UMÁTIYU 20
20
Ācīije kú ācoyúklɔ́ ipú ɛhɔ̄ ufáyin ā
1“Ajɔ̄ɔ̄cɛ́ kú ɔkpáncō lɛbɛ̄ɛka ádɔ̄lɛ́, nōo bɛ̄cɛ ɔ̄cɔ̄ɔ̄cī blibli gaá dɔɔ̄kā ācɛ nōó géē ce ɛhɔ̄ ufáyin kú nū lɛ uwá ā. 2Eko nōó le kagwó mɛ́mla ācoyúklɔ́ ā nɛ̄ ɔnyɔɔnyɛ kú uwā cɛ̄ ɔkɔ́bɔ igwɛ́ɛhɔ̄ ɛ̄cī éyi ā, ó lɛ uwá tū ga ɛhɔ̄ ufáyin kú nū ā. 3Ó le tá ɛcɛ ɛplá oje ahāanɛ kú ɔ̄cɔ̄ɔ̄cī, anɔ́ɔ ó má ācɛ ɔhá bá icííci ɔɔ́pu ā á. 4Anɔ́ɔ ó da uwá kahíníī, ‘Aá ga ipú ɛhɔ̄ ufáyin kú um dúú cɛ́ɛ́ ɔdā dúúmā nōo cíkā ā n géē cíla aá.’ Anɔ́ɔ é le yɛ á. 5Ó le tá ɛcɛ igbɔhá ɛplá ɛnɔ o yɛ̄ɛyí mɛ́mla ɛplá oje ɛtá kú ɔlɛ́ɛnɔ ā. Ó yá ɔdā ékpó ɔ́ɔmā kpɔ́. 6Ɛplá oje ɛhɔ̄ kú ɔ̄nɔ̄ɔnɛ̄ ā, ó le tá ɔɔ́pu, anɔ́ɔ ó má ācɛ ɔhá māháyi á. Ó da uwá kahíníī, ‘Ɔdíyá nɛ̄ aá húmáyī ú bá amānyā, nɛ̄ aá kē yá ɔdā dúúmā ícɛ ɛ́ɛ́ ŋ́ mā ā?’ 7Anɔ́ɔ é da ɔ́ kahíníī, ‘Ohígbū ka ɔ̄cɛ dúúmā í pūla alɔ úklɔ́ ŋ́’. Ó da uwá kahíníī, ‘Aá ga ipú ɛhɔ̄ ufáyin kú um nyɔ̄ í yúklɔ́ dúú.’ 8#Ulīf 19.13; Obla 24.15Anɔ́ɔ eko nɛ̄ ɔnɔ̄ɔ̄nɛ̄ le gbo ā, óndɛ̄hɔ̄ kú ufáyin ā da otrɛ̄yí kú ācoyúklɔ́ kú nū ā kahíníī, ‘Hī ācoyúklɔ́ ā igwú ká ā gbā ulé kú uwā lɛ uwá. Gbɔɔ́ ŋmá ācɛ igbīhāajɛ ga ācɛ ogbɔbū.’ 9Eko nɛ̄ ācɛ nēé pūla ɛplá oje ɛhɔ̄ kú ɔ̄nɔ̄ɔnɛ̄ ā gā ā, é le ɔkɔ́bɔ igwɛ́ɛhɔ̄ gbā lɛ ɔnyɔɔnyɛ kú uwā. 10Anɔ́ɔ eko nɛ̄ ācɛ nēé pūla aflɛ́yí ā gā a, é leyīce ka aá géē mīyɛ fíyɛ́. Amáŋ é ɔkɔ́bɔ igwɛ́ɛhɔ̄ ā nēé gbā lɛ ɔnyɔɔnyɛ kú uwā dúú á. 11Eko nēé mīyɛ ā, é gbɔɔ́ ō kiŋini lɛyíkwu ádɔ̄lɛ́ ā. 12É kahíníī, “Ācɛ igbīhāajɛ nēe bá ā yúklɔ́ áwa ékpó ōfūnū, amáŋ a kē lɛ ije gbā lɛ uwá jōnjīlɛ̄ mɛ́mla alɔ nēe hímáyī yúklɔ́ nɛ̄hi ɛ̄cī ā dúúdú ipú ɛnɔ okwɔ́lá ā.” 13“Amáŋ óndɛ̄hɔ̄ ā da éyi kú uwā kahíníī, ‘Oklóbīya um, ń yá uwɔ ɔdōōbɔ̄bí dúúmā ŋ́. Á cɛ̄ ɔkɔ́bɔ igwɛ́ɛhɔ̄ ɛ̄cī éyi mɛ́mla um ŋ́ nɛɛ? 14Kwú ɔdā nōo wɛ ákú uwɔ ā ú kú ā nyɔ̄. Ó he um ɔtū ā yá nɛ̄ n je lɛ ɔ̄cɛ igbīhāajɛ nyā ɛ́gɛ́nɛ̄ n je gā uwɔ ā dúú á. 15Ń yá ɔdā nɛ̄ n tíne mla ije nōo wɛ ákú um glá ŋ́ nɛɛ? Ɔdíyá nɛ̄ a gē mímálānyī ɔ́dāŋ ka n lɛ íjɛ́ɛ́lā jé āa?’ 16#Umát 19.30; Umák 10.31; Ulúk 13.30“Ɛ́gɛ́nyā nɛ̄ ācɛ igbīhāajɛ géē pīya ācɛ ogbɔbū, ācɛ ogbɔbū kē í pīya ācɛ igbīhāajɛ á.”
Ujísɔ̄si da ayíkpó kú nū igbɔ ɔ́mɛtá ka anɔ́ɔ géē móowe, é kē í ŋmó anúɔ
(Umák 10.32-34; Ulúk 18.31-34)
17Abɔ̄ Ujísɔ̄si yɔ̄ gē tū ɛfu ga Ujerúsālɛm ā, ó le ayíkpó igwɛ́ɛpa ā ofūwā kpó, anɔ́ɔ ó da uwá kahíníī, 18“Aá mɔ́ɔ, alɔ gē ga Ujerúsālɛm ɛɛ́. É géē je Ɔyínɔ̄nyīlɔ kú Ɔ̄cɛ tā otrɛ̄yí kú ācogwɛ́ɛya mɛ́mla aítíca kú íne abɔ̄. É géē ŋmó ɔ̄ ɛpɔ̄bí kéē lɛ ɔ́ ŋmó. 19É kē í je ɔ́ tā ācɛ éwɔhá abɔ̄ kéē juwēeyī lɛ ɔ́, klla í gɔ́ ɔ̄, kē klla í hɛ́ ɔ̄ tū ɔcóōnyɔ́kpá. Amáŋ igbīhāajɛ é géē je ɔ́ héyī ɛ̄cī ɔ́mɛtá ā.”
Ɛ́nɛ́ kú ayíkpó ɛpa éyi dɔɔ̄kā odée ŋmá ɛgiyí Ujísɔ̄si
(Umák 10.35-45)
20Anɔ́ɔ ɛ́nɛ́ kú ayínɔ̄nyīlɔ kú Usébēdi lɛ ayí nū kpó wā ɛgiyí Ujísɔ̄si á. Ó le okwúukwu kwajɛ lɛ Ujísɔ̄si, le ɛ̄ba éyi ba ŋmá abɔ̄ nū. 21Ujísɔ̄si dɔɔ̄kā kahíníī, “Ɔdí nɛ̄ a dɔɔ̄kā āa?”
Ɛ́nɛ́ ā da ɔ́ kahíníī, “Cɛ̄ ká ayí um nɔ̄nyīlɔ ɛpa nēe bá ā ka éyi kóō yɔ̄ abɔ̄lɔ́ná kú uwɔ, ka ɔhá kóo kē yɔ̄ abɔ̄lúfīyē kú uwɔ eko nɛ̄ a gaá cɔcɛ́ ā.” 22Amáŋ Ujísɔ̄si tóohi kahíníī, “Aá jé ɔdā nɛ̄ aá ī dɔɔ̄kā ā ŋ́. Aá lɔfú gwá íkókwū nɛ̄ n géē gwá ā glá ā?”
É tá ɔ̄ ohi kahíníī, “Alɔ lɔfú gwá glá.” 23Anɔ́ɔ ó da uwá kahíníī, “Aá géē gwá íkókwū kú um ɔkwɛ̄yi, amáŋ ń lɔfú fu ɔ̄cɛ nōo géē yājɛ abɔ̄lɔ́ná mɛ́mla abɔ̄lúfīyē kú um glá ŋ́. Amáŋ aɛ́ga ɔ́ɔmā wɛ ákú ācɛ nɛ̄ Ádā um le abɔ́ɔ tútú lɛ uwá ā nɛ.”
24Eko nɛ̄ ayíkpó igwó ohile ā le pó ā, ɔtū le wú uwā lɛyíkwu ayínɛ́ nɔ̄nyīlɔ ɛpa ā. 25#Ulúk 22.25,26Amáŋ Ujísɔ̄si hī uwā igwú wā ɛgiyí nū, anɔ́ɔ ó da uwá kahíníī, “Aá jé ka aɔ́cɛ́ kú aéwɔhá gē gbō uwā mla abɔ̄ olɔfú. Ācɛ nɛ̄hi kú uwā kē ī bī íkwu nēé lɛ ā yúklɔ́ īkpɛ̄yí kú uwā. 26#Umát 23.11; Umák 9.35; Ulúk 22.26Amáŋ ó gáā lɛ ā ɔtāhɛ̄ aá ŋ́. Ɔ̄cɛ nōo tíne kóō wɛ ɔ̄cɛ nɛ̄hi ɔtāhɛ̄ aá, géē wɛ ɔ̄cocɛ̄hɔ̄ kú aá ohile ā a 27Ɔ̄cɛ nōo kē tíne kóō wɛ otrɛ̄yí kú aá, géē wɛ ɔfiyɛ kú aá. 28Ó lɛbɛ̄ɛka ɛ́gɛ́nɛ̄ Ɔyínɔ̄nyīlɔ kú Ɔ̄cɛ í wā kéē cɛ̄ ɔ̄ ɛhɔ̄ ŋ́, amáŋ kóō cɛ̄ ācɛ ɛhɔ̄, kóō kē je oyēeyī kú nū bɛ̄ɛka ɔdā o le ōfūla ācɛ alɛwa ā.”
Ujísɔ̄si hɛ́ aópeyī ɛpa tá
(Umák 10.46-52; Ulúk 18.35-43)
29Eko nɛ̄ Ujísɔ̄si mɛ́mla ayíkpó kú nū bá ī bɛ̄cɛ ŋmá Ujérīko ā, ɛwa nɛ̄hi yɛce ɔ́. 30Aópeyī ɛpa nēe báajɛ okónu ɔwɛ ā pó ka Ujísɔ̄si ɔ́ɔ gáā yɛ. Anɔ́ɔ é gbɔɔ́ ō dɛ̄gba kahíníī, “Óndú, Ɔyínɔ̄nyīlɔ kú Udéfīdi, ményinyi alɔ.” 31Amáŋ ɛwa ā dɛ̄gba tū uwā kéē bá cíí. Amáŋ é dɛ̄gba fíyɛ́ kahíníī, “Óndú, Ɔyínɔ̄nyīlɔ kú Udéfīdi, ményinyi alɔ.” 32Ujísɔ̄si má háyi, le uwā hīgwú anɔ́ɔ ó da uwá ɔ̄kā kahíníī, “Ɔdí nɛ̄ aá tíne ká n̄ yá lɛ aá?” 33É da ɔ́ kahíníī, “Óndú, alɔ tíne ō mɛ́ɛbɛ.” 34Anɔ́ɔ ó ŋmá lɛ eyīnyinyi ā Ujísɔ̄si lɛ abɔ̄ kwu uwá eyī á. Ikpííkpó ɔ́ɔmā, é gbɔɔ́ ō mɛ́ɛbɛ, anɔ́ɔ é kē gbɔɔ́ ō yɛce ɔ́ á.
The Bible Society of Nigeria
Learn More About Ubáyíbu kú Idɔma