1 Ịsamụwẹrị 11

Ịsọọrụ ọ na dọ Anijabesi tụ́

1Â nyị ọnọrụ ọnya aanị ana aā hị́ Inahasi. Anẹkụra Amọnị ọ vị nị. Ẹkụhị ọnya dị ọ kụ́ ịrẹkụ ne tù Anijabesi Anigiriyadi nị. Dị avaba anọrụ Anijabesi dá ịpẹ yọ dị ẹ ka, “Aarịhịnị wàa dọ ka we yi vee pè yịị kụ̀ ịrẹkụ, yâ dọ ka wa vị ohinọyị ayị”.

2Di Inahasi Anamọrị ọnọọ tụ́ ohi dị ọ ka, “Ịsa ọnya kẹnẹ ụ zụ mẹ̀ nịnị dị asị mi pè wu nịnị kụ̀ ịrẹkụ nị. Jẹẹ ma tụ̀ eyi ụvọrị awụ nịnị, dị ma sị mẹ̀ ụhị nyị Anisirẹrị.”

3Dị ọdọvịdị Anijabesi tụ́ Inahasi ohi ka ọ̀ sị ẹkụhị ịhịmba yị ẹnị, dị ẹnị ẹ sị kà enube anị ịnị avaba ẹtẹ Isirẹrị. Ẹ kà ẹ yị nyị ọza ana zụ dọ ẹnị tụ́, dị ẹnị hụrẹ ẹngụ ẹnịnị ụvọ yị Inahasi.

4Ịjị ọnụtụ ana a tụ́ va ngụ Igibiya Ịsọọrụ, dị ẹ maanị kà ịrẹyị ọnọọ yị aza ẹnẹẹ, dị avaba ẹnịnị ee nowu nyamaa kẹnẹ nị.

5Ẹ mẹ̀ vavọọ a tịị tụ́ orere booboro, di e vene re ka Ịsọọrụ ọnị ộ và ịsụpa anị hi ọvịdị hụụnị aarẹ aa vẹ nị. Dị Ịsọọrụ kà, “Aza ẹnẹnị mè rẹ? Sị ẹ vẹ dị ẹ maanị ee sú ùnè?” Dị aza ẹnẹẹ rẹ kà a yọ ịrẹyị anị Anijabesi va kà nị.

6Ịjị Ịsọọrụ maanị wụ́ ịrẹyị ẹnẹẹ, dị Ụhwẹ Ohomorihi sị ụkata yọ, dị ayị nyayịnẹ kụ́ ọ ẹtẹẹtẹrẹ nị.

7Dị Ịsọọrụ sị imaaru ẹẹva, dị ọ wụ̀ ọ dị ọ vọ ọ chẹkẹ-chẹkẹ, dị ọ kà ọnụtụ nịnị ẹ kụ ọ ngụ avaba ẹtẹ Isirẹrị zịịzị nị. Ọ kà, “Ọza tụra ọza ẹnẹ ẹ̀ yị saasa Ịsamụwẹrị ọnịrị Ịsọọrụ nọ ịrẹkụ vị ana vaa sẹ̀ chẹkẹ-chẹkẹ anka uye imaaru ẹnịnị. Ẹnẹyịmavara ộ mẹ̀ ka aza ẹnẹẹ è hí angwa, dị avaba ẹnịnị dudu jịnẹ hi ẹhẹ nị.”

8Ịsọọrụ mẹ̀ wara aza ẹnẹẹ gụ ịzị aā hị́ Ibezeki, anọrụ Anisirẹrị ene hi ịzọọ vị ẹnị akawụ-akawụ oze ẹchẹhị tụra ẹvarẹwụ (300,000), dị Anijuda ẹnị vị akawụ-akawụ oze ẹwụrẹhị nị (30,000).

9Dị aza ẹnẹẹ kà a yị ọnụtụ a na tụ́ hụrẹ Ijabesi vẹ, dị ẹ ka ẹ̀ kà a yị Anijabesi Anigiriyadi ka à nee tù ụmẹ ọọdụ ụhwọọ, a vaa dọ waa tụ́. Ịjị ọnụtụ ẹnẹẹ maanị na kà a yị Anijabesi Anigiriyadi, dị ẹ yaa jẹ kẹnẹ nị.

10Ịzẹyịza dị ọnụtụ ẹnẹẹ na, dị ẹ na kà a yị Anamọrị dị ẹ ka, “Ị vaa sị ẹngụ ayịị va wụ nịnị ụhwọ, dị wa mẹ yị ọ̀ọ mẹ̀ zee wu eyi nịnị.”

11Ẹnẹnẹ viri-viri eyinẹhẹ anị, dị Ịsọọrụ kụ́ aza anị dị ọ ga wa hi oze ẹẹta nị. Dị ẹnịnị zwe na ngụ ịzị Anamọrị hi, dị ẹ wụ Anamọrị pooro dị ụmẹ ọọdụ tù nị. Anamọrị ana vọ vị ana a gara zizi; kụkụ nyị aza ẹnịnị ana vọ gụ ẹẹva tụ́ aha ọnya.

A varẹma sị ahụ Ịsọọrụ hị́ ẹtẹ anka ohinọyị

12Dị Anisirẹrị kà a yị Ịsamụwẹrị dị ẹ ka ene ee họ̀ use ịhyọọ ka aanị ka Ịsọọrụ aa vaa vị ohinọyị ayị nị? Ẹ ka à kụ́ aza ẹnẹẹ vẹ ka ẹnị aa wụ̀ wa.

13Dị Ịsọọrụ ka asị a nyị ọza ana a wụ̀ ajịnị, agụvị ka ajịnị Ẹnẹyịmavara dọ Anisirẹrị tụ́ nị.

14Dị Ịsamụwẹrị va hị́ Anisirẹrị dị ọ ka ẹ̀ vẹ ẹnị ẹ̀ nọ Igirigari dị ẹnị ẹ̀ na sị ahụ ohinọyị tenyi hi ẹtẹ. 15Ịzẹyịza dị avaba aza ẹnẹẹ nọ Igirigari dị ẹ na yà eyi Ẹnẹyịmavara, dị e tenyi ahụ Ịsọọrụ si hi ẹtẹ ka ọnị ọ vị ohinọyị nị. Dị ẹnịnị yà ịzọọ dị ẹ mẹ̀ ịsọvọ yị Ẹnẹyịmavara kà avaba aza ẹ̀ nyị ẹngwọọrọ nị. Dị Ịsọọrụ ọnịrị Anisirẹrị nịnị nyayịnẹ rị eche ịrẹyị ọnọọ nị.

Currently Selected:

1 Ịsamụwẹrị 11: EBTP

Highlight

Copy

Compare