ĀCƐ URÓM 2
2
Ɔwɔicō í kɛpɔ̄ tū ɛjɛ̄ɛ̄jī alɛɛcɛ
1 #
Umát 7.1; Ulúk 6.37 Aá nēe ī ŋmó ācɛ ɔhá okónu ā, Ɛdɔ ɔ̄cɛ dúú nɛ̄ aá wɛ, á lɛ ɔdā ō lɛ abɔ̄ bá ɔ̄ ŋ́. Ohígbū ka eko nɛ̄ aá le ācɛ ŋmokónu, anɔ́ɔ aá abɔ̄yī aá kē le ɔdōbɔ̄bí ékpó piíí nēé yá nɛ̄ aá ŋmó uwā okónu ɔ́ɔmā yá, aá yɔ̄ ī ŋmó iyī aá okónu dúú. 2Odúúdú alɔ jé ka Ɔwɔicō yá ɔdā olɔhi eko nɛ̄ ó lɛ ɛpɔ̄ kú ācɛ nēe yá ɛdɔ ucē ōbɔ́bí nēe bá ā hɛ́ klla lɛ italā yá uwā. 3Amáŋ aá nēe gē yá ɔdā ékpó piíí nɛ̄ ācɛ ɔhá yá nɛ̄ aá ŋmá uwā okónu ā, í gáā kwu ŋmá ɛpɔ̄ nɛ̄ Ɔwɔicō í ka tū aá ā glá ŋ́. 4Kɛ̄ɛ ka aá ī leyī gwū Ɔwɔicō bónū ohígbū kóō gbonɛnɛ nɛ̄ɛ̄nɛ̄hi, ó kē yá aá italā ɔkwɔɔkwu nɛ̄ aá le ɔdōbɔ̄bí yá ŋ́. Ó gē cībū aá gbojī ajɛ ohígbū ka ó yɔ̄ ī yá ká aá le pīyabɔ̄ ŋmá íne ō bīya. 5Amáŋ aá lɛ ikpɛ̄yí olɔfú, abɔ̄ nōó i lɛ ā Ɔwɔicō í hɛ́pɔ̄ ká aá, géē yá aá italā olɔnɔ ɛ̄cī nōó géē cɔ̄nū í hɛ́pɔ̄ kú alɛɛcɛ dóódu ohígbū íne nēé bīya ā. 6#Aíjē 62.12; Aíit 24.12Ɛ́gɛ́nɛ̄ ɔnyɔɔnyɛ yúklɔ́ lɛ ā nɛ̄ Ɔwɔicō gáā cíla anú ulé á. 7Ɔwɔicō géē je oyēeyī nōó ī mɛ ŋ́ mā lɛ ācɛ nēe lɛ ɔtūlé bá ī yá ɔdā olɔhi, nēe klla bá ī dɔɔ̄kā ojīlīmā mɛ́mla oyēeyī nōó ī mɛ ŋ́ má ŋmá ɛgiyí nū ā. 8Amáŋ Ɔwɔicō géē yá ācɛ nēe gē tíne ō yá ɔdā nōo í bī itene gé lɛ iyī uwá ōfōōfū uwā, nēe klla gē tá kéē yá ɔdā nōo lɔhi, o yá ɛ́ɛ́ kéē yá ɔdōbɔ̄bí nēé tíne ō yá piyóó ā italā nɛ̄ɛ̄nɛ̄hi. 9Ɔwɔicō géē yá kú ācɛ nēe ī yá ɔdōbɔ̄bí ā kéē móōwē, é klla í jé ɔnɔ iyē. Ó í kē í gbɔɔ́ ŋmá ɛgiyí ācɛ Ujíyu aflɛ́yí, cɛ́ɛ́ ó gaá ce aílɔ́wá. 10Ɔwɔicō géē lɛ ojīlīmā ce ɔ̄cɛ dóódu nōo yá ɔdā nōo lɔhi ā, ó kē í yá kéē yɔ̄ ɛbɔ́. Ó kē í gbɔɔ́ ŋmá ɛgiyí ācɛ Ujíyu, cɛ́ɛ́ ó gaá ce aílɔ́wá. 11#Obla 10.17Ohígbū ka Ɔwɔicō í gē má eyīgoo kú ɔ̄cɛ ŋ́.
12Ɔwɔicō í yá aílɔ́wá italā eko nē é le íne bīya, nááná nɛ̄ ó wɛ uwá nēé je íne kú Umósīsi lɛ uwā ŋ́ mā. Ɔwɔicō klla kē í bī íne ā le hɛ́pɔ̄ o lɔnɔ tū ācɛ Ujíyu eko nēé le íne bīya, ohígbū ka uwá nēé je íne ā lɛ uwá á. 13Ohígbū ka ó wɛ ācɛ nēe jé íne ā nɛ̄ Ɔwɔicō je keé wɛ ācɛ okpaakpa ā ŋ́, amáŋ ācɛ nēe bī íne ā le yúklɔ́ ā nēé hɛ́pɔ̄hi lɛ uwá á. 14Eko nɛ̄ aílɔ́wá ā lɛ ɔdā nɛ̄ íne ā ka ā yá ŋmá ɔtū kú ɔ̄cɛ ɔlamu kú uwā, é gē mafú keé jé ɔdā obɔ̄bí nēé cíkā ō yá mɛ́mla ɔdā olɔhi nēé cíkā ō yá ā. 15Ucē kú uwā ī mafú ka ɔdā nɛ̄ íne ā dɔ̄ɔ̄kā le tá tū ipú ɔtū kú uwā. Ohígbū ka ɔtū kú uwā kē ī ŋmó uwā ɛpɔ̄bí eko ōhī, ó kē ī cɛ̄pɔ̄ uwā eko ōhī dúú. 16Anɔ́ɔ ɛ́gɛ́nɛ̄ é ka lɛ ípú ɔkōolɔhi nɛ̄ n tɔ́ɔna nū ā, ka Ɔwɔicō í bī Ujísɔ̄si Ohɔ́nyɛtá le kɛpɔ̄ tū ɔdā nɛ̄ ācɛ gbɛlá ipú ɔtū kú uwā nɛ̄ ɔ̄cɛ ɔhá dúú í jé ŋ́ mā.
17Amáŋ ɔ́dāŋ ka a ka anúɔ wɛ ɔ̄cɛ Ujíyu, nāa ke lɔtūce íne kú Ɔwɔicō ā, nāa kē ī gwō ka a wɛ ɔ̄cɛ ɔlɛ́ Ɔwɔicō. 18A jé ɔdā nɛ̄ Ɔwɔicō tíne ka ā yá ā, anɔ́ɔ a kē le nwū ŋmá ipú íne ā ká ā je ɔdā nōo olɔhi, 19a kē jé lɔɔlɔhi ka anúɔ wɛ ɔ̄cɛ ō bī aópeyī jé ɔwɛ, nāa kē wɛ ɔlá ofíyajɛ lɛ ācɛ nēe bá ajoodobū ā, 20ɔ̄cɛ o nwū ācɛ nɛ̄ ɔtū kú uwā í lɔfú ŋ́ ɛlā, itíca kú aógwuda. A lɔtūce ka ohígbū ka a jé íne ā, a le ɛjɛ̄ɛ̄jī ɔdā dóódu jé dúúdú, ɛlā nāa ka ā kē wɛ ɔkwɛ̄yi dúúdú mɛ́ɛ̄ á. 21Ó lɛ ā, awɔ nōo ī nwū ācɛ ɔhá ɛlā ā, á cíkā ō nwū iyī uwɔ ɛlā ŋ́ nɛɛ. A gē tɔ́ɔna ká ācɛ kéē híī wūwī ŋ́, amáŋ awɔ abɔ̄yī uwɔ kē ī wūwī. 22A ka lɛ ācɛ kéē híī cikpó ɔnyā ācɛ, amáŋ a kē ī cikpó ɔnyā ācɛ ɔhá. A gē ŋmó ɛcí nɛ̄ ācɛ ī pā okónu, amáŋ a kē kpó odée uwī ŋmá ikpɛ́cí. 23A gē gwō ka anúɔ jé íne kú Ɔwɔicō ā, amáŋ a gē yá kú ācɛ kéē nyí Ɔwɔicō ojīlīmā, o ŋmá lɛ íne nāa gē bīya ā. 24#Ayis 52.5Ohígbū keé tá ɔ̄ ipu ɔkpá kú ɛlɔ̄ɔwɔicō kahíníī, “Ohígbū aá nēe wɛ ācɛ Ujíyu ā, aílɔ́wá ī kɛlā obɔ̄bí kú Ɔwɔicō.”
25Ɔ́dāŋ́ ka aá lɛ íne kú Ɔwɔicō tū, apī nɛ̄ aá hɛ́ ā tīile lɛ aá. Amáŋ ɔ́dāŋ ka aá lɛ íne ā tū ŋ́ apī nɛ̄ aá hɛ́ ā í tīile lɛ aá ŋ́. 26Anɔ́ɔ ɔ́dāŋ ka aílɔ́wá, nōó hɛ́ apī ŋ́ má, lɛ ɔdā dóódu nɛ̄ íne ā ka ā tū, ó lɛ ā, Ɔwɔicō géē je uwá bɛ̄ɛka ɔdā nēé le apī hɛ́ ā. 27Aílɔ́wá ā géē ŋmó aá nōo wɛ ācɛ Ujíyu ā okónu ohígbū ka aá nēe wɛ ācɛ Ujíyu ā í lɛ íne ā tū ŋ́, nááná nēé lɛ íne tá tū odée lɛ aá, klla le aá apī hɛ́ ā. Amáŋ uwá ā lɛ íne ā tū nááná nēé hɛ́ apī ŋ́ mā, ohígbū ka ɛ́gɔ́ɔmā nɛ̄ ucē kú ɔlɛ́ uwā lɛ á. 28Ɔ́dāŋ́ ka ɔ̄cɛ le apī hɛ́ ɔ́ɔmā cābɔ̄ koó le pīya ɔ̄cɛ Ujíyu ɔkwɔ̄ɔ̄kwɛ̄yi nɛɛ? Ɔ̄cɛ í gē le pīya ɔ̄cɛ Ujíyu ohígbū koó lɛ apī hɛ́ ŋ́. 29#Obla 30.6Amáŋ ɔ̄cɛ nōo wɛ ɔ̄cɛ Ujíyu ipú ɔtū kú nū ā wɛ ɛ́nɛ́nɛ̄ ɔ̄cɛ Ujíyu á. Ɔ́ɔmā wɛ ɔ̄cɛ nēé le ɔtū kú nū tútū lɛ Ɔwɔicō, ɛ̄nyā wɛ úklɔ́ kú Alelékwū kú Ɔwɔicō nōo gē yá kú ɔ̄cɛ kóō je pīya ɔ̄cɛ Ujíyu eyīpú á. Ɛlā nēé tá tāajɛ ipú ɔkpá íne ā í yá ɔ̄ glá ŋ́. Ɔwɔicō gē cɛ̄tra ɔ̄cɛ ɔ́ɔmā á, ó wɛ ɔ̄cɛ ɔlamu ŋ́.
Currently Selected:
ĀCƐ URÓM 2: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma
