ÁLUKA 34
34
Ɛjī kú ajɛ ā
1Óndú ā da Umósīsi kahíníī, 2“Lɛ ka lɛ ācɛ kú Ísrɛ̄lu ā ka, eko nɛ̄ aá gā ipú ajɛ nɛ̄ n gáā je lɛ aá ā, ɛjī kú ajɛ ā géē lɛ ɛ́gɛ́nyā. 3Ɛháajɛ kú ajɛ ā géē gbɔɔ́ ŋmá ígbíli kú Usíni, ɛgiyí ɛjī kú Ɛ́dɔm ā, ɛjī kú ɛháajɛ ā géē gbɔɔ́ ŋmá oŋmɛ́yí kú ísu ɔmā ā, nōo yɔ̄ ɛnɔ̄ɔ̄cī ā. 4Ɛjī ā í pīya yɛ ɛháajɛ lɛyíkwu Akrabím gaá bū Usíni jāā ga Ukádɛssi Ubanéya. Cɛ́ɛ́ ó klla géē pīya bū ɛhíícō ga ɛnɔ̄ɔ̄nɛ̄ kú Uhása-Ádaa jāā ga Ásimɔ̄n, 5ɛga nɛ̄ ó géē pīya yɛ lɛyíkwu ɔpɛ́, ɛgiyí ɛjī kú Íjīpiti ā, gaá ŋmɛ́yí ísu kú Umeditarénīya ā. 6Ɛjī kú ɛnɔ̄ɔ̄nɛ̄ kú nū géē wɛ ísu kú Umeditarénīya ā. 7Ɛjī kú ɛhíícō kú nū géē gbɔɔ́ ŋmá ɛjī kú Umeditarénīya ā ga ɛyí ɛfu kú Uhɔ́ru. 8Ó klla í ŋmá abɔ́ɔ ga ɔwɛ kú Uhamáti, klla í yɛ nyɔ̄ Usɛ́dādi. 9Ó klla í yɛ ga Usífrɔn, cɛ́ɛ́ ó i ŋmɛ́yí Uhasa Ɛ́nan.”
10“Ɛjī kú ɛnɔ̄ɔ̄cī kú ajɛ ā í gbɔɔ́ ŋmá Uhasa-Ɛ́nan ga Usɛ́nfam. 11Ó klla í yɛ ga ɛháajɛ ga Uríbla, ɛnɔ̄ɔ̄cī kú Áyin, ga ɛyí ɛfu nēe bá ɛnɔ̄ɔ̄cī kú okónu éŋkpɔ̄ kú Ugálīli. 12Anɔ́ɔ ó í pīya yɛ ɛháajɛ ga ísu kú Ujɔ́dan gaá kwu ísu ɔmā ā. Ɛga nēe bá nyā géē wɛ ɔkíkā ɛnɛ kú ajɛ kú aá á.”
13 #
Áluk 26.52-56
#
Ujós 14.1-5
Anɔ́ɔ Umósīsi da ācɛ kú Ísrɛ̄lu ā kahíníī, “Ɛ̄nyā wɛ ajɛ nɛ̄ aá géē kɔ̄ lɛ ipɔ́ɔma ahāanɛ ce āyā kú Ísrɛ̄lu, oŋmá lɛ ūlī ō tá īkpɛ̄yí kú ipɔ́ɔma dóódu á. 14Ipɔ́ɔma kú Urúbɛ̄n mɛ́mla Ugádi, mɛ́mla āyā éyi kú ɛnɔ̄ɔ̄cī kú ipɔ́ɔma kú Umanásɛ, lɛ ajɛ kú uwā lɛ, klla lɛ ɔ́ kɔ̄ lɛ iyī uwā 15É lɛ ajɛ ā kpó lɛ aípɔ́ɔma ɛpɛlɛ́ɛpa ce āyā ā kē mīyɛ ɔdā kú úgwū kú uwā ɛɛ́. Ajɛ kú uwā gbɔɔ́ ŋmá ɛnɔ̄ɔ̄cī kú okónu ísu kú Ujɔ́dan nōo pīyeyī kwu Ujɛ́rīko ā.”
Aótrɛ̄yí nēe géē kɔ̄ ajɛ ā lɛ uwá ā
16Óndú ā da Umósīsi kahíníī, 17“Ɛlísa, ɔ̄cogwɛ́ɛya ā mɛ́mla Ujóssuwa, ɔyí kú Unún ā géē kɔ̄ ajɛ ā lɛ uwá á. 18Lɛ otrɛ̄yí éyééye fu ŋmá ipɔ́ɔma dóódu kéē tá uwā abɔ̄ ká ajɛ ō kɔ̄ ā. 19Ɛ̄nyā wɛ iyē kú aótrɛ̄yí ā á. Ákú ipɔ́ɔma kú Ujúda wɛ Ukálɛ̄bu ɔyí kú Ujɛ́fūnɛ. 20Ákú ipɔ́ɔma kú Usímīyɔn, wɛ Ussɛ́lumīyɛlu, ɔyí kú Ammíhūd. 21Ákú ipɔ́ɔma kú Ubénjamīn wɛ Ɛlídād, ɔyí kú Ukíslɔn. 22Ákú ipɔ́ɔma kú Udán wɛ, Ubúki, ɔyí kú Ujógli. 23Ákú ipɔ́ɔma kú Umanásɛ wɛ, Uhánīyɛlu, ɔyí kú Éfɔ̄du. 24Ákú ipɔ́ɔma kú Ɛfrēm wɛ, Ukémūwɛlu, ɔyí kú Ussíftan. 25Ákú ipɔ́ɔma kú Usébūlɔn wɛ, Ɛlísāfan, ɔyí kú Upanáci. 26Ákú ipɔ́ɔma kú Íssāka wɛ, Upatíyɛ̄lu, ɔyí kú Ásaan. 27Ákú ipɔ́ɔma kú Ássa, wɛ Ahihúdu, ɔyí kú Usɛlɔ́mi. 28Ákú ipɔ́ɔma kú Unáfutāli wɛ, Upɛdahɛ́lu, ɔyí kú Ammíhūdu.
29Ācɛ nēe bá nyā nɛ̄ Óndú ā fu kéē kɔ̄ ajɛ ā lɛ ācɛ kú Ísrɛ̄lu, eko nēé lɛ tá ajɛ kú Ukénan ā á.”
Currently Selected:
ÁLUKA 34: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma