ĀCƐ URÓM 3
3
Upɔ́lu tá ācɛ abɔ̄ kwu ínoōbīya
1Ɔwɛ nyá nɛ̄ ācɛ Ujíyu bī le fíyɛ́ aílɔ́wá mɛ́ɛ̄ ā? Amáŋ ɔdā olɔhi nyá nɛ̄ apī nɛ̄ ācɛ Ujíyu hɛ́ ā yá lɛ uwá ā? 2Ó yá ɔdā olɔhi alɛwa abɔ̄ dóódu. Ohígbū ka aflɛ́yí, Ɔwɔicō kwú olɛhɔ̄ ā ú le ācɛ Ujíyu kéē le ɔ́ tū. 3Amáŋ ɔ́dāŋ ka ācɛ ōhī kú uwā í kē cɛ̄ɛ̄lā ŋ́ bɛ́ɛ? Ɔ́ɔmā le ka Ɔwɔicō í tōō lɔtūce ŋ́ kɛ̄ɛ? 4#Aíjē 51.4Ó lɛ ɔwɛ ŋ́! Aá kē jé ka Ɔwɔicō ī ka ɔkwɛ̄yi eko dóódu, nááná nɛ̄ ɔ̄cɛ dóódu ī kɛ̄mgbɛ̄ ā. É tá ɔ̄ ipú ɛlɔ̄ɔwɔicō kahíníī,
“Ká ācɛ kéē mafú ka ákú uwɔ ā le kpaakpa á eko nāa ī kɛlā. A kē ī yá káā lɛ ɛpɔ̄hi lé eko nēe ī kɛpɔ̄ tū uwɔ.”
5Amáŋ ɔ́dāŋ ka ɔdōbɔ̄bí nɛ̄ alɔ gē yá ā, gē mafú péee ka Ɔwɔicō yɔ̄ ī yá ɔdā okpaakpa ā, Alɔ lɔfú ka Ɔwɔicō yá ɔdōbɔ̄bí eko nōó le alɔ yá italā nɛɛ? (Ɛ̄nyā wɛ ɔ̄kā kú ɔ̄cɛ ɔlamu nɛɛ n.) 6Áafú nyā í lɛyí ŋ́! Ohígbū ka ɔ́dāŋ ka Ɔwɔicō í gē kɛpɔ̄ ɔkwɛ̄yi ŋ́, ó lɛ ā ɔwɛ nyá nōó géē kɛpɔ̄ tū ācɛ kú ɛcɛ ā glá ā. 7Amáŋ ɔ̄cɛ í jé ŋ́ n gē yá ɔdōbɔ̄bí. Aá gbɛlá ka ɛ̄nyā í yá kú ācɛ kéē lɛ ojīlīmā ce Ɔwɔicō fíyɛ́ ŋ́ nɛɛ? Ohígbū ka ācɛ géē má ɔ̄ péee ka Ɔwɔicō gē yá ɔdōlɔhi. 8Abɔ̄ ó le lɛ ā, ācɛ ōhī gē táafú ka, aá kóō yá ɔdōbɔ́bí kóō lɛbɛ̄ɛka ɔwɛ o lɛ ojīlīmā ce Ɔwɔicō ā. Ācɛ ōhī le ɛcá cá um ɔkwɛ̄yi, é le ije cē bá um ka ami ɔ́ɔ bī ɛlā nyā tɔ́ɔna piíí á! Ɔwɔicō kóō lɛ uwá ŋmɛ́pɔ̄bí, ɛdɔ nōo cíkā lɛ uwá āa.
Ɔ̄cɛ dúú í gē yá ɔdā olɔhi ŋ́
9Ɔdí mɛ́ɛ̄ ā? Alɔ nēe wɛ ācɛ Ujíyu bá lɔhi fíyɛ́ ācɛ ɔhá nɛɛ? Ó lɛ ā fúlufúlu ŋ́. Ohígbū ka n tɛtɛ lɛ ɛlā kpóce ācɛ Ujíyu mɛ́mla aílɔ́wá ka ínoōbīya kwu odúúdú uwa ɔtū. 10#Aíjē 14.1-3; 53.1-3Ɛ́gɛ́nɛ̄ é tá ɔ̄ lɛ ā,
“Ɔ̄cɛ dúúmā í le kpaakpa tū Ɔwɔicō ŋ́,
ó kōō wɛ ɔ̄cɛ ékpónú ŋ́. 11Ɔ̄cɛ dúúmā í jɛ́yí ɔdā nōo le kpakpa ŋ́,
ɔ̄cɛ dúúmā í dɔɔ̄kā ō yɔ̄ mla Ɔwɔicō ŋ́. 12Odúúdú ācɛ kwú igbīhi í cē kwu Ɔwɔicō,
é le nyíleyī. 13#Aíjē 5.9; Aíjē 140.3Ɛlā nōo ŋmá okónu kú uwā ī ŋmó ɔ̄cɛ.
É gē kɛlā obɔ̄bí ŋmá okónu.”
14 #
Aíjē 10.7
Ɛcá mɛ́mla ɛlā ō kwu odo nyaá gē ŋmá okónu kú uwā á.”
15 #
Ayis 59.7,8 É gē nwúleyīkwū kéē nyɔ̄ í ŋmó ɔ̄cɛ.
16Ɛga dúú nēé nyɔ̄ ā, é gē habɔ̄ ífi mɛ́mla ɔdā ō cataajɛ tá abɔ́ɔ.
17É jé ɔwɛ nɛ̄ ɔ̄cɛ gē lā ɛbɔ́ ā ŋ́.
18 #
Aíjē 36.1
“É kōō jé ɛ́gɛ́nɛ̄ ɔ̄cɛ gē lɛ ojīlīmā ce Ɔwɔicō ŋ́.”
19Abālɔbányā alɔ jé ka é tá ɛjɛ̄ɛ̄jī ɔdā dóódu nēe yɔ̄ ipú íne ā tāajɛ lɛ ācɛ nēe ī lɛyítáajɛ lɛ íne ā, o yá ɛ́ɛ́ kú ācɛ kéē má ɔdā ō lɛ abɔ̄ bá ɔ̄ ŋ́ cɛ́ɛ́ kú Ɔwɔicō kóō lɛ ɛpɔ̄ ka tū ācɛ kú ipú ɛcɛ. 20#Aíjē 143.2; Ugal 2.16Ohígbū keé gáā hɛ́pɔ̄hi lɛ ɔ̄cɛ dúúmā iyɔ̄bū Ɔwɔicō, o ŋmá lɛ ō yá ɔdā nɛ̄ íne ā dɔɔ̄kā ā ŋ́, amáŋ íne ā gē yá ká ācɛ kéē jé ka aá le íne bīya.
Ɔwɛ nɛ̄ Ɔwɔicō le hɛ́pɔ̄hi lɛ alɔ ā
21Amáŋ abālɔbányā Ɔwɔicō le ɔwɛ nōó í mīyɛ alɔ wā ɛgiyí nū ā mafú ɛɛ́. Íne ā í lɛ ɔdā dúú ō yá mla ɔwɛ ā ŋ́, nááná nɛ̄ ɔdā nēé tá ipú íne ā mɛ́mla ɔdā nɛ̄ ācomɛ́ɛbɛ ka ā wɛ ijáalí kú nū ā. 22#Ugal 2.16Ɔwɔicō mīyɛ ācɛ wā ɛgiyí nū ohígbū keé cɛ̄ɛ̄lā Ujísɔ̄si Ohɔ́nyɛtá. Ɔwɔicō yá ɛ̄nyā lɛ odúúdú ācɛ nēe cɛ̄ɛ̄lā kú Ohɔ́nyɛtá ā, ohígbū ka ɛyɛ́ɛ́yí í yɔ̄ ɔtāhɛ̄ kú ācɛ Ujíyu mɛ́mla aílɔ́wá ŋ́. 23Ohígbū ka odúúdú ācɛ le íne bīya, anɔ́ɔ é le ligbó lɛ Ɔwɔicō nōo ī nya ɔ̄cɛ tá ā á. 24Oŋmá lɛ eyīnyinyi kú Ɔwɔicō ā, ó le ɛpɔ̄hi hɛ́ lɛ alɔ. Ó yá ɛ̄nyā ohígbū Ujísɔ̄si nōo hɛ́ alɔ tá ŋmá ɛpɔ̄bí kú íne nɛ̄ alɔ bīya ā. 25Ɔwɔicō kwú Ɔyínɔ̄nyīlɔ kú nū kwɛcɛ kéē kwú ɔ̄ ú gwɛ́ɛya, cɛ́ɛ́ o ŋmá lɛ ikwū kú nū ā, ó kwú pīya ɔwɛ nōó í je íne nɛ̄ ācɛ bīya ā yá uwā ɛhi, oŋmá lɛ ɛlā kú nū nēé cɛ̄ ā. Ɔwɔicō yá ɛ̄nyā kóō mafú ka anúɔ le kpaakpa. Eko nɛ̄ncɛ̄ ā, Ɔwɔicō lɔtū lé, anɔ́ɔ ó leyī gwō íne nɛ̄ ācɛ bīya ā bónū á. 26Amáŋ eko kú abālɔbányā, Ɔwɔicō í leyī gwō íne nɛ̄ ācɛ bīya ā bónū gɛ ŋ́, cɛ́ɛ́ kóō mafú ka anúɔ ī yá ɔdā okpaakpa. Ó gē mīyɛ ɛjɛ̄ɛ̄jī ācɛ nēe cɛ̄ɛ̄lā Ujísɔ̄si ā wā ɛgiyí nū.
27Ɔdí nɛ̄ alɔ ī gwō ohígbū nū mɛ́ɛ̄ ā? Ó wɛ ɔdā dúú ŋ́! Ɔdíyá nɛ̄ alɔ í cíkā ō gwō ŋ́ mā a? Ó wɛ ohígbū ka alɔ gē lɛ íne ā tū nɛɛ? Ehéee, amáŋ ohígbū ka alɔ cɛ̄ɛ̄lā ā. 28Ohígbū ɔ́ɔmā Ɔwɔicō ī mīyɛ ɔ̄cɛ wā ɛgiyí nū ohígbū kóō cɛ̄ɛ̄lā nū nɛ̄ n, ó wɛ ohígbū kóō yá ɔdā nɛ̄ íne dɔɔ̄kā ā ŋ́. 29Kɛ̄ɛ ka Ɔwɔicō wɛ Ɔwɔicō kú ācɛ Ujíyu ōfōōfū uwā? Ó wɛ Ɔwɔicō kú aílɔ́wá dúú ŋ́ nɛɛ? Īī gbóó, ó wɛ Ɔwɔicō kú aílɔ́wá dúú nɛ. 30#Obla 6.4; Ugal 3.20 Ɔwɔicō ékpónú yɔ̄ lɛ ācɛ Ujíyu mɛ́mla aílɔ́wá á. Anɔ́ɔ ó géē mīyɛ ācɛ wā ɛgiyí nū ohígbū kéē cɛ̄ɛ̄lā Ujísɔ̄si Ohɔ́nyɛtá. 31Ālɔ̄ leyī gwō íne ā bónū ohígbū ka alɔ cɛ̄ɛ̄lā Ujísɔ̄si Ohɔ́nyɛtá ā mɛ́ɛnɛɛ? Ó lɛ ɔwɛ ŋ́! Ikɔkɔ ɔ́ɔmā alɔ í tū íne ā háyi.
Currently Selected:
ĀCƐ URÓM 3: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
