1 Anịkọrịntị 6

Ẹ yị vọrọ ka ọdọwụ nịnị ẹ̀ẹ hị́ ẹngụụ ịrẹka

1Àa nyị ọza awụ nịnị ọnị ọnịrị ọdọwụ ọsa nyị ịrẹyị, ọ́ọ́ vọrọ ka ọ̀ sị ọ nọ ikootu ịdị aza ẹnẹ ẹ̀ yị vị Anikirisiti? Sị ẹ vẹ dị ẹ̀ẹ ma kụ́ ẹngụ ẹnịnị nọ ịdị aza Ohomorihi? 2Aanị ka wẹ yị vana yẹ nịnị ka aza Ohomorihi ẹ vaa mẹ̀ ọkarẹyị anẹhẹ nị? Ẹwụ nịnị ana vaa mẹ̀ ọkarẹyị anẹhẹ, wẹ́ yị va zụ mẹ̀ ọkarẹyị ịrẹyị eweyi-eweyi nịnị kẹnẹẹ? 3Mee ro ka wẹ́ yị vana yẹ nịnị ka ẹyaa vaa mẹ̀ ọkarẹyị anggẹẹrị nịnị nị? Sị ẹ kụkụ va yà ịnị ịsa ẹhẹ ọnọnị ọnị yẹ̀ yị zụ mẹ̀ ọkarẹyị anị? 4Agụvị avọọ, wàa vavọọ re ịrẹyị nịnị, asị ụ zẹẹ ka ahịka aza ẹnẹ ẹ̀ yị nyị ịsị ẹ zụ kà tụ́ ịnị ịrẹyị ịragụ Ohomorihi, ọ̀ mẹ ọkarẹyị anị yị wụ nịnị nị. 5Ho! Ụhị ọ mā nyị wụ nịnịị? Ẹ yị daba nyị ọyẹrẹyị ọnya ịnị ẹngụ awụ nịnị ana zụ mẹ̀ ọkarẹyị yị ọdọwụ ẹẹva? 6Ọdọwụ aa sị ọdọwụ ọsaa nọ ikootu, dị aza ẹnẹ ẹ̀ yị dọ wụ aa mẹ̀ ọkarẹyị yị wa. 7Ẹngụ ọnị ụ waa kụ́ụ nọ ikootu nịnị, ọ́ọ sị zụ ka wa raà sị ahị jị ọchị nyee nịnị. Àa vị ọza o sì wu ịrẹyị dị ụ sị ẹngụ dọ ọ nị, ọ́ọ vana dahi. Wàa rẹ dọ ka ọza ọ̀ mẹ wụ rị, ọ́ọ dahi. 8Ama ẹwụ nịnị ụvọta ọ hyakụ ee sì ẹngụ ịrẹyị, dị ụ raa mẹ ẹngụụ rị nịnị ịnị ụmẹ ana ahịka ọdọwụ ụ vị nịnị nị. 9Máa yẹ ka wáa yẹ nịnị kaakara ka ọza ẹnẹ ẹ̀ yị nyị ịzẹyịza, ọ yị vaa ngụ ịzị Ohomorihi yà aa mẹ ịjọva. Asị ụ vene ẹngụ awụ nịnị oo! Ọmụnọ nịnị ọnịrị aza ana aa hẹkẹ ori, beri ọsẹrẹka nịnị ọnịrị ọnọrụ nịnị anaā nọ ịdị ọnọrụ ọsa anka ọnẹẹ avọọ, 10beri oyi nịnị ọnịrị eneyọhụrẹ beri ohweche ahaahara nịnị ọnịrị aza eneē du ọza ịrẹsụ beri aza anaā sịị ụkataa dọ ọza ịsa, ẹ yị vaa ngụ ịzị Ohomorihi yà aa mẹ ịjọva. 11Ẹngụ ebira ẹnẹẹ aza ẹnyị awụ nịnịị̄ vịdịị mẹ nị. Ama Ohomorihi ọ sị ịvị awụ nịnị nyịna kwooze, ọ sị wụ nịnị nyị ka wa vị aza ọnịnị anị. Ini oze ịrẹha Ijeesu Ikirisiti Ananyị yị ọnịrị Ụhwẹ Ọnịnị, ọ raà jị ịhị yị wụ nịnị.

Waa sị ẹngụ awụ nịnịị sị ụbanyịị yị Ohomorihi

12 # 1 Ịkọ 10.23 Ẹ yị nyị ịsị ẹ za mị ka asị mị mẹ ịsị e zé mi eyi, ama ẹ yị vị avaba ịsa ọ zụ mẹ ọgụvọ yị mị. Ẹ yị nyị ịsị ẹ za mị ka asị mị mẹ ịsị e zé mi eyi, ama me yi sì ka à nyị ịsị e za mị ọrịhị. 13Aza ẹnyị ẹ zụ aa kà a ka: Áa mẹ̀ ịsọyịrị yị izinẹ, dị a rẹ mẹ izinẹ yị ịsọyịrị nị. Ịzẹyịza ọnọọ vị nị Ama Ohomorihi vaa mẹ ka ịsọyịrị ọnịrị izinẹ ẹ̀ ta. Ohomorihi ọ yị mẹ ọchẹngụ ọza yị ọza ka ọ̀ sịị sẹ̀ ịrẹkaa zị. Ama Ohomorihi vị ana mẹ ẹngụ ọza yị ọza ka ọ sịị hẹkẹ ọnị, dị Ananyị yị ọnị raa tẹsị ẹngụ ọza nị. 14Ohomorihi ọ raà ha Ananyị yị kwẹẹtẹ hụụnị isu, avọọ ọ mẹ rẹ vaa sị ụkata anịị ha ẹyịị kwẹẹtẹ hụụnị isu nị. 15Wáá yẹ ka ẹngụ ẹwụ nịnị rẹ vị ọchẹngụ Ikirisiti? Máá zụ sị ọchẹngụ Ikirisiti dị ma rẹ na vàa hura ọchẹngụ ọsẹrẹka? Asị Ohomorihi zẹẹ! 16#Oyn 2.24Mee ro ka wẹ yị yẹ nịnị ka ọza ọnị ọnịrị ọsẹrẹka ọ̀ọ sị và hura ka ọnịrị ọ kụkụ vị ọnya? Agụvị ka áa chẹrẹ tụ́ ini Iwe Ohomorihi ka: Ẹnị ẹyịva vaa vara ẹngụ ọnya. 17Ama ọza ọnị ọnịrị Ananyị yị ọ̀ọ sị vabẹ, ayị ọnya ẹ kụkụ nyị avọọ nị. 18Hụụnị ịrẹkọyịsẹ nịnị! Avaba ịvị ana vọ ọnị ọzaā mẹ, o mē si du ẹngụ anị ẹngụ. Ama ọza ana sẹ̀ ịrẹka, vị ana mẹ ịvị ọnọọ hi ẹngụ anị ụvọta. 19#1 Ịkọ 3.16; 2 Ịkọ 6.16Aanị ka wẹ yị yẹ nịnị ka ẹngụ awụ nịnị ọ vị irehi Ohomorihi ịzị Ụhwẹ Ọnịnị yà nị? Ụhwẹ Ọnịnị ọnọọ vị ana ra ịnịnẹ awụ nịnị; ịdị Ohomorihi ọ hụrẹ vẹ nị. Ẹ yị vị ẹwụ nịnị ọ nyị ẹngụ awụ. 20Ohomorihi ọ sị wụ nịnịị hị́, ọ sị ụta sí; agụvị avọọ wa kụkụụ sị ẹngụ awụ nịnịị sị ụbanyịị yị Ohomorihi.

Currently Selected:

1 Anịkọrịntị 6: EBTP

Highlight

Copy

Compare