1 Ohinọyị 21

Ịrẹyị Ụbazị Ịnabọtị

1Ọ mẹ̀ dà kù ịrẹma ịsa ana vavọọ mẹ aanị a rẹ vana nyị ịrẹyị ọsa. Ịnị ụmẹ ọnya, â nyị ụbazị ọnya aanị. Ọnọrụ ana aā hị́ Ịnabọtị ana vị Anijezirẹrị ọ nyị ụbazị ọnọọ nị. Ụbazị ọnọọ vị ana yà Ijezirẹẹrị ọgụrị irehi Ahabị ana vị ohinọyị Anịsamarịya. 2Ẹkụhị ọnya di Ahabị va kà a yị Ịnabọtị dị ọ ka ọ̀ sị ụbazị ịvayịnị ọnọọ yị ọnị dị ọnị ọọ kụ́ ịsẹpẹẹ tụ́ ọ, ka agụvị ka ộ gụrị irehi anị. Ahabị ka ọnị vaa sị ụbazị ene zoza hu avọọ yọ, à yị vị avọọ òo sì, dị ọnị si ọ ụta. 3Di Ịnabọtị tụ́ Ahabị ohi dị ọ ka asị Ẹnẹyịmavara zẹẹ ka ọnị ọ̀ sị ogu ohiku anị dị ọnị ọ̀ sị yọ. 4Ahabị mẹ̀ vavọọ wụ́ ịrẹyị ọnị Ịnabọtị Anijezirẹrị kà, ka ọnị ọ yị zụ si ogu ohiku anị yọ, ayị anị o si du, di o si hu aa nọ ini eehi nị. Ahabị mè tù ini eehi, dị ọ na hụtụ ịnị ịbẹẹdị anị, dị ọ và eyi kà aha ọsa, dị ọ ka ọnị ọ yị rị ịsa nị.

5Di Ijezebẹrị ose anị vavẹ ve tù ọ nị, dị ọ ka, “Sị ẹ vẹ dị wụ maanị vara eyihi, dị wụ wẹ́ yị rị ịsa?” 6Di Ahabị kà a yị ose anị dị ọ ka, “Mâ kà a yị Ịnabọtị Anijezirẹrị ka ọ̀ sị ụbazị anị mị di me si ọ ụta, à yị vị avọọ òo sì di ma si ụbazị ọsa dọ ọ ịrẹsụ yọ, ama ọ ka ọnị ọ yị sị ụbazị anị yị mị.” 7Di Ijezebẹrị ose anị tụ́ ohi dị ọ ka, “Wáá yẹ ka ẹwa vị ohinọyị tụra avaba Isirẹrị nị? Kwẹẹtẹ dị wa rị ịsa, dị wa sị ayị awụ nẹtẹ. Ẹmị vaa sị ụbazị Ịnabọtị Anijezirẹrị ọnọọ wụ.”

8Di Ijezebẹrị chẹrẹ iwe, dị ọ sị ịrẹha Ahabị tụ́ ọ, dị ọ sị ịsa ana Ahabị sịị̄ sị ụvọ tụ́ ini iwe tụ́ ọ nị. Dị ọ si iwe ọnọọ tụ́ hi ọdọvịdị Anisirẹrị ana vị aza ẹnị eyi yẹ ịnị ẹkụra ẹnịnị ana ra pè Ịnabọtị nị. 9Dị ọ chẹrẹ ẹ tụ́ ini iwe ọnọọ ka, “Kà a ka ọzọza ọ̀ sị awẹ, dị wa sị Ịnabọtị yaayịtẹ udi ohirẹsụ aza ẹnẹẹ. 10Dị ụ kụ́ aza kẹnẹ-kẹnẹ ẹẹva pè Ịnabọtị, dị aza ẹnẹẹ è cheeche kú ọ ka ộ kụ̀ Ohomorihi ọnịrị ohinọyị ụhụ nị. Di ụ sị ọ jịnẹ tụ́ ẹhẹ, di è ne e ịrẹta dị à wụ ọ.” 11Ịzẹyịza dị ọdọvịdị ịnị ẹkụra eni eyi yẹ ana ra pè Ịnabọtị vavọọ mẹ anka Ijezebẹrị mẹ̀ tụ́ hi wa nị. 12Ẹ ka avaba aza ẹ sị awẹ, dị ẹ sị Ịnabọtị yaayịtẹ udi ọdọvịdị. 13Di aza kẹnẹ-kẹnẹ ẹyịva ẹnẹẹ vẹ, dị ẹ va yaayịtẹ pè Ịnabọtị nị. Dị ẹ yà eyi aza ana gụ, di e yee cheeche kú Ịnabọtị ka ộ kụ̀ Ohomorihi ọnịrị ohinọyị ụhụ nị. Di a sị Ịnabọtị jịnẹ hụụnị ẹkụra, di e ne e ịrẹta, di o sú nị. 14Ịjị ẹ sị ọ wụ, dị ẹ tụ́ ne tù Ijezebẹrị dị ẹ ka a si Ịnabọtị ne ịrẹta, o wusu.

15Ijezebẹrị mẹ̀ wụ́ ka a si Ịnabọtị ne ịrẹta, ô wusu, dị ọ na kà a yi Ahabị dị ọ ka, “kwẹẹtẹ dị wa na sị ụbazị Ịnabọtị Anijezirẹrị oni o yi ka ọnị ọ yị ná wu. Ịnabọtị ọ yị kụkụ yà ịzọọ, ô wusu.” 16Ahabị mẹ̀ wụ́ ka Ịnabọtị ô wusu, dị ọ kwẹẹtẹ di o si hu ee chi nọ ịnị ụbazị Ịnabọtị Anijezirẹrị ka ọnị ọ̀ na sị ọ nị.

Erija ọ na gẹrị Ahabị ịnị ụbazị ọnọọ

17Ịnị ụmẹ ọnọọ dị Ẹnẹyịmavara na kà a yi Erija ana vi Anitisibi dị ọ ka 18“Kwẹẹtẹ, di we chi na gẹrị Ahabị ana vi ohinọyị Anisirẹrị ana ra Ịsamarịya. Ọ na sị ngụ ịnị ụbazị Ịnabọtị, o si hu aa naa sị ụbazị ọnọọ, dị ọ̀ sị mẹ aanị. 19Wèe tù ịzọọ dị wụ kà a yọ ka, ‘Ẹnẹyịmavara kà wa kà a yọ ka ọ sị ọza wụ̀, ọ rẹ raà kụ́ ogu anị. Rẹ kà a yọ ka Ẹnẹyịmavara kà ịzị irezi yà rèé anya Ịnabọtị avọọ, ịzọọ irezi rẹ vaa yàa rèé anya anị bẹẹ nị.’ ”

20Ịjị Erija maanị na kà ụtụ yị Ahabị, dị Ahabị tụ́ ohi dị ọ ka, “We re si mi ree, ẹwụ ọnịvị amị?” Di Erija ka, “Hiin, me si wu re, agụvị ka wa sị ẹngụ awụ ná tụ́ ini ebira odivi ọnị waa mẹ ini eyi Ẹnẹyịmavara. 21Ẹnẹyịmavara kà wa yẹ ka ọnị aa kụ́ ịrẹyị odivi vee kú wu ịrẹsụ, dị ọnị sị wụ hụrẹ oze. Ọ kà avaba ezi ọnọrụ awụ vị ọnị vaa wụ̀ hụrẹ Isirẹrị, hi ozi, hi ọrịhị. 22Irehi awụ vị ọnị ọnị vaa mẹ anka irehi Ijerobowami ozi Ịnabọtị ọnịrị irehi Asa ozi Ahaya. Ọ kà ọnị vavọọ vaa mẹ agụvị ayị ọnị wụ mẹ kụ́ ọnị ọnịrị ebira odivi ọnị Anisirẹrị mẹ. 23#2 Ohi 9.36Ẹnẹyịmavara rẹ ka ma kà a yi Ijezebẹrị bẹẹ ka irezi ọ vaa rị oku Ijezebẹrị ini ozi Ijezirẹẹrị nị. 24Ọ kà aza Ahabị ene èe sú ịnị ẹkụra, vi oni irezi vaa rị oku anị. Ene èe ve ne sú hi ịnị avị vị ọnị ụba vaa rị oku anị.”

25Ịzẹyịza ẹ yị nyị ẹngụ Ahabị ana ahịka ộ ná ẹngụ anị tụ́ ini ebira odivi ini eyi Ẹnẹyịmavara. Ijezebẹrị ose anị ọ vavọọ aa tụ́ ọ ịrẹyị ka ọ̀ọ mẹ̀ ebira odivi nị.

26Ahabị ộ mẹ̀ ebira odivi ẹnẹmẹhị, ọnị ọ hyakụ hẹkẹ ori huna Anamọrị ẹnị Ẹnẹyịmavara dụ kwooze yị Anisirẹrị.

27Ahabị mẹ̀ maanị wụ́ ịrẹyị ẹnẹnị, dị ọ za ịta anị dị ọ nà a nị. Dị ọ sị ịta kú ẹngụ ọ́za oni oku sú avọọ, dị aa ba awẹ, dị ọ hụtụ tụ́ ịnị atịtọ nị. Di ahịka vị ọ kụkụ aa zi siisii nị.

28Ẹnẹyịmavara mẹ̀ vavọọ re e, dị ọ va na kà a yị Erija Anitisibi 29dị ọ ka, “Me re ka Ahabị ộ kà ẹngụ anị chi. Ka ộ maanị kà ẹngụ anị chi, mẹ yị kụkụ vaa kụ́ ịrẹyị odivi vee kú ọ ịrẹsụ ịnị ụmẹ aanị, ama ịnị ụmẹ ozi anị mị vaa kụ́ ịrẹyị ọnọọ vee kú irehi anị ịrẹsụ nị.”

Currently Selected:

1 Ohinọyị 21: EBTP

Highlight

Copy

Compare