1 Ịtọpa 13

Â sị apoti oto Ẹ́nẹyịmavara vavẹ Ijerusarẹmị

(2 Ịsa 6.1-11)

1Ẹkụhị ọnya, Idevidi ộ hị́ ọga isoja anị nịnị ọnị ọ che hi uche akahị ọnịrị uche ẹchẹhị, dị ọnịrị wa sị eyi gẹ nị. 2Dị Idevidi kà a yị avaba Anisirẹrị nịnị ka: òo zee wa eyi, dị ọ rẹ vị oyisì Ẹnẹyịmavara Ohomorihi ẹnịnị, beri ẹnị ohirẹsụ Irehi Ohomorihi nịnị, ọnịrị Anireevi nịnị aha tụra aha ene èe hi, ka è ve tu ẹnị ịzẹnị. 3Ọ kà ẹnị ve nee sì apoti oto Ohomorihi ẹnịnị dị ẹnị ẹ̀ sị ọ vavẹ agụvị ka ụmẹ Ịsọọrụ vị ẹnẹ ẹnị sị eyi wụ ọ. 4Ịrẹyị ọnọnị ộ gẹ ini eyi avaba aza ana gụ, dị ẹnịnị vavọọ dọ nị. 5#1 Ịsa 7.1,2Idevidi ộ kụ avaba Anisirẹrị nịnị gụ hụrẹ eyi ụvẹtẹ ẹhwị ẹtẹ Ijipiti na ngụ oze ana aā zị ngụ ịzị aā hị́ Ihamati. Dị ọ ka à na sị apoti oto Ohomorihi hụrị ẹkụra ana aā hị́ Ikiriyati-Ijeyarimi nị. 6#Kụra 25.22Dị Idevidi ọnịrị avaba Anisirẹrị nịnị nọ ịzị aā hị́ Ịbaara, ana aā rẹẹ̄ hị́ Ikiriyati-Ijeyarimi nị. Ịzọọ vị ana yà ịnị ẹtẹ Ijuda; dị ẹ ka ẹnị aa naa sị apoti oto Ohomorihi nị. Ohomorihi ọnọnị aā hụ́ Ẹnẹyịmavara ana yaatụ ịnị aga ohinọyị anị ịnị akakana icherubi nịnị nị. 7Dị ẹ sị apoti oto Ohomorihi ọnọnị hụụ ịnị irehi ọnọrụ ọnya ana aā hị́ Abinadabi nị. Ẹnịnị ệ sị ọ tụ ịnị ụkẹkẹ ọ nyị ahụ ẹẹna, dị ahịka aza ẹnị ẹẹva ana aā hị́ Uza, ọnịrị Ahiyo ẹyaa zụ̀ ụkẹkẹ ọnọọ oze nị. 8Dị Idevidi ọnịrị avaba Anisirẹrị nịnị sị ụmẹzụ-ụmẹzụ aa mẹ aahẹ ọvịdị Ohomorihi nị. Ẹnịnị aa jị ahẹ, di eyee hú ịsa irenyi-irenyi anka ịkakanchị, ọkangga, okokoro, ịjabana, ịchacha, igita irenyi-irenyi ọnịrị ẹnya isohu ana vọ, dị ẹyaa nyị ẹzẹ nị. 9Ịjị ẹ va sị ngụ ịnị ụkọ ana yà ịzị aā hị́ Ichidoni, dị ụnọ ene ee tura ụkẹkẹ ana a sị apoti oto Ohomorihi aanị vangga nị. Dị Uza ụsẹ na za apoti oto ọnọnị nị. 10Obooboro ọnọọ, dị Ẹnẹyịmavara kụ ayị hi Uza nị. Ộ yà a arụhwẹ, dị ọ wụ̀ ọ nyẹtẹ nị agụvị ka ộ sị ụvọ kanyị apoti oto ọnọọ. 11Ayị ộ kụ Idevidi ẹtẹẹtẹrẹ agụvị ka Ẹnẹyịmavara ộ maanị sị ụya rị Uza. Ịzọọ á vanaa hị́ Ịpẹrẹzị Uza pooro ve tu ajịnị nị. 12Ịhị ọnọọ angwa Ohomorihi ô hí Idevidi; dị ọ ka, sị́ ẹ zụ mẹ ka ọnị ọ̀ sị apoti oto ọnọnị ve pe ẹngụ tụ ịnị eehi? 13Agụvị avọọ, dị Idevidi ẹ yị sị ọ ngụ ịnị ẹkụra anị ne pe ẹngụ tụ ini eehi nị; ama dị ọ sị ọ na tụ ini eehi ọnọrụ ọnya ana aā hị́ Obẹdị-Edomi nị. Anigiiti ọnọrụ ọnọnị vị nị. 14#1 Ịtọ 26.4,5Apoti oto Ohomorihi ọnọnị ộ yà ịnị eehi Obẹdị-Edomi mẹ ụhwẹ ẹẹta; dị Ẹnẹyịmavara nyayịnẹ mẹ ọyịza yị avaba aza ene hi ini eehi Obẹdị-Edomi, ọnịrị avaba ịsị ọ nyị nị.

Currently Selected:

1 Ịtọpa 13: EBTP

Highlight

Copy

Compare