1 Ịtọpa 19

Idevidi ộ nyị ẹbẹẹba Anamọnị ọnị Anisiriya nịnị

(2 Ịsa 10.1-19)

1Â nyị ụmẹ ọnya, ọnị Inahasi ohinọyị Ámoni sị su. Dị a sị ozi anị Ihanuni dọ ọ ịrẹsụ ka ọ̀ vị ohinọyị nị. 2Ohinọyị Idevidi ộ kà a ka, â vọrọ ka ọnị ọ̀ mẹ ọyịza hi Ihanuni ozi Inahasi, agụvị ka ada anị ộ vịdị mẹ ọyịza hi ọnị. Dị Idevidi va tụ aza ka ẹ̀ na kụ́ ọ nyarị ọ nị. Ịjị aza Idevidi ve tu Ihanuni, ịnị ẹtẹ Amọnị ka ẹnị ẹ va kụ́ ọ nyarị ọ, 3dị, ẹnị ọdọvịdị Anamọnị nịnị kà a yị Ihanuni, ohinọyị ẹnịnị ka ví ó ro ka vị Idevidi vavọọ sị ụbanyị yị ada anị, ọnị ọ́ sị tụ aza ẹnẹnị ka ẹ̀ va kụ́ ọ nyarị ọ nị? Ẹ ka, heyiye de! Vị Idevidi tụ aza ka è wèrè ve re ẹtẹ tịtẹ dị ọnị ọ va kụ́ ịrẹkụ va rị ọ nị. 4Ihanuni ộ za aza oni Idevidi tụ ụtụ aanị dị ọ̀ kụ́ wa ịrẹwa, dị ọ dà wa ịta ịpa iruvo ẹnịnị, dị ọ dụ wa nị. 5Ọ sị wa dụ, ama ẹnịnị ẹ yị nyayịnẹ va nọ eehi agụvị ụhị aa nyị wa. Ịjị Idevidi wụ ịsị ana mẹ, dị ọ tụ na kà a yị aza ọnị ọ́ tụ ụtụ aanị ka ẹnịnị ẹ̀ yà Ijeriko pooro dị ịrẹwa ẹnịnị è hi, dị ẹ̀ va vavẹ nị. 6Ohinọyị Ihanuni ọnịrị avaba Anamọnị ệ yẹ ka ẹnị ẹ raà hị́ Idevidi ịrẹkụ tu ẹngụ ẹnịnị. Dị ẹnịnị sị isiriva ikirogirami akahị-akahị oze ẹwụrịhịmba (100), dị ẹ sị na dọ ụkẹkẹ ịrẹkụ ọnịrị aza anaā sịị ụkẹkẹ ịrẹkụụ kụ̀ ịrẹkụ hụrẹ ẹtẹ Imesopotamiya nị. Ẹ́ rẹ haya aza ọnịrị ẹnya hụrẹ ịzị aā hị́ Imaaka ọnịrị Izoba ịnị ẹtẹ Isiriya. 7Ụkẹẹkẹ ịrẹkụ ẹnẹ ẹ na dọ vị akawụ-akawụ oze ẹwụrịhịnọnyị (32,000). Dị ẹnịrị isoja ọnị ohinọyị ẹtẹ Imaaka kụ ka ẹ̀ va ịnị ọgụvọ vẹ, dị ẹ va jị udi tụ ọ̀ sị gụrị ịzị aā hị́ Imedeba nị. Anamọnị nịnị ẹnị ệ rẹ kwẹẹtẹ hụrị udi ẹnịnị, dị e tenyi ẹngụ ịrẹkụ nị. 8Ịjị Idevidi wụ́ avaba ịsa ana aa na, dị ọ ka Ijowabi ọnịrị avaba isoja anị ẹẹ kwẹẹtẹ nị. 9Anamọnị nịnị ệ kwẹẹtẹ ịrẹkụ, dị ẹ na jẹẹ enoze ẹtẹ Ịraba nị. Ịzọọ ọ vị ohyẹtẹ ẹkụra ẹnịnị nị. Ẹnị ohinọyị ana vẹ ịnị ọgụvọ Ihanuni ẹnị ệ re ne tenyi jẹẹ ini orere. 10Ijowabi ô re ka a sị ịrẹkụ gu jẹ ee zị ọnị ọvịdị ọnịrị ịrẹma, dị ọ tọ̀ ọkọọka isoja Anisirẹrị ka ẹẹ nọ ịrẹkụ Anisiriya nịnị nị. 11Ộ kà a yị ọyịnyara anị Abisayi ka ọ̀ vị ọdọvịdị isoja anị ana vọ. Abisayi ọ kụ isoja ẹnẹẹ ka ẹẹ nọ ịrẹkụ Anamọnị nịnị nị. 12Ijowabi ộ kà a yọ ka, Ịjị òo re ka ụvọ Anisiriya nịnị aa kara ọnị dị ọ̀ va gụ ọnị ụvọ ọ; àa va vị ọnị o re ka ụvọ Anamọnị nịnị aà kara a nị, ọnị vaa vẹ vaa gụ ọ ụvọ. 13Ijowabi ka Abisayi ọ̀ sị tụ ayọvị, dị ọ̀ vẹ ẹnị ẹ̀ sị ọtụtụrụma kụ̀ ịrẹkụ ọnọnị agụvị anda ẹnịnị ọnịrị agụvị ẹkụra Ohomorihi ẹnịnị Ẹnẹyịmavara òo me yi sì ọ kẹnẹ, ọ̀ vavọọ mẹ̀ ẹ. 14Ijowabi ọnịrị isoja anị aà kà a pe Anisiriya nịnị kẹnẹ, dị ẹnịnị và tụ echi nị. 15Ịjị Anamọnị nịnị re ka Anisiriya nịnị ee zwè, dị ẹnị re zwè yị Abisayi, dị ẹ varẹma ne hi ịnị ẹkụra ẹnịnị nị. 16Anisiriya nịnị ê re ka Anisirẹrị nịnị e reè huna ẹnị, dị ẹ na kụ isoja hụrẹ akaha irehu Iyuhwuretisi, eyi ọnị ọyịị̄ zịị vẹ ịnị ẹtẹ Isiriya nị. Ệ kụ isoja ẹnẹẹ va yị ọnọrụ ana aā hị́ Isobaki. Isobaki ọnọnị ọ vị ọdọvịdị isoja Ihadadeza, ohinọyị ẹtẹ Izoba nị. 17Ịjị Idevidi maanị wụ́, ộ kụ isoja Anisirẹrị nịnị, dị ẹ jịnẹ irehu Ijodani nị. Ẹ raà jịnẹ irehu Ijodani, dị ọ ka ẹ̀ và eyi ka Anisiriya nịnị nị. Dị ịrẹkụ nyima ọgọnị nị. 18Anisirẹrị nịnị ệ dụ Anisiriya nịnị, dị Idevidi ọnịrị aza anị wụ̀ isoja Anisiriya nịnị, dị Idevidi ọnịrị aza anị wụ̀ isoja Anisiriya nịnị akahị-akahị oze ẹẹta tụra akahị nị (7,000). Ẹnịnị ệ rẹ wụ ọdọvịdị isoja Anisiriya nịnị bẹẹ. 19Ịjị ẹnị ohinọyị ọnị Ihadadeza vịdị aa mẹ ohii tụra sị yẹ ka Anisirẹrị nịnị e reè huna ẹnị, dị ẹ na, dị ẹnịnị Idevidi tangwa ne tenyi ịrẹyị ẹnịnị nị. Dị Idevidi kụkụ aa mẹ ohii yị wa nị. Hụrị ụmẹ avọọ Anisiriya nịnị ẹ yị vana dọ ka ẹnị ẹ̀ na mẹ ọgụvọ yị Anamọnị nịnị.

Currently Selected:

1 Ịtọpa 19: EBTP

Highlight

Copy

Compare