1 Ịtọpa 11

Idevidi ộ rị ohinọyị Isirẹrị ọnịrị Ijuda

(2 Ịsa 5.1-5)

1Avaba Anisirẹrị ệ kụ ẹngụ gụ, dị e ne tu Idevidi ẹtẹ Ihebirọnị nị. Dị ẹ kà a yọ ka, ẹnịrị ọ vị anda ẹngụ nị. 2Ẹ ka ịyẹẹyẹ ọnị Ịsọọrụ hyakụ vị ohinọyị ẹnịnị, Idevidi ọọ̄ dọ ọvịdị ẹnị Anisirẹrị nọ ịrẹkụ nị; dị Ẹnẹyịmavara Ohomorihi anị kà a yọ ka ọ vaa dọ ọvịdị aza anị, dị ọ vị ohinọyị ẹnịnị nị. 3Ẹ ka agụvị avọọ ẹnị azọkụ-azọkụ Anisirẹrị ve tu ohinọyị Idevidi Ihebirọnị nị. Idevidi ọnịrị wa ệ hị́ eku yị ẹngụ Ihebirọnị ọvịdị Ẹnẹyịmavara, dị ẹnịnị vị angwẹ orivi hi Idevidi ịrẹsụ, dị ẹ sị ọ rị ohinọyị Isirẹrị, anka Ẹnẹyịmavara mẹ vịdị kà a ka Ịsamụwẹrị ọ̀ kà a nị.

Idevidi ộ dọ Ijerusarẹmị

(2 Ịsa 5.6-10)

4 # Ijos 15.63; Ọdọ 1.21 Idevidi ọnịrị avaba Anisirẹrị ệ kụ́ ịrẹkụ nọ Ijerusarẹmị. Ijebusi â hị́ ọ ịjọnọọ nị. Anijebusi nịnị ẹyị ra ịzọọ ụmẹ avọọ nị. 5Anịjebusi nịnị ệ kà a yị Idevidi ka é yi yee re oze ngụ Ijerusarẹmị ịnẹ nị. Ama Idevidi ộ dọ wa ịzị ẹẹ̄ tẹ̀ẹ hi; ịzọọ ọ vana vị ẹkụra ọnị Idevidi yà nị. 6Idevidi ộ kà a yị Anisirẹrị ka, ọnịpaapa ana àa wụ Anijebusi ọnya, ọ vaa vị ọdọvịdị isoja anị nị. Ijowabi ozi Izeruya ọ va vị ọnịpaapa ana mẹẹ nị, dị a sị ọ mẹ ohirẹsụ isoja nịnị nị. 7Ịzị áa tẹ aanị Idevidi ra nị; agụvị avọọ, dị á kụkụ aa hị́ ịzọọ ẹkụra Idevidi nị. 8Idevidi ộ jị ọvọ kara avaba ẹkụra ọnọọ hụrị ịzị aā hị́ Imiro, dị Ijowabi ọnị tenyi avaba ịzị ẹ vọ ịnị ẹkụra ọnọọ nị. 9Idevidi vị ana vanaa nyị ụbanyị hu avọ hu avọ, agụvị Ẹnẹyịmavara Ochẹtẹẹngụ ộ yà à ịrẹma.

Ẹnị Isoja Idevidi ọkọọka ẹẹta

(2 Ịsa 23.8-17)

10Aza ẹnẹnị ẹ vị ọkọọka ini isoja Idevidi nị. Ẹnịrị Anisirẹrị ana vọ ẹ gụ Idevidi ụvọ ka ọ̀ vara ohinọyị anka Ẹnẹyịmavara mẹ̀ vịdị kà a nị. Ẹnị ẹ mẹ ka ohinọyị Idevidi ọ̀ nyị ụkata ụmẹ anị nị. 11Ọnịpaapa ịnị ẹnịnị ọ vị Ijasobimi ana vị Anihakimoni nị. Ọnị ọ vị ọdọvịdị ẹnị ẹyịta nị. Ộ sị ọha pe aza ẹnị ịrẹkẹẹchẹhị kụ́ ịrẹkụ ụpẹ ọnya, dị ọ wụ̀ avaba ẹnịnị nị. 12Eriyaza ozi Idodo ọ và tụra a ịnị ẹnị ẹyịta nị. Ozi Aaho ọ vị nị. 13Ộ saasa Idevidi ne pe Anihwirisiti nịnị kụ̀ ịrẹkụ ịzị aā hị́ Ipasi-Idamimi. Ộ yà ịnị aarẹ ịzị a kụ́ ibaari hi dị Anisirẹrị nịnị ee zwè. 14Ama dị ọnịrị aza anị jẹẹ ịnị akakana aarẹ ọnọọ, dị o pe Anihwirisiti nịnị kụ ịrẹkụ nị; dị Ẹnẹyịmavara mẹ ka è huna Anihwirisiti nịnị ẹtẹẹtẹrẹ nị. 15Ẹkụhị ọnya, ẹnị ẹẹta ịnị ẹnị isoja ohurẹẹwụ ana aā dọ ọvịdị ẹnịnị, ệ nọ ịrẹsụ ịda ịzị Idevidi yà, ọ̀ sị gụrị ụtẹha. Ụmẹ avọọ â nyị isoja Anihwirisiti nịnị ana jị udi tụ inozi Irehwayimi. 16Ụmẹ avọọ gẹdẹ-gẹdẹ, Idevidi yà ịnị ataba ịzị ọ tẹ̀, dị á nyị Anihwirisiti ene ne hi Ịbẹtịrẹhẹmị nị. 17Eyi eehi aa tụra Idevidi, dị ọ ka, àa yẹ oni ò re ọza na dà enyi hụụnị ịkangga ana ya oze ọbanyị ana na ngụ Ịbẹtịrẹhẹmị va yị ọnị. 18Dị ẹnị isoja ọkọọka ẹyịta ẹnịnị sị ụkata-ụkata ha udi Anihwirisiti nịnị ịnẹ na parahu, dị ẹ dà enyi hụụnị ịkangga ọnọọ va yị Idevidi nị. Ama Idevidi ô yi ka oni e yi hú; dị ọ sị mẹ̀ ịsọvọ yị Ẹnẹyịmavara, dị ọ và a hi ẹtẹ nị. 19Idevidi ka, oni e yi zụ hú ẹngụ enyi ọnọnị, agụvị ka vị́ ọ sị mẹẹ anka aza ẹnẹnị ana sị ịrẹsụ dọ isu avọọ nị. Agụvị avọọ, dị o yi ka oni e yi hú ọ nị. Ịsa ọnị isoja ọkọọka ẹyịta ẹnẹnị sị ayọvị mẹ yị.

Isoja ohurẹẹwụ

(2 Ịsa 23.18-39)

20Ijowabi ộ nyị ọyịnyara ọnya ana aā hị́ Abisayi, ọnị ọ vị ọdọvịdị isoja ohurẹẹwụ ẹnẹnị nị. Ộ sị ọha pe isoja ịrẹkẹẹchẹhị kụ́ ịrẹkụ, dị ọ wụ̀ wa nị. Ịsị ẹ sị ọ ngụrẹyị ịnị akakana ẹnị isoja ohurẹẹwụ ẹnẹẹ ọ vị ọnọọ nị. 21Ọnị ọ ngụrẹyị hu ịnị ẹnị isoja ohurẹẹwụ ẹnẹẹ nị, ẹnị ọ vara ọdọvịdị ẹnịnị nị. Ama ẹ yị ngụrẹyị anka ẹnị ọkọọka ẹyịta ọsa. 22Â nyị ọnọrụ ọnya ana aā hị́ Ịbẹnaya, ozi Ijehoyada; hụrị ẹtẹ Ikabizeeri. Isoja ene eyi yẹ ọ vị nị. Ịsa ọrụrụ ọ sị ayọvị mẹ nị. Ộ wụ̀ isoja Animowabi ẹẹva. Â nyị ụmẹ ọnị ọ sị ngụ ụsị ụmẹ ẹtẹ ohunẹnẹ obobooro, dị ọ na wụ idu nị. 23Ộ rẹ wụ Anijipiti ọnya aanị. Anijipiti ọnọọ ộ hụ ẹtẹẹtẹrẹ. Ộ gọdọ ẹ̀hụ imita ẹẹva avọọ. Ọha ọnị ọ sị rị ụvọ ộ dẹngụ ẹtẹẹtẹrẹ. Ọkụkụ Ịbẹnaya sị pe e kụ́ ịrẹkụ, dị ọ dọ ọ ọha anị, dị ọ sị wụ ọ nị. 24Ịsa ẹnẹnị Ịbẹnaya sị ayọvị mẹ nị. Ọnyara ọ vị ịnị isoja ohurẹẹwụ ẹnẹẹ nị. 25Ịrẹyị ọnịnya vị irenyi ịnị ẹnị ohurẹẹwụ ẹnẹẹ, ama ẹ́ yị ngụrẹyị anka ẹnị ọkọọka ẹyịta ọsa. Ọnị Idevidi sị mẹ ọdọvịdị aza ene ee sere ọnị nị. 26Aza ẹnẹnị ẹ vị ohi-ohi isoja Idevidi nị: Asahẹrị, ọyịnyara Ijowabi, Erihanani ozi Idodo ana vị Anịbẹtịrẹhẹmị, 27Isamoti ana vị Aniharodi, 28Iherezi ana vị Aniperoni, Iira ozi Ikeesi ana vị Anitekowa. 29Abiyezeri ana vị Ananatotu, Isibekayi ana vị Anihusa, Irayi ana vị Anahohi. 30Imaharayi ana vị Aninetohwa, Ịhẹrẹdị ozi Ibaana, ana vị Aninetohwa. 31Itayi ozi Iribayi, Anigibiya ọ vị nị, dị ọ vị ozi Ịbẹnjamịnị nị. 32Ịbẹnaya ana vị Anipiratoni; Ihurayị hụrị okuha Ịgaasị, Abiyẹrị ana vị Anaribati. 33Azimaveti ana vị Anibaharumi; Eriyaba hụrị Isaariboni 34Ihasemi ana vị Anigizoni; Ijonatani ozi Isagee, ana vị Anịhararị. 35Ahiyami ozi Iisaka, Anịhararị ọnị rẹ vị nị. Erihwari ozi Ọọ 36Ihehwẹrị ana vị Animecherati; Ahija ana vị Aniperoni. 37Iheziro ana vị Anikamẹrị, Inaarayi ozi Ezibayi, 38Ijowẹrị ọyịnyara Ịnatanị, Imibiha ozi Ihagiri, 39Ịzẹrẹkị ana vị Anamọnị, Inaharayi ana vị Anibeeroti, ọza anaā za ẹnya ịrẹkụụ gụ Ijowabi ozi Izeruya nị. 40Iira ana vị Anitiri, Igarebi ana vị Anitiri; 41Uriya ana vị Anihiti; Izabadi ozi Ahirayi. 42Adina ozi Isiza, ovwoovu Irubẹnị ọ chị hụrẹ nị, ọdọvịdị ọ vị ini ezi Irubẹnị nị, beri aza ẹnị ohurẹẹwụ ọsa. 43Ihanani ozi Imaaka, ọnịrị Ijosahwati ana vị Animitina, 44Uziya ana vị Anasiterati; Ịsama ọnịrị Ijeyẹrị; ẹnịnị ị ezi Ihotami ana vị Anaroyeri, 45Ijediyayeri ozi Isimiri, ọnịrị Ijoha ọyịnyara anị; ẹnịnị vị Anitiizi. 46Eriyẹrị ana vị Animahavi, ọnịrị Ijeribayi, vaka Ijosaviya; ẹnịnị vị ezi Erinaamị. Itima ana vị Animowabi. 47Eriyẹrị, Ọbẹdị, ọnịrị Ịjaasiyeri hụrị Izoba.

Currently Selected:

1 Ịtọpa 11: EBTP

Highlight

Copy

Compare