1 Ohinọyị 6

Isoromọnị ộ dà irehi Ohomorihi

1Ịnị ịrayị ana gụ ọ ịrayị akava tụra ẹbẹẹna ọnị ezi Anisirẹrị nịnị jịnẹ hụrẹ Ijipiti, Isoromọnị si rị ohinọyị tụra ịrẹsụ Anisirẹrị nị. Ịnị ịrayị ọhụna ọnị ọ vavọọ sị rị ohinọyị, ịnị ụhwẹ ana aā hị́ Izivi, ọnị ọ vị ụhwẹ ọhụva ịnị ịrayị ọhụna oni Isoromọnị si rị ohinọyị nị. Ịnị ụhwẹ ọnọọ Isoromọnị yà dà irehi yị Ẹnẹyịmavara nị. 2Irehi oni Isoromọnị dà yị Ẹnẹyịmavara ộ gọdọ tù ahụ ẹnarẹwụ Ụgana anị o re tù ahụ ohurẹẹwụ. Ọ rẹ nẹba tù ahụ ẹbẹẹva tụra ẹẹhị. 3Ịkatamba ana yà ọvịdị ohweje irehi ọnọọ ộ gọdọ tù ahụ ohurẹẹwụ, dị ahị ka avọọ ọ mẹ̀ yà kara ụgana irehi ọnọọ nị. Ụgana irehi ọnọọ okiri-okiri vị ahụ ẹwụrẹhị. 4Ộ mẹ ozokete hi ini irehi ọnọọ, dị a nyị ịsị ọ sị jị ozokete ẹnẹẹ nị. 5Ọkara ugene irehi ọnọọ vị ọnị ọ dà aha anka ọtụrọsa avọọ kara. Avọọ ọ mẹ̀ rẹ mẹ kara ohweje irehi ọnọọ ọnịrị ini aku ọdịrẹma anị nị. Dị ọ rẹ dà aku tụ́ akaha irehi ọnọọ okiri-okiri nị. 6Ọtụrọsa ụvẹtẹ ộ gana tù ahụ ịhịmba rị ẹjịjị. Ọtụrọsa ana yà ịnị akakana ọnị ộ gana tù ahụ ịhịịna. Ọtụrọsa ọhụta ọnị ọ rẹ gana tù ahụ ẹẹwụrị ẹjịjị. Ọtụrasa ẹnẹẹ vị ọnị ọ vavọọ mẹ agụvị ka ọ mẹ̀ chị aha kara ugene irehi ọnọọ eyi ẹhẹ, o yi sì ka ọhẹ ana za ẹnya ẹ̀ ngụ ịnị ịnẹ ugene irehi ọnọọ. 7Avaba ịrẹta ana a sị dà irehi ọnọọ ta vị ịrẹta ana a sị há ịzị a yàa ha ịrẹta. A màa dà irehi ọnọọ, ọza ọ yị wụ́ ịhama, ịraga à vị enyusẹ ụkọrọ ọnyọọnyị ịrẹyị ịzị a yà aa dà irehi.

8Oze ana a zị naa ngụ ịnị ọtụrọsa ọhụta irehi ọnọọ vị ana yà eyi ụvọrị, dị a nyị ịzị a zị̄ị hịrẹ irehi ana na ngụ ịnị ọtụrọsa ịnị akakana ọnọọ. Avọọ ọ mẹ rẹ hụrẹ ịnị ọtụrọsa ịnị akakana na ngụ ịnị ọtụrọsa ọhụta nị.

9Isoromọnị ọ si irehi ọnọọ dà, ọ sị jị. Dị ọ si ipako isida di o sì gú ọ nị. 10Di ọ da ọtụrọsa kara avaba irehi ọnọọ nị. Ọtụrọsa ẹnẹẹ ệ nẹba tù ahụ akata rị ẹchẹhị ộ tụra ẹvarẹwụ. Dị ahịka ọchị isida ọ vị ọtụ ana za irehi ọnọọ jẹẹ nị.

11Ịrẹyị ọnị Ẹnẹyịmavara ka yị Isoromoni yị: 12“Irehi ọnọnị ọnị ụ dà aanị, wàaa saasa ọda amị dị waa mẹ ịsị mi sì nị, di u re si eyi pè avaba ọda ọnị mị mẹ nị, dị waa mẹ wa nị, ịsa ọnị mị kà yi Idevidi ada awụ vị ọnị maa mẹẹ yị wụ, vị ọnị mị vaa yà ịnị anị. 13Mị vaa yà ịnị akakana Anisirẹrị. Me yi vee yi Anisirẹrị aza amịị tịtẹ.”

Ẹnya ene hi ịnị ịnẹ irehi Ohomorihi

(2 Ịtọ 3.8-14)

14Dị Isoromọnị dà irehi ọnọọ ta nị 15Ugene ịnị ịnẹ irehi ọnọọ vị oni Isoromọnị si ipako isida kú avaba anị hụụnị eteesu na ngụ ini ugene. Ịnị ịnẹ irehi ọnọọ vị ọnị ọ rẹ si ipako kú ugene anị hụụnị eteesu na ngụ ini itu anị. Di ọ sị ọchị isipirẹsị kú eteesu irehi ọnọọ nị. 16#Kụra 26.33,34Dị ọ sị ọchị isida, dị ọ sị dà aku hi ịrẹma irehi ọnọọ nị. Hụụnị eteesu aku ẹnẹẹ na ngụ ini ugene vị ahụ ohurẹẹwụ. Aku ọnọọ vị ọnị ọ dà tụ́ ịnị ịnẹ eehi keekere, dị ọ sị ịzọọ mẹ aha ọnịnị keekere nị. 17Ohweje ana yà ọvịdị aha ọnịnị vị ahụ ẹbẹẹta.

18Ịnị ịnẹ irehi ọnọọ vị ana a sị ọchị isida bẹ ododo hi. Ododo ẹnẹẹ vị ana maanị há irenu hi ẹtẹ. Ipako isida a vavọọ sị mẹ avaba anị nị, ẹ yị nyị ịrẹta ikonya ịnị anị. 19Ini aku ọdịrẹma ịnị ịnẹ irehi ọnọọ, â nyị ịzị e tenyi ịnị ịnẹ ịzọọ. Ịzọọ a mẹ ka à si apoti oto Ẹnẹyịmavara tụ́ nị. 20Aku ịnị ịnẹ keekere ọnọọ ộ gọdọ tù ahụ ohurẹẹwụ. Ọ rẹ gana tù ahụ ohurẹẹwụ. Ọ rẹ gana tù ahụ ohurẹẹwụ, dị ọ rẹ nẹba gụ ahụ ohurẹẹwụ nị; igooru-igooru o si kú ọ nị, dị ahịka igooru o re si kú aha ịsọvọ anị ana a si ọchị isida mẹ nị. 21Di Isoromọnị si igooru obooro di o si kú ịnị ịnẹ irehi ọnọọ nị. Dị ọ rẹ sị ẹba igooru dị ọ sị jị ọvịdị aku ịrẹma keekere, dị ọ sị igooru kú ọ nị.

22 # Kụra 30.1-3 Avaba irehi ọnọọ Isoromọnị si igooru kú nị, agụvị irehi ọnọọ ọ̀ gụ jẹẹ. Avaba irehi ọnọọ ọnịrị avaba aha ịsọvọ ene hi ini aku ịrẹma-ịrẹma ọ sị igooru kú nị.

23 # Kụra 25.18-20 Ini ịnẹ aku keekere ini irehi ọnọọ vị ana a sị ọchị ovivi dị a sị bẹ uhwoto ọnụtụ Ohomorihi ẹẹva ana aā hị́ ikerubi hị́ ọnya ọnya ọ nẹba tù ahụ ẹwụrẹhị. 24Akaha ọnya ịnị avaka ikerubi ọnya vị ahụ ịhịmba rị ẹjịjị, dị avaka akaha ọsa ọnị rẹ vị ahụ ịhịmba rị ẹjịjị nị. Ẹ̀ẹ gana avaka ẹnịnị hụrẹ ụtọ avaka ọnya na ngụ ụtọ avaka ọsa vị ahụ ẹwụrẹhị.

25Ikerubi ọsa ọnị ọ̀ọ rẹ gana avaka anị, ô tù ahụ ẹwụrẹhị. Ikerubi ẹyịva vị ẹbẹẹbẹ, dị ẹ vị ọnyọọnya nị.

26Ikerubi ọnya ọ nẹba tù ahụ ẹwụrẹhị; avọọ ọsa mẹ̀ rẹ yà nị. 27Ikerubi ẹyịva ẹnẹẹ vị ana a kụ́ tụ́ ịnị ịnẹ aku keekere ini eehi ọnọọ. Dị ẹ gana avaka ẹnịnị dị avaka eyi ọnya ịnị avaka ikerubi ọnya na kà ugene, dị avaka eyi ọnya ịnị avaka ikerubi ọhụva ọnị rẹ na kà ugene nị. Avaka ẹnịnị ọsa ana và kà ịnị akakana irehi vị ana maanị kà ẹngụ. 28Dị ọ sị igooru kú avaba ikerubi ẹnẹẹ nị.

29Avaba ugene irehi ọnọọ okiri-okiri vị ana a mẹ ikerubi ọnịrị ọsọchị ne beri ododo ana há irenu hi. Avọọ a mẹ̀ mẹ̀ ẹ hi ịnị ịnẹ ọnịrị ẹhẹẹhẹ irehi ọnọọ nị. 30Eteesu irehi ọnọọ vị ana a rẹ si igooru kú ịnị ịnẹ ọnịrị ẹhẹẹhẹ anị. 31Dị a sị ọchị orivi mẹ̀ ukere oze ana na ngụ aku ịnịnẹ keekere nị. Dị ọ rẹ nyị ọbana oze ọnịrị uhweremi ịnị ọgọgọ ẹyịịhị nị. 32Ịnị ukere oze ẹyịva ẹnẹẹ ana a sị ọchị orivi mẹ aanị, â mẹ ikerubi ọnịrị ọsọchị ne beri ododo ana aa há irenu hi ịnị anị, dị a si Igooru kú wa nị. Di a rẹ si igooru kú ikerubi ẹnẹẹ ọnịrị ọsọchị ẹnẹẹ nị.

33Ini oze irehi ọnọọ vị ana a rẹ sị ọchị orivi mẹ ọ̀tụ̀ hị́. Ẹnịnị vị ana nyị ọgọgọ ẹẹna. 34Irehi ọnọọ ọ rẹ nyị ukere oze ẹẹva ana a sị ọchị isipirẹsị mẹ. Ukere ọnya ọnya vị ana aā kara. Ukere ẹẹva ọsa ana yà ini oze ọsa vị ana rẹẹ̄ kara. 35Dị a mẹ ikerubi ọnịrị ọsọchị ne beri ododo ana aa há irenu hi ini ukere oze ẹnẹẹ nị. Dị a sị igooru kú ịsa ana a bẹ hi ọ avọọ ẹbẹẹbẹ nị. 36A dà ịsa kara ohweje ọnọọ. Ịrẹta ana a há ana a si tụra a vị ọrọ ẹẹta, dị a va sị ọchị isida ọrọ ọnya tụra ịrẹta ọnọọ nị.

37Ịnị ịrayị ọhụna oni Isoromọnị rị ohinọyị, ịnị ụhwẹ ọhụva ịrayị ọnọọ a sị ká irehi Ohomorihi ẹtẹ nị. Ụhwẹ ọnọọ ọ vị ụhwẹ Izivi nị. 38Ịnị ana tụ́ ọ ịrayị ẹwụrọnya oni Isoromọnị sị rị ohinọyị, ịnị ụhwẹ ọhụhịnta ịrayị ọnọọ ana aā hị́ ụhwẹ Iburu, a sị dà irehi ọnọọ ta nị. A mẹ̀ mẹ eto anị gẹdẹ-gẹdẹ a dà a nị. Ịrayị ịhịmba Isoromọnị sị dà irehi ọnọọ nị.

Currently Selected:

1 Ohinọyị 6: EBTP

Highlight

Copy

Compare