1 Ịtọpa 9

Aza ana ra hi Ijerusarẹmị

1Â nyị ụmẹ ọnya, dị a chẹrẹ avaba Anisirẹrị nịnị Ovwoovu-ovwoovu nị. Â chẹrẹ wa tụ ịnị iwe ohinọyị Anisirẹrị nịnị. Â vịdị za Anijuda nịnị ọrịhị ne hi Ịbabịrọnị ka ẹ̀ na rị ụya ebira odivi ẹnịnị. 2#Ẹzị 2.27; Ine 7.73Anisirẹrị nịnị, ohirẹsụ irehi Ohomorihi nịnị, Anireevi nịnị, ẹnịrị aza ana aa mẹ̀ ụkọrọ ịnị irehi Ohomorihi ẹ vị ọnịpaapa ana vavẹ va ra ịnị ẹtẹ ẹnịnị, ẹkụra ẹnịnị nị. 3Anijuda nịnị, Anịbẹnjamịnị nịnị, Anehwireemi nịnị, ẹnịrị Anịmanasẹ nịnị vị ana na ra hi Ijerusarẹmị. 4Â nyị ọnọrụ ana aā hị́ Utayi ana vị ozi Amihudi, ohiku ana vọ ẹ vị Omiri, ọnịrị Imiri ozi Ibani nị. Utayi ọnọnị ọ vị ọdọvịdị ezi Ịpẹrẹzị ana vị ozi Ijuda nị. 5Ọnọrụ ana aā hị́ Asaya ọ vị ọdọvịdị ẹnị ezi Isera nị. Asaya ọnọnị ọ vị ọzọkụ ịnị ovwoovu ẹnịnị nị. 6Ijewuwẹrị ọ vị ọdọvịdị ezi Ịzẹra nị. Ịzẹra ọnị rẹ vị ozi Ijuda. Ẹnị ovwoovu akatarẹchẹhị ộ jị ẹẹwụ ha (690) hụụ ịrẹsụ Ijuda ẹ na ra Ijerusarẹmị nị. 7Aza ẹnẹnị ẹ vị Anịbẹnjamịnị ana na ra Ijerusarẹmị nị. Isaaru ana vị ozi Imesurami, dị ọ vị aazị Ihodaviya. Ẹmaazị Ịhasenuwa ọ vị nị. 8Ibineya ana vị ozi Ijerohami. Era ozi Uzi, dị ọ vị aazị Imikiri, ọnịrị Imesurami ana vị ozi Isehwatiya. Aazị Irewuwẹrị ọ vị nị, dị ọ vị ẹmaazị Ibinija. Ọzọza vị ọnịrị aza anị. 9Ovwoovu akana rị ẹchẹhị tụra ọ̀ jị ẹẹna ha ịnị ẹbẹẹta nị. Avaba ẹnẹnị vị ohirẹsụ ovwoovu-ovwoovu anka ohiku ọzọza. Ịbẹnjamịnị na ra hi Ijerusarẹmị nị.

Ohirẹsụ Irehi Ohomorihi ana ra hi Ijerusarẹmị.

10Ẹnị ohirẹsụ Irehi Ohomorihi ẹnẹnị ẹ ra hi Ijerusarẹmị nị: Ịjẹdaya, Ijehoyaribi, ọnịrị Ịjachịnị. 11Azarịya ana vị ozi Ihirikaya (ohirẹsụ ọbanyị ọ vị tụ ịnị irehi Ohomorihi nị) Ohiku-ohiku anị ana vọ ẹ vị, Imesurami, Ịzadọkị, Imerayoti, ọnịrị Ahitubi nị. 12Adaya, ozi Ijerohami ohiku-ohiku anị ana vọ ẹ vị Ipasihuri, ọnịrị Imarikija nị. Imaasayi ozi Adiyẹrị. Ohiku-ohiku anị ana vọ ẹ vị Ịjazẹra, Imesurami, Imesiremiti, ọnịrị Imeri, beri aza ẹnịnị. 13Ẹnị ohirẹsụ Irehi Ohomorihi ana vị ọdọvịdị abara-abara ệ gụ akahị tụra akana ộ jị ẹbẹẹva ha (1.760).

Anireevi nịnị ana ra hi Ijerusarẹmị

14Anireevi ẹnẹnị ẹ ra hi Ijerusarẹmị nị: Isemaya, ozi Ihasuvi ohiku-ohiku anị ana vọ ẹ vị Azirikami ọnịrị Ihasabiya hụụ ịrẹsụ Imerari. 15Ibakibakari, Iheresi, ọnịrị Ịgararị. Imataniya ozi Imika. Ohiku-ohiku anị ana vọ ẹ vị Izikiri ọnịrị Asahwi. 16Ọbadaya, ozi Isemaya, ohiku-ohiku anị ana vọ ẹ vị Igarari ọnịrị Ijedutuni. Ịbẹrẹkiya, ana vị ozi Asahwi, dị ọ vị aazị Ẹrịkana. Ịnị ẹtẹ Inetohwa ọ ra nị.

Aza enee sere irehi Ohomorihi ana ra hi Ijerusarẹmị

17Aza eneē sere irehi Ohomorihi ana ra hi Ijerusarẹmị yị: Ịsarọmị, Akubi, Ịtarịmọnị, ọnịrị Ahimanị. Ịsarọmị ọ vị ọdọvịdị ẹnịnị nị. 18Va ngụ ụmẹ ọnọọ, ịpa ịrẹsụ ẹnịnị vị ana á ku hi eyi ịzị ọyịị̄ zịị hụrẹẹ vẹ enoze oze ọbanyị ana na ngụ udi Anireevi nịnị nị. 19Â nyị ọnọrụ ana aā hị́ Ịsarọmị ozi Ikora; aazị Ebiyasahwi ọ vị nị, ọnịrị anda ẹnịnị eē sere ẹtẹ oze ọbanyị ana na ngụ ịnị Ajẹngụ ịzị Ẹnẹyịmavara yà nị. Avọọ gẹdẹ-gẹdẹ ohiku-ohiku ẹnịnị me vidiī sere ẹtẹ udi Ẹnẹyịmavara ịyẹẹyẹ nị. 20Â nyị ụmẹ ọnị Ihwinihasi ozi Eriyaza vịdị sị sị́ eyi pe wa. Ẹnẹyịmavara ọ̀ navọ ọ̀ yà pe e. 21Â nyị ọnọrụ ana aā hị́ Ịzakaraya ozi Imeseremiya. Ọnị ô re vịdị sere ẹtẹ enoze Ajẹngụ ịzị Ẹnẹyịmavara yà da. 22Aza ịrẹka tụra ẹwụrẹva á nyị ka ee sere ẹtẹ enoze ọnịrị ózee ọbanyị nịnị nị. Ẹnịnị vị ana a chẹrẹ hi ẹtẹ ẹkụra eweyi-eweyi ẹnẹ ẹ ra. Ohinọyị Idevidi ọnịrị Ịsamụwẹrị ọnịsẹ ẹ vịdị sị ụkọrọ ọnọnị chire ohiku-ohiku aza ẹnẹnịị ụvọ nị. 23Ẹnịrị ezi ẹnịnị e veneè yii sere ẹtẹ oze ọbanyị ana na ngụ ịnị irehi Ohomorihi nị. 24Â nyị oze ọbanyị ana va eyi ka eyi ẹbẹẹba ọnịrị eyi-ụvẹtẹ, dị a nyị ana rẹ va eyi ka eyi ọnị ọyịị̄ hụrẹẹ vẹ ọnịrị eyi ọnị ọyịị̄ zịị na ngụ ẹtẹ nị, ọzọza ộ nyị ohirẹsụ ene ee sere ẹtẹ ịzọọ. 25Anda oserẹtẹ ẹnẹnị aà gụ wa ụvọọ sere ẹtẹ nị. Ẹnịnị vị ana ra hi ịnị ẹkụra eweyi-eweyi ẹnịnị. Ọza ọnị ụkọrọ òo tu, dị ọ va mẹẹ. Ẹkụhị ịhịmba ọzọzaa vee sere ẹtẹ nị ụkọrọ òo tụ ọ nị. 26Ẹnị ẹyịna ana vị ohi-ohi oserẹtẹ aanị avaba ọda ụkọrọ ọnọnị yà ụvọ nị. Ẹnị ee sere aku-aku ene hi ini irehi Ohomorihi ọnịrị avaba ịsa á kụ́ hi ịzọọ nị. 27Ẹnịnị vị ana ra gụrị Irehi Ohomorihi agụvị ka ẹnị ee sere e nị. Ẹnị e reē na oze ọbanyị nịnị ẹnẹnẹ-ẹnẹnẹ nị.

Anireevi nịnị ana vọ

28Ẹnị Anireevi ana vọ e si eyi pe ẹnya ana a sịị̄ mẹ ahẹkẹ nị. Ẹnịnị ẹẹ̄ kụ waa hi ẹhẹ, dị ẹ rẹ kụ wa hi ini eehi ụmẹ tụra ụmẹ ene èee sii rò wa nị. 29Aza ẹnyị ịnị ẹnịnị vị ana sị eyi pe ẹnya ana vọ ana a sị tụ irenyi yị Ohomorihi, dị aza ẹnyị sị eyi pe ayị ọyịkwọ, eche, angwẹ orivi, eturare, ọnịrị avị agụ nịnị nị. 30Ama ohirẹsụ Irehi Ohomorihi nịnị eē po avị agụ ẹnẹnị nị. 31Â nyị Anireevi ọnya ana aā hị́ Imatitiya. Ọnị ọ vị ozi ọzọkụ Ịsarọmị nị. Anịrẹsụ Ikora ọ vị nị. Ọnị ọọ̄ jị ịsa a sịị̄ mẹ̀ ịsọvọ nị. 32Ẹnyị ịnị ezi Ikohati ẹẹ̄ mẹ ịbụrẹdị ụnarenyi ana a sịị̄ tụ ini Irehi Ohomorihi avaba ẹkụhị ụhwọtụ nị. 33Â nyị ovwoovu Anireevi nịnị ana ahịka ẹnị ẹẹ̄ mẹ aahẹ nị. Ọdọvịdị ovwoovu ẹnẹnị vị ana ra hi ịnị irehi ana da kara Irehi Ohomorihi. Ẹnịnị ẹ ma mẹ̀ ụkọrọ ọsa, agụvị ka ọọdụ ọnịrị ịrahụ vị ẹnẹ ẹẹ mẹ̀ ụkọrọ pooro. 34Aza ana á hị́ hi ẹbẹẹba aanị ẹ vị ohirẹsụ Ovwoovu-ovwoovu Anireevi nịnị nị hụrị ụnanka ẹnịnị nị. Ẹnị ẹ vị ọdọvịdị ana ra hi Ijerusarẹmị nị.

Ohiku-ohiku ohinọyị Ịsọọrụ ọnịrị Ezi anị

(1 Ịtọ 8.29-38)

35Â nyị ọnọrụ ana aā hị́ Ijeyẹrị. Ọnị ọ vị ọnịpaapa na ra ẹkụra ana aā hị́ Igibiyọnị nị. Ịrẹha ose anị ọ rị Imaaka nị. 36Ozi anị ana vị ọzọkụ ọ rị Avidoni nị. Ezi anị ana vọ ẹ rị Izuri, Ikisi, Ịbaarị, Ineeri, Inadavu, 37Ịgẹdọ, Ahiyo, Ịzakaraya, ọnịrị Imikiroti nị. 38Imikiroti ọ vị ada Isimeya nị. Ezi ẹnịnị vị ana ra gụrị anda ẹnịnị ana vọ hi Ijerusarẹmị. 39Ineeri ọ vị ada Ikisi nị, dị Ikisi vị ada Ịsọọrụ nị. Ịsọọrụ ộ ma ezi ọnọrụ ẹẹna ana aā hị́ Ijonatani, Imarichisuwa, Abinadabi, ọnịrị Ẹsibaari. 40Ijonatani ọ vị ada Ịmẹribi-Ịbaarị, ana vị ada Imika nị. 41Imika ộ ma ezi anọrụ ẹẹna. Ịrẹha ẹnịnị ẹ rị Ipitoni, Ịmẹrẹkị, Itareya, ọnịrị Ahazi nị. 42Ahazi ọ vị ada Ịjaara nị. Ịjaara ọ́ ma ezi ọnọrụ ẹẹta. Ịrẹha ẹnịnị ẹ rị Aremeti, Azimaveti, ọnịrị Izimiri. Izimiri ọ vị ada Imoza nị. 43Imoza ọ vị ada Eriisa, dị Eriisa vị ada Azeeri nị. 44Azeeri ộ ma ezi ọnọrụ ịhịnọnyị. Ẹnị aā hị́ Azirikami, Ibokeru, Isimẹrị, Iseriya, Ọbadaya, ọnịrị Ịhananị nị.

Currently Selected:

1 Ịtọpa 9: EBTP

Highlight

Copy

Compare