1Ipita 5

Kà ẹngụ awụ nịnị chi ịnị ụvọ Ohomorihi

1Máa nyị ịrẹyị ọyịkà yi azọkụ ịragụ Ohomorihi ene hi ịnị akakana awụ nịnị. Ẹmị rẹ vị ọzọkụ ịragụ anka ẹwụ nịnị. Mâ sị eyi amị re ụya ọnị Ikirisiti rị. Ẹmịrị ẹwụ nịnị vaa nyịị tụ́ ịnị ụbanyị Ijeesu Ikirisiti oni Ohomorihi vaa sịị zụ̀ aza. 2#Ịjọ 21.15-17Aarịhịnị, waa tẹsị aza Ohomorihi oni Ohomorihi si chire wu nịnị ụvọ ka wa sị eyi pe! Asị u ti, àa vavọọ aa mẹ nịnị; ama waa mẹẹ anka ịsị ẹ hụụnị ayị ọza vẹ, anka Ohomorihi me sì ọ. Asị ụ hụ̀ agụvị ẹkẹhị kẹnẹ mẹẹ nịnị; ama waa mẹẹ, agụvị ka ẹwụ nịnị ụvọta ee sì ka wa mẹẹ nịnị nị. 3Asị ụ mẹ ọga tụra aza oni Ohomorihi si chire wu nịnị ụvọ, ama waa mẹ̀ ebira ana a vọrọ ka aza ẹnẹẹ ẹ̀ẹ saasa. 4Ijeesu Ikirisiti ọ vị ohirẹsụ aza ana aa tẹsị aza Ohomorihi nị. Ịhị ọ̀ sị ẹngụ zụ̀, ọ vaa sị ẹyịza ana nyị ụbanyị ẹnẹ ẹ̀ yị ma sa yị wụ nịnị. 5#Ụhị 3.34Ẹwụ nịnị ezweyi bẹẹ, re ka waa ka ịrẹsụ hi yị azọkụ nịnị. Avaba awụ nịnị ọ̀ọ sị ụbanyị yị ẹngụ nịnị, dị ụ waa sị ịrẹsụ ọkahii mẹ awuru chire nịnị, agụvị ka Iwe Ohomorihi ộ kà a ka: Ohomorihi ó yi sì aza anaā sịị ẹngụụ tụ́ ẹba, ama ọọ̄ mẹ̀ ọyịzaa yị aza anaā kà ẹngụ ẹnịnịị chi. 6#Imt 23.12; Irk 14.11; 18.14Agụvị avọọ, kà ẹngụ awụ nịnị chi ọvịdị Ohomorihi ana nyị ụkata, agụvị dị ọ̀ sị wụ nịnị tụ́ ẹba ịnị ụmẹ ene èe zée eyi. 7Sị avaba ariro awụ nịnị chire Ohomorihi ụvọ, agụvị ka ọ́ọ sị ịrẹyị awụ nịnị tụ́ ịnị ayị anị. 8Sị ụvọ za ẹngụ awụ nịnị, dị ụ wa sị eyi pe ẹtẹ nịnị, agụvị ka Echu ana vị ọnịvị awụ nịnị, aa ngwọọ zịịzị anka idu ene ee nowuu zị avọọ, ee sì ọza ọnị ọọ wụụ rị. 9Jẹẹ geri-geri nịnị ịnị ẹdọwụ awụ nịnị, asị u si oze yi Echu nịnị. Tamayị ka avọọ ọdọwụ ana vọ avaba ẹhẹ ẹnị mẹ̀ raa rị ụya nị. 10Ohomorihiī mẹ ọyịzaa yị aza ẹtẹẹtẹrẹ, ộ hị́ wụ nịnị ka wa vẹ, dị ẹwụrị Ijeesu ọ̀ vị ọnya nịnị ịnị ụbanyị ẹnẹ ẹ̀ yị ma sa pooro zịna-zịna. Wàa sị ụya rị chee nịnị, Ohomorihi ọnị ụvọta vee tenyi wu nịnị, dị ọ̀ mẹ ka wa gụ nịnị, dị ọ rẹ mẹ ka wa nyị ụkata jẹẹ geri-geri nịnị ịnị avaba ịsa. 11Ọnị ọ nyị ụkata pooro zịna-zịna nị. Aamị.

Ịrẹyị ọdịrẹma

12 # Ụkọ 15.22,40 Isirivanọsị o pe mi chẹrẹ iwe ọnọnị tụ́ hi wu nịnị nị. Mâ yẹ ka ọdọwụ obooro ọ vị nị, a zụ sị ayị tụraa. Mee sì ka ma tụ́ wụ ọtụtụrụma, dị ma rẹ dọ ivenu tụ́ ọ ka ịzẹyịza ayamva Ohomorihi ọ vị ọnọọ nị. Agụvị avọọ, jẹẹ geri-geri ịnị anị nịnị. 13#Ụkọ 12.12,25; 13.13; 15.37-39; Ikor 4.10; Ihwm 1.24Anịragụ Ohomorihi ana yà Ịbabịrọnị oni Ohomorihi dudu nyị ẹwụrịị nịnị ka ẹnị kụ́ wụ nịnị. Ịmaakị ozi emi ka ọnị rẹ kụ́ wụ nịnị. 14Waa kụ́ ẹngụ nịnị ini oze ana sị zụ ka wee sì ịrẹyị ẹngụ nịnị. Ohomorihi ọ̀ sị ẹngwọọrọ yị avaba awụ nịnị ọnị ọnịrị Ikirisiti sị vị ọnya.

Currently Selected:

1Ipita 5: EBTP

Highlight

Copy

Compare