1 Anịtẹsaronika 1

Ụkụ

1 # Ụkọ 17.1 Ẹmị Ịpọọrụ beri Isirivanọsị ọnịrị Itimoti aa chẹrẹ iwe ọnọnịị tụ́ụ hi anịragụ Ohomorihi ana yà ẹkụra Ịtẹsaronika nị. Ẹnịrị Ohomorihi Ada ọnịrị Ijeesu Ikirisiti Ananyị yị ẹ sị vị ọnya. Ohomorihi Ada ayị ọnịrị Ijeesu Ikirisiti Ananyị yị ẹ mẹ ọyịza wụ nịnị, dị ẹ rẹ sị ẹngwọọrọ yị wụ nịnị!

Ẹdọwụ ọnịrị ẹhẹ Anikirisiti ene hi Ịtẹsaronika

2Yaa kụ́ Ohomorihi avọ ụmẹ tụra ụmẹ agụvị avaba awụ nịnị; ị raa tamayị awụ nịnị ini aduwa ayị. 3Ịị̄ tamayị awụ nịnị pooro ọ́vịdị Ohomorihi Ada ayị, anka ụ mẹmẹ aa sịị zụ̀ ka wáa sị ayị tụraa ini oze ụkọrọ awụ nịnị nị. Ịrẹyị ọza oni u sì raa mẹ ka waa mẹ̀ ụkọrọ nịnị ẹtẹẹtẹrẹ, vị ụ rẹ nyayịnẹ ee zí Ijeesu Ikirisiti Ananyị yị eyi nịnị. 4Ẹwụ nịnị ẹyịnyara amị, yáa yẹ ka Ohomorihi óo sì ịrẹyị awụ nịnị, dị ọ rẹ nyị wụ nịnị mẹ áanị nị. 5Ị mẹ̀ vịdị va kà enube ọyịza wụ nịnị, ayị vị ịrẹka kẹnẹ ị za vẹ. Ohomorihi ộ sị ụkata anị zụ̀ ini oze enube ọnọọ. Enube ọnọọ vị ana hụụnị ụvọ Ụhwẹ Ọnịnị vẹ. Ộ sị zụ̀ ka enube ọnọọ vị ịzẹyịza. Wáa yẹ, ị mẹmẹ aa mẹ̀ ebira, ị mẹ̀ yà ịdị awụ nịnị ịzọọ. Agụvị awụ nịnị ị vavọọ aa sịị mẹ nị. 6#Ụkọ 17.5-9Ẹwụ nịnị ọ́ rẹ sị ahụ ẹyị hi ẹtẹ, dị ụ raa sị ahụ Ijeesu Ananyị yịị hi ẹtẹ nịnị nị. Wàa daka rị ụya nịnị pooro, wâ dọ enube ọnọọ nịnị, dị Ụhwẹ Ọnịnị sị ịrajẹ wụ nịnị nị. 7Agụvị avọọ avaba Anịragụ ene hi Imasedoniya ọnịrị Akaya ana vị ọdọwụ vị ana aa hama wụ nịnị. 8Oze ịnị ụvọ awụ nịnị ị́rẹyị Ananyị yị sị zị gara na ngụ Imasedoniya ọnịrị Akaya nị. Ẹ yị hyakụ vị ịzọọ kẹnẹ, ọ sị ngụ ịrẹyị avaba aha ka waa sị ayị tụra Ohomorihi nịnị. Ịjọnọọ ẹ yị kụkụ nyị ịsị a vọrọ ka ẹ yà kà. 9Avaba aza aa kà a, u meme sì yi ọzọga nịnị, i mè ve hee wu nịnị. Ẹ rẹ yaa kà a, ụ mẹmẹ và hụụnị ori ọyịhẹkẹ và ká Ohomorihi vẹ nịnị, dị ụ kụkụ aa hẹkẹ Ohomorihi obooro ana yára nịnị. 10Dị ụ rẹ jẹẹ ee zí Ozi Ohomorihi nịnị ka ọ̀ và hụrị ẹbẹẹba vẹ nị. Ozi anị ọnọọ ọ ha hụụnị isu nị. Ọnị ọ vị Ijeesu ana dọ yị há hụụnị ọyịkụ Ohomorihi ana aa vẹ nị.

Currently Selected:

1 Anịtẹsaronika 1: EBTP

Highlight

Copy

Compare