2 Ịtọpa 15
15
Ẹtẹ ọnị ohinọyị Asa tenyi
1Ohomorihi ộ sị ụkata yị ọnọrụ ọnya aanị ana a hí Azariya ozi odedi. 2Ô ne tù ohinọyị Asa, di o na owu, dị ọ kà, ohinọyị Asa ọnịrị Anijuda ne beri Anịbẹnjamịnị nịnị e batọ ịrẹyị anị. Ộ kà Ẹnẹyịmavara kà ọnị vaa ya pe wa ẹnịnị ẹ̀ẹ jẹẹ pe ọnị. Ẹnịnị èe si ọ, e vee re e, ama ẹnịnị ẹ̀ẹ varẹma ka a, ọnị rẹ vaa hụrẹ wa ụvọ. 3Ộ kà a o sị kù ọnị Anisirẹrị nịnị hụrẹ Ohomorihi ụvọ. Ẹnịnị ẹ yị nyị ohirẹsụ irehi Ohomorihi nịnị ana vọrọ ka ẹẹ sị ịrẹyị anị zụ wa. Ẹnịnị ẹ yị nyị ọda Ohomorihi ọnị ẹ yaa saasa. 4Ama ụmẹ ọnị ẹngụkata tụ́ wa, dị ệ vaka Ẹnẹyịmavara Ohomorihi Anisirẹrị na. Ẹnịnị ê si ọ, di ê re e nị. 5Ka ẹngụkata yị ịnị ẹkụra ụmẹ ọnọọ, ẹ yị nyị ọza ana zụ ngụ ịzọọ dị ọ zụ varẹma ịnị ẹngwọọrọ. 6Á kụ́ ẹnịnị ga hi keni-keni ánẹkụra ẹnyị maa mẹ̀ ehunaa yị ọsa, dị anẹkụra ọbanyị ẹnyị aa mẹ̀ ehunaa yị ọsa, agụvị ka Ohomorihi aà kụ́ ẹngụkata ọnịrị ayodu tù wa nị. 7Ọ kà Asa ọ̀ sị tụ ayọvị, à sị ọ hụrẹ ayịnẹ ka ọ vaa rị ọgụ ụkọrọ ana aa mẹ aanị 8Ịjị Asa maanị wụ́ ịrẹyị ọnị Azariya ozi Oodedi kà aanị, dị ayị anị sị vị nị. Ộ kụ́ avaba ori ene hi ịnị ẹtẹ Ijuda ọnịrị ẹtẹ Ịbẹnjamịnị kwooze. Dị ọ rẹ kụ́ ori ene hi ẹkụra ẹbanyị-ẹbanyị ene hi ataba Ehwireemi ọnị ọ raà nyị ẹbẹẹba anị kwooze nị. Ô re tenyi ụta ịsọvọ Ẹnẹyịmavara ana jẹẹ ini ohweje irehi Ohomorihi. 9Aza ọrụrụ-ọrụrụ ệ hụrẹ ẹtẹ Ehwireemi, Ịmanasẹ, ọnịrị ẹtẹ Isimiyọnị vàka Asa vẹ. Ẹnịnị ệ ra pe ohinọyị, agụvị ka ê re ka Ẹnẹyịmavara yà a ịrẹma. Asa vị ana tụ́ hị́ avaba ẹnịnị ọnịrị Anijuda ọnịrị Anịbẹnjamịnị nịnị. 10Ịnị ụhwẹ ọhụta ị́rayị ẹwụrẹhị ọnị Asa rị ohinọyị, ẹnịnị ệ wara gụ Ijerusarẹmị. 11Ịhị ọnọọ, ẹnịnị ệ sị ụnọ akatarẹchẹhị (700) ọnịrị atẹmẹ akawụ oze ẹẹta tụra akahị (7,000) mẹ̀ ịsọvọ hi Ẹnẹyịmavara. Ịnị ẹnya ẹnẹ ẹ kụ ẹ mẹ̀ nọ ịrẹkụ, ẹ kụ ịsụpa ẹnẹnị hụrẹ nị. 12Ẹnịnị ê wo oto yi Ohomorihi ka ẹnị vaa sị avaba ayị ẹnịnị ọnịrị ivehu ẹnịnịị hẹkẹ Ẹnẹyịmavara, Ohomorihi ohiku ẹnịnị. 13Ẹ ka ọza tụra ọza ẹnẹ ẹ̀ yị hẹkẹ ẹ, ọ̀ọ vị ozweyi, ọ̀ọ vị ọzọkụ; ọ̀ọ vị ọnọrụ, ọ̀ọ vị ọnẹẹ, vị́ a vaa wụ̀ ọ nị. 14Ẹnịnị ệ sị ọngwẹ tụ́ ẹba dị ẹ sị ịrẹha Ẹnẹyịmavara hị́ eku ka ẹnị vaa saasa oto ẹnẹ ẹnị wo aanị nị. Ẹnịnị ê na owu, di e hú ịkakanchị nị. 15Ayị avaba Anijuda nini ê hine, agụvị ka ẹnịnị ệ sị avaba ayị ẹnịnị maanị wo oto yị Ohomorihi. Ayị ẹnịnị ô hine ka ẹnị ẹẹ hẹkẹ Ẹnẹyịmavara. Ohomorihi ộ dọ wa, dị ọ mẹ ẹ̀ nyị ẹngwọọrọ eyi ẹnyị-eyi ọsa nị. 16Ohinọyị Asa ô du ọnyị anị ọbanyị hụrẹ udi ose ohinọyị, ọnyị anị ọbanyị ộ mẹ̀ uyi ori ana aā hị́ Asẹra ẹnẹ ẹ ka ọọ̄ mẹ̀ ka ịsa ọ̀ mẹ yị aza. Asa ộ dà ori ọnọọ nya ẹtẹ, dị o che e piri-piri, dị ọ rị opiri-opiri anị ịra inozi Ikidironi nị. 17Ọ̀ọ daka vị ka ohinọyị Asa e yi du avaba ịzị ikanhweri nịnị yaa mẹ ahẹkẹ ịnị ẹtẹ anị ha, Ẹnẹyịmavara ọnịnya ọ sị ayị tụra pooro ịnị ẹhẹ anị nị. 18Ộ kụ avaba ẹnya ọnị Abija ada anị kụ tịtẹ yị Ohomorihi, dị ọ kụ wa tụ ini irehi Ohomorihi nị. Ộ kụ ẹnya ana a sị igooru ọnịrị isiriva mẹ̀ ọnị ọnị ụvọta sị yị Ohomorihi vẹ na tụ́ ini irehi Ohomorihi. 19Ẹnịnị ẹ yị vana nyị ịrẹkụ pooro, ẹ̀ yị vị ịjị ọnị ọ sị gụ ịrayị ohurẹẹwụ tụra ẹẹhị oni o vi ohinọyị.
Currently Selected:
2 Ịtọpa 15: EBTP
Highlight
Copy
Compare
Share
Want to have your highlights saved across all your devices? Sign up or sign in
Ebira First Bible © Bible Society of Nigeria, 2014.
