ULĪFAYI 9

Árɔ̄ni le ɛya gwó

1Ɛ̄cī ɔ́mahātá ā, Umósīsi le Árɔ̄ni, ayínɔ̄nyīlɔ kú nū mɛ́mla anyākwɔ́cɛ kú Ísrɛ̄lu ā kpó hīīgwú. 2Anɔ́ɔ ó da Árɔ̄ni kahíníī, “Kwú ɛdrɔ́ kú ɔbɛ́ɛna kú ɛya kú íne ō bīya ā mɛ́mla omlede kú ɛ̄gbā kú ɛya o yɔlá dúúdú nēé lɛ ɛnyá ŋ́, cɛ́ɛ́ a kwú uwā ú kpó gwɛ́ɛya lɛ Óndú ā. Ɔbɛ́ɛna ā wɛ ákú ɛya kú íne ō bīya, cɛ́ɛ́ omlede ā wɛ ákú ɛya kóō je yɔlá dúúdú. 3Cɛ́ɛ́ a le ka lɛ ācɛ kú Ísrɛ̄lu ā kéē kwú opi ú, kóō wɛ ɛya kú íne ō bīya. Kéē klla kwú ɔyí ɛna kú iháyí éyi mɛ́mla omlede kú iháyí éyi nēé lɛ ɛnyá ŋ́, kéē wɛ ɛya o yɔlá dúúdú. 4É géē bī ɔbɛ́ɛna mɛ́mla omlede kóō wɛ ɔdā ɛ̄gbā kú ɛbɔ́ lɛ Óndú ā. É í jé uwá gwɛ́ɛya lɛ Óndú ā mɛ́mla ɛya kú īkpɔ̄dɛ̄hɔ̄ nēé le anɔ̄ tū ɔ̄ ā. É géē yá ɛ̄nyā piíí ohígbū ka Óndú ā géē ma īyī nū fú lɛ uwá ícɛ.”

5Ɔdā dóódu nɛ̄ Umósīsi da uwá kéē bī wā ā, é le kpó wā ipú Áklɔ̄kpīihɔ ā. Odúúdú ācɛ kú Ísrɛ̄lu ā le túbá iyɔ̄bū Óndú ā abɔ́ɔ. 6Anɔ́ɔ Umósīsi da uwá kahíníī, “Óndú ā ka ka aá yá odúúdú aɔ́dā nēe bá nyā á, cɛ́ɛ́ kóō lɛ ɔfú kú nū mafú lɛ aá.” 7#Uhíb 7.27Anɔ́ɔ Umósīsi da Árɔ̄ni kahíníī, “Túbla ede ā, ká ā lɛ ɛya kú íne ō bīya mɛ́mla ɛya o yɔlá dúúdú gwó cɛ́ɛ́ kéē kwú íne nɛ̄ awɔ mɛ́mla ipɔ́ɔ́nū kú uwā bīya ā í yá aá ɛhi. Cɛ́ɛ́ a klla lɛ ɛya ɔhá gwó ká ā lɛ íne nɛ̄ ācɛ ā bīya ā í kpó nyɔ̄, ígbɛ́gɛ́nɛ̄ Óndú ā ka lɛ ā.”

8Árɔ̄ni le tá ɛyí ede ā, anɔ́ɔ ó le ɛdrɔ́ ɔbɛ́ɛna nōo wɛ ákú ɛya kú íne ō bīya kú nū ā ŋmó. 9Ayínɔ̄nyīlɔ kú nū le oyī kú ɛna ā bī gé lɛ ɔ́, anɔ́ɔ ó le ayíkābɔ̄ wu ɔ́, kwú ɔ̄ ú kwu aájī kú ede ā á. Ó kwú ohile kú nū ú pīya tū ɔkwu kú ede ā. 10Amáŋ ijē, íkplí, mɛ́mla ɛga olɔhi fíyɛ́ dúú kú anyī ā, ó le uwá kpó yɔlá ɛyí ede ā, ɛ́gɛ́nɛ̄ Óndú da Umósīsi ā. 11Amáŋ ó le ícɛ̄bɛ́ ohile mɛ́mla ɔkpá kú ɛbɛ́ ā kpó yɔlá eyīyɛ̄ɛcɛ kú ɔlɛ́ ā. 12Ó le ɛbɛ́ nōo wɛ ɔdā kú ɛya o yɔlá dúúdú kú nū ā ŋmó. Ayínɔ̄nyīlɔ kú nū le oyī kú nū bī gé lɛ ɔ́, anɔ́ɔ ó kwú ɔ̄ ú pīya tū ɔ́kíkā ɛnɛ kú ɔkwu kú ede ā á. 13É kwú īkpɛ̄yí mɛ́mla ɛbɛ́ nēé hɛ́ nyɛŋɛnyɛŋɛ ā ú kpó lɛ ɔ́, anɔ́ɔ ó kwú uwā ú kpó yɔlá ɛyí ede á. 14Ó le iyíipú mɛ́mla aíklíkpó ā na, anɔ́ɔ ó le uwá kpó yɔlá tɔ̄há mɛ́mla aɔ́dā kú ɛya o yɔlá dúúdú ohile ɛyí ede á.

Ɛya nēé gwó kwɛyí ācɛ ā

15Igbīhi ɛya kú nū nōó gwó ā, ó le ɔdée kú ɛya kú ācɛ ā kpó wɛ̄ɛcɛ. Ó kwú ɛwū nēé gáā je gwɛ́ɛya kú íne ō bīya kú ācɛ ā ú ŋmó, anɔ́ɔ ó kwú ɔ̄ ú gwɛ́ɛya, ɛ́gɛ́nɛ̄ ó yá mla ɛya nōó gwó kéē kpó íne nōo bīya ā yá ɔ̄ ɛhi ā. 16Ó klla le ɛbɛ́ kú ɛya o yɔlá dúúdú bī wɛ̄ɛcɛ, anɔ́ɔ ó kwú ɔ̄ ú gwɛ́ɛya ɛ́gɛ́nɛ̄ íne kú nū lɛ ā. 17Ó le ɔdée kú ɛya kú īkpɔ̄dɛ̄hɔ̄ ā bī wɛ̄ɛcɛ anɔ́ɔ ó le abɔ̄ fú ɔ̄ omōōmu, lɛ ɔ́ yɔlá ɛyí ede á. (Ó yá ɛ̄nyā mɛ́mla ɛya o yɔlá dúúdú kú ɛ̄cī dóódu ā)

18 # Ulīf 3.1-11 Ó le ɔbá ɛna mɛ́mla omlede nēé wɛ aɔ́dée kú ɛya kú ɛbɔ́ kú ācɛ ā ú kpó ŋmó. Ayínɔ̄nyīlɔ kú nū le oyī kú ɛbɛ́ ā bī gē lɛ ɔ́, anɔ́ɔ ó le ɔ́ pīya klá ɔ́kíkā ɛnɛ kú ede ā biílí á. 19Árɔ̄ni kwú ijē kú ɛna mɛ́mla omlede ā, ijē kú útūgbé ā, ijē nōo klá iyíipú ā, íkplí, mɛ́mla ɛga olɔhi fíyɛ́ dúú kú anyī ā ú. 20Anɔ́ɔ ó kwú ijē ā ú kpó ce ɛyí amɛ̄ ā, kwú uwā í kpó ce ɛyí ede ā, anɔ́ɔ ó kwú uwā í kpó yɔlá dúúdú ɛyí ede ā á. 21Amáŋ átákwū kú abɔ̄lɔ́ná mɛ́mla amɛ̄ ā, Árɔ̄ni le ɔ́ jíliyē kú ɛya nōo cɛgbá nɛ̄hi lɛ Óndú ā, ɛ́gɛ́nɛ̄ Umósīsi ka lɛ ā.

22 # Áluk 6.22-26 Eko nɛ̄ Árɔ̄ni le ɛya nēe bá nyā gwó kwɛyí ā, ó le abɔ̄ kú nū je gicō, anɔ́ɔ ó le ɔhā hɛ́ ce ācɛ ā, anɔ́ɔ ó gā ajɛ ŋmá ɛyí ede á. 23Umósīsi mɛ́mla Árɔ̄ni le tá ipú Áklɔ̄kpīihɔ ā. Eko nēé gā ɛcɛ ā, é le ɔhā hɛ́ ce ācɛ ā, anɔ́ɔ Ɔwɔicō le īyī nū mafú lɛ ācɛ ā, yɔ̄ ī ceyī ŋmaáŋmaá ā gā ɛgiyí ācɛ ā. 24Anɔ́ɔ ɔlá le bɛ̄cɛ ŋmá ɛgiyí Óndú ā gaá le aɔ́dée kú ɛya o yɔlá dúúdú ā kpó yɔlá ŋmá ajɛ mɛ́mla ijē nōo ce ɛyí ede ā. Eko nɛ̄ odúúdú ācɛ ā lɛ ɛ̄nyā má ā, é dɛ̄gba le eyī pīya klá ajɛ.

Currently Selected:

ULĪFAYI 9: IFBCL

Highlight

Copy

Compare