1 Ịtọpa 22

1Dị Idevidi ka, ịzọọ a vaa dà Irehi Ẹnẹyịmavara Ohomorihi tụ́ nị. Ọ kà ụta ana Anisirẹrị nịnị vaa mẹ̀ ịsọvọ ana aā rị ịra ọ vị ọnọọ nị.

Idevidi ô tenyi ẹngụ ọyị dà Irehi Ohomorihi

2Ohinọyị Idevidi ộ tụ ka à hị́ avaba azọga ana ra ịnị ẹtẹ Isirẹrị, dị ẹ̀ wara gụ. Dị ọ gà ụkọrọ yị wa nị. Ọ kà aza ẹnyị ẹnịnị ẹ̀ há ịrẹta hi ẹtẹ ana a vaa sị dà Irehi Ohomorihi. 3Ộ kụ enyusẹ tatarata vẹ ka à sị mẹ iso ọnịrị ịsa ana vaa sị za ọchị oze ọbanyị. Avọọ ọ́ mẹ̀ rẹ kụ enyusẹ ana aā hị́ ibironzi vẹ ana ahịka ọza ẹ yị zụ ngọ̀ nị. 4Ộ tụ́ ne tu Anitaya ọnịrị Anisidoni nini, dị ẹ kụ ọchị Isida tatarataa va yọ nị. 5Idevidi ô rò o, dị ọ kà, “Irehi Ohomorihi ọnị ozi emi Isoromọnị vaa dà vaa banyị ẹtẹẹtẹrẹ, dị ọ ngụrẹyị, dị ọ nyị ụbanyị eyi avaba anẹhẹ. Ama Isoromọnị ọ sị vị ozweyi, e yị nyị ịsa ọ yẹ. Agụvị avọọ, aa nyị ka me tenyi avaba ẹnya ana a vaa sị dà tịtẹ yọ.” Dị Idevidi nyayịnẹ kụ ẹnya irehi hi ẹtẹ tịtẹ tẹ̀ ẹ di o ve su nị.

Idevidi ộ kà yị Isoromọnị ka ọ dà irehi Ohomorihi

6Ộ tụ́ hị́ ozi anị Isoromọnị, dị ọ tụ́ ọ irenu ẹtẹẹtẹrẹ ka asị a nyị ka ẹ yị dà Irehi yị Ẹnẹyịmavara, Ohomorihi Anisirẹrị nịnị o. 7#2 Ịsa 7.1-16; 1 Ịtọ 17.1-14Idevidi ộ kà a yị Isoromọnị ka, oni ô sì ka ọnị ọ̀ dà irehi ana a vaa sị hị́ Ịrẹha Ẹnẹyịmavara, Ohomorihi anị. 8Ama Ẹnẹyịmavara ộ kà a yị ọnị ka ọnị ọ sị ọza wụ̀ baaba; ọnị ọ sị ịrẹkụ ẹnẹmẹhị kụ̀. Avọọ, Ẹnẹyịmavara kà ọnị ẹ yị vaa zẹẹ ka ọnị ọ̀ dà Irehi yị ọnị agụvị avaba aza ọnị ọnị raà mẹ ka à wụ. 9Ọ kà, ama Ẹnẹyịmavara ô wo otoo yị ọnị ka, ọnị vaa ma ozi ana vaa rị ohinọyị dị aa mẹ̀ ẹ ẹngwọọrọ-ẹngwọọrọ. Ẹnẹyịmavara kà ọnị vaa mẹ ka ọ̀ nyị ẹngwọọrọ ịnị ụvọ avaba ọnịvị anị. Ọ kà ịrẹha ozi ọnọọ ọ rị Isoromọnị nị, agụvị ka ụmẹ ọnị ọ́ vaa sị mẹ ohinọyị, ọnị vaa mẹ ẹngwọọrọ yị Anisirẹrị nịnị, dị ọnị mẹ ka à sị a nyị ịsị ẹ mẹ̀ wa. 10Ẹnẹyịmavara kà ozi anị ọnọọ ọ vaa dà Irehii yị ọnị nị. Ọ kà ozi anị ọ vaa vị nị, dị ọnị vị ada yọ. Ezi anị ịrẹma-ịrẹma ẹ vaa vị ohinọyị Isirẹrị pooro nị. 11Dị Idevidi kà a yị Isoromọnị ka, ẹwụ ozi, Ẹnẹyịmavara, Ohomorihi awụ ọ̀ yàa wụ ịrẹma o. Ọ̀ navọ ịsa ọnị wo oto anị ọ̀ va mẹ̀ ẹ, dị ụ wa va zụ dà irehi yọ o. 12Ẹnẹyịmavara, Ohomorihi awụ ọ̀ navọ eyi awụ o ve hu eyi, dị ọ sị ịrẹyọyẹ wụ dị wa va sị mẹ ohinọyị yị Anisirẹrị nịnị zị oze ọda anị. 13#Ijos 1.6-9Ọ kà Isoromọnị ọ̀ọ saasa avaba ọda ọnị Ẹnẹyịmavara sị tu Imosiisi hi Anisirẹrị nịnị, vị o vee zee yọ nị. Ọ̀ sị tụ ọtụtụrụma, dị ayị anị ọ̀ nẹtẹ. A sị ọ zẹẹ ka ịsa ọnyọọnyị o chire ọnị angwa. 14Ọ kà àa vị ịrẹyị Irehi Ohomorihi ọnọọ yọ, ọnị ộ sị vụrị ọnị ộ kụ igooru ịtọọnị akahị-akahị oze akawụ-akawụ oze ẹwụrịhịmba (34,000 tons) hi ẹtẹ yọ ana a vaa sị dà irehi ọnọọ. Ịrẹma ẹsẹnị, enyusẹ ana vọ vị ana gwẹtẹ kẹnẹ. Ọnị ọ kụ ọchị ọnịrị ịrẹta tenyi tịtẹ, ama aa nyị ka ò sì tụ ọ. 15Idevidi ka Isoromọnị ộ nyị aza ana aa mẹ̀ ụkọrọ hi ẹtẹ. Â nyị aza ana vaa há ịrẹta; â nyị aza anaā sịị ịrẹtaa tụra irehi ọnịrị ikahunta nịnị hi ẹtẹ. Avọọ a mẹ̀ rẹ nyị ọnụkọrọ ụvọ irenyi-irenyi ana zụ mẹ̀ ụkọrọ nị. 16Ẹ nyẹngụ sị igooru ọnịrị isiriva beri enyusẹ ana vọ mẹ ụna. Ọ kà Isoromọnị ò ne nyima ụkọrọ ọnọọ booro aanị. Ẹnẹyịmavara ọ̀ navọ ọ̀ yà a ịrẹma. 17Dị Idevidi kà a yị ẹnị ọdọvịdị Anisirẹrị ka ẹ̀ gụ Isoromọnị ụvọ nị. 18Ộ kà a yị wa ka, Ẹnẹyịmavara Ohomorihi awụ nịnị yà a wụ nịnị ịrẹma, dị ọ raà mẹ ẹngwọọrọ yị wụ nịnị zi eyi ụvọnị-ụvọnị nị. Ọ kà ộ mẹ̀ ka ọnị ọ̀ nyị ẹbẹẹba avaba aza ana vịdị ra ịnị ẹtẹ ọnọnị. Aza ẹnẹ kụ vị ezida ẹnịnị ọnịrị ezida Ẹnẹyịmavara ọyaanị. 19Ọ kà ọyaanị, ẹnịnị ẹ̀ naa sị avaba ayị ẹnịnị ọnịrị ẹhẹ ẹnịnịị hẹkẹ Ẹnẹyịmavara Ohomorihi ẹnịnị. Ọ kà ẹnịnị è nyima ẹẹ dà irehi Ohomorihi ọnọọ booro aanị, ụvị dị ẹnịnị ẹ̀ sị apoti oto Ẹnẹyịmavara ọnịrị avaba ẹnya Ohomorihi ana vọ ana a sịị mẹ ahẹkẹ tụ́ ịnị anị.

Currently Selected:

1 Ịtọpa 22: EBTP

Highlight

Copy

Compare