, dị ẹ kụ́ ịrẹkụ tụ́ ini ẹtẹ ene zoza, dị ọ dọ aza ka ẹ kụ ịrẹkụ yị ọnị nị. 11Uzaya ộ nyị isoja ẹnẹmẹhị tịtẹ ee zi ịrẹkụ. Ọchẹrịsa anị ene si eyi pè avaba ịsa ẹ vị Ijẹyẹrị ọnịrị Imaseya, ọza ịnya ịnị anụkọrọ ohinọyị ana a hị́ Ihanịya ô si eyi pè ọchẹrịsa ẹnẹẹ nị. 12Ọga isoja anị vị ẹnị akawụ tụra akata (2,600) 13Isoja ene hi ahụ ọga ẹnẹẹ vị ẹnị akawụ-akawụ oze ẹchẹẹhị tụra ẹvarẹwụ tụra ẹẹta tụra akavarẹchẹhị (307,500) Ẹnịnị vị aza ana hụ ọ nọ ịrẹkụ ọnịvị ohinọyị. 14Uzaya ộ kụ́ ọha, ogonto, amu enyusẹ-enyusẹ, awuru enyusẹ, ọkịta ọnịrị ọpa ne beri ịrẹta ananta yị isoja ẹnẹẹ. 15Ịnị Ijerusarẹmị vị Anụkọrọ anị ệ mẹ̀ ịsa ene e si ne ọpa, ọnịrị ịrẹta ọbanyị-ọbanyị hụrẹ ịrẹsụ irehi ọgọdọ, ọnịrị ụtọ-ụtọ ọvọ ẹkụra. Uzaya vị ana nyayịnẹ ngụrẹyị dị ọ nyị ụkata ẹtẹẹtẹrẹ agụvị ka Ohomorihi ô gụ ọ ụvọ.
 sị ụya rị Uzaya agụvị ka ọ sị ẹngụụ tụ ẹba.
16Ịjị ộ maanị re ka ọnị ọ sụ ụkata, dị ọ kụkụ ee wu ana mẹ̀ ka ọ hyẹdụ nị. Ô du Ẹnẹyịmavara Ohomorihi anị ẹngụ agụvị ka ộ nọ ịnị irehi Ohomorihi na rị eturare ịra ịrẹsụ ụta eturare. 17Azarịya ohirẹsụ irehi Ohomorihi beri ẹnị ẹbẹẹna ana ayị ẹnịnị vị ê ne tụ́ ohinọyị ịnị eehi Ohomorihi, 18#Kụra 30.7,8; Ịrị 3.10dị ẹ kà taarụ ohinọyị! E yi vọrọ tụra awụ ka wa rị eturare ịra hi Ohomorihi. Ohirẹsụ irehi Ohomorihi nịnị ana hụrẹ ovwoovu Eerọnị a nyị ka ẹẹ mẹ̀ ụkọrọ ọnọnị nị. Agụvị avọọ, jịnẹ hụrẹ aha ọnịnị ọnọnị. O yi vee zee yọ agụvị ka ọ raà rị ịvị Ohomorihi. 19Uzaya vị ana jẹẹ akaha ụta Eturare, dị ọ sị ẹnya anaā sịị rị oturare ịra rị ụvọ. Ộ du ayị hi ohirẹsụ irehi Ohomorihi ẹnẹnị, dị ụkụ za a ẹngụ obobooro ọnọọ, dị ọ da tụ́ ẹhẹ ịnị eyi ịrẹsụ anị nị. 20Azarịya ọnịrị ẹnị ana vọ me re eyi ịrẹsụ anị, dị angwa hi wa, dị ẹ sị ụkata-ụkata tụra jịnẹ hụrẹ ịnị eehi Ohomorihi. Dị ộ hụụ ịzọọ eyiha-eyiha agụvị ka Ẹnẹyịmavara ọ raà sị ụya rị ọ. 21Ohinọyị Uzaya ọ yị vana gụ ịnị ẹhẹ anị, agụvị ụkụ anị. Ọ yị vana zụ ngụ irehi Ohomorihi, dị ọ ra ịnị eehi anị dị ọ hụrẹ ụvọ ụkọrọ anị chẹrẹ ozi anị Ijotami ana dọ ọ ịrẹsụ rị ohinọyị. 22Ọnịsẹ Ayịsaya ozi Amozi ộ chẹrẹ avaba ịsa ọsa ana mẹ̀ ịnị ụmẹ ohinọyị Uzaya. 23#Ayị 6.1Uzaya me su di ệ ne e ịzị eē ne oku ohinọyị nịnị tụ, ụkụ ana za ọchẹngụ ọza ẹ yị ne e tụ́ ụsị ohinọyị nịnị. O me wusu, di ozi anị Ijotami rị ohinọyị dọ ọ ịrẹsụ nị.
Currently Selected:
2 Ịtọpa 26: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
