ULĪFAYI 10
10
Íne nɛ̄ Unádābu mɛ́mla Abíhu bīya ā
1Ayí kú Árɔ̄ni, Unádābu mɛ́mla Abíhu, kwú ocíbú ō fɔ́lá kú uwā ú, lɛ ɔlá fú tū ɔ̄, le ɔtulalī umuumu fú tū ɔ̄, anɔ́ɔ é kwú lɛ Óndú ā. Amáŋ ɔlá nyā í tīihɔ ŋ́, ohígbū ka Óndú ā í da uwá kéē bī ɔlá ɔ́ɔmā wā ŋ́. 2Igbeékpónú, Óndú ā le ɔlá tū wā í kwú uwā ú kpó yi iyɔ̄bū nū abɔ́ɔ. 3Anɔ́ɔ Umósīsi da Árɔ̄ni kahíníī, “Ɛ̄nyā wɛ ɔdā nɛ̄ Óndú ā yɔ̄ ī kɛla lɛyíkwu ɔ̄ eko nōó ka, ‘Odúúdú ācɛ nēe géē cɛ̄ um ɛhɔ̄ ā, géē lɛ ojīlīmā ce ɛ́gɛ́nɛ̄ n tīihɔ lɛ ā piíí. Ācɛ ɔlɛ́ um kē í wóofu um piíí.’ “Amáŋ, Árɔ̄ni í ka ɔdā dóódu ŋ́.
4Anɔ́ɔ Umósīsi lɛ Umíssɛ̄lu mɛ́mla Ɛlsáfan, ayí kú Ússíyɛlu, ɔmáapu ádā kú Árɔ̄ni ā, kpó hīīgwú, anɔ́ɔ ó da uwá kahíníī, “Aá wā í lɛ okwū kú ayínɛ́ɛpa aá kpó bɛ̄cɛ ŋmá ipú Áklɔ̄kpīihɔ cɛ́ɛ́ ká aá lɛ uwá kpó bá eyīyɛ̄ɛcɛ kú ɛga nɛ̄ ācɛ lá ā.” 5Anɔ́ɔ é gā gaá bī ɔdōwiyē kú aókwū ā, anɔ́ɔ é le uwá kpó ga eyīyɛ̄ɛcɛ kú ɛga nɛ̄ ācɛ lá ā, ɛ́gɛ́nɛ̄ Umósīsi ka ā ā.
6Anɔ́ɔ Umósīsi da Árɔ̄ni mɛ́mla Ɛlísa mɛ́mla Itáma, ayínɔ̄nyīlɔ kú Árɔ̄ni ā, kahíníī, “Aá lɛ ɛyí kú aá fíyɛ́, aá kē híī híla īlī kú aá ŋ́ ká ācɛ kéē jé ka aá yēekwu ŋ́. Ɔ́dāŋ ka aá le yá lɛ ā, aá géē kwú. Óndú ā kē í cɔ̄nū da odúúdú ójīla kú ācɛ Ísrɛ̄lu ā. Amáŋ odúúdú ācɛ kú Ísrɛ̄lu ɔ́mpa aá ā lɔfú yéekwu kú ācɛ nɛ̄ ɔlá nōo ŋmá ɛgiyí Ɔwɔicō ā kpó ŋmó nyā ā.” 7“Āa híī bɛ̄cɛ ŋmá ipú Áklɔ̄kpīihɔ ā ŋ́, ohígbū nɛ̄ aá géē kwú, ohígbū ka Óndú ā le anɔ̄ tū aá ɛyí, le aá fu.” Anɔ́ɔ é le yá ɛ́gɛ́nɛ̄ Umósīsi da uwá lɛ ā á.
Íne kú ɔ̄cogwɛ́ɛya
8Óndú ā da Árɔ̄ni kahíníī, 9“Awɔ mɛ́mla ayí uwɔ nɔ̄nyīlɔ, í gáā gwá ejé ámāŋ ka ejé olɔfú dúúmā gbɔbú ɛ́ɛ́ ká aá ga ipú Áklɔ̄kpīihɔ, ɛga nɛ̄ ami nōo wɛ Óndú ā yɔ̄ ā ŋ́. Aá géē kwú ɔ́dāŋ ka aá lɛ yá lɛ ā. Odúúdú ayááyí uwɔ géē lɛ íne nyā tū. 10Aá géē jé ɛyɛ́ɛyɛ́yí kú ɔdā nōo wɛ ákú Ɔwɔicō mɛ́mla ɔdā nōo wɛ ákú ójīla, ɔdā nōo tīihɔ mɛ́mla ɔdā ɔlamu. 11Aá í nwū ācɛ kú Ísrɛ̄lu odúúdú íne nɛ̄ ami Óndú ā je lɛ Umósīsi kóō je lɛ aá ā.”
Íne kú ɔdōlé otīihɔ
12 #
Ulīf 6.14-18
Umósīsi da Árɔ̄n mɛ́mla ayí nū nɔ̄nyīlɔ ɛpa ohile ā, Ɛlísa mɛ́mla Itáma kahíníī, “Aá kwú odée kú ɛya kú īkpɔ̄dɛ̄hɔ̄ nōo hile ŋmá ɛya kú ɔdōlé nēé je lɛ Óndú ā, ká aá lɛ igbō nōó gē nū ŋ́ mā, yá ŋmá anú, cɛ́ɛ́ aá kwú lé ɛgiyí ede ā, ohígbū ka ɛya nyā tīihɔ nɛ̄hi 13Aá géē lé ɔdōlé nyā ɛga otīihɔ ā, ohígbū koó wɛ ukpɛ̄ kú aá ŋmá ipú ɛya kú ɔdōlé nēé je lɛ Óndú ā. Ɛ́gɛ́nɛ̄ nɛ Óndú ā da um lɛ ā. 14#Ulīf 7.30-34Amáŋ, aá mɛ́mla ayínɔ̄nyīlɔ mɛ́mla ayínɔ̄nyā kú aá lɔfú lé amɛ̄ mɛ́mla átákwū kú abɔ̄lɔ́ná kú ɔdā nēé je kú ɛya lɛ Óndú ā, ɛga oyēŋēē. Aódée kú ɛya nyā wɛ ukpɛ̄ kú awɔ mɛ́mla ayípɛ̄ ɔlɛ́ uwɔ ŋmá aódée kú ɛya kú ɛbɔ́ nɛ̄ ācɛ kú Ísrɛ̄lu gē gwó lɛ Óndú ā. 15É géē bī átákwū mɛ́mla amɛ̄ nēé jíliyē ā wā eko nēé bī ijē wā kóō wɛ odée kú ɛya kú ɔdōlé gé lɛ Óndú ā. Aɔ́dā nēe bá nyā wɛ ákú uwɔ mɛ́mla ayípɛ̄ ɔlɛ́ uwɔ gbóógbóō ipú ɛcɛ nyā, ɛ́gɛ́nɛ̄ Óndú ā ka lɛ ā ā.”
16Umósīsi lɛ ɔ̄kā da lɛyíkwu ɔdā nēé yá mla opī kú ɛya kú íne ō bīya ā, anɔ́ɔ ó le jé keé kwú ɔ̄ ú yɔlá. Ɛ̄nyā cɛ̄ lɛ ɔ́ le cɔ̄nū mla Ɛlísa mɛ́mla Itáma, anɔ́ɔ ó kahíníī, 17#Ulīf 6.24-26“Ɔdíyá nɛ̄ aá je odée kú ɛya kú íne ō bīya ā lé ɛga otīihɔ ŋ́ mā? Ó tīīhɔ nɛ̄hi, Óndú ā kē kwú ú lɛ aá, o yá kóō yá kéē kwú íne nɛ̄ ācɛ ā í kpó yá uwā ɛhi 18Ɛ́gɛ́nɛ̄ aá bī oyī kú nū wā ipú Áklɔ̄kpīihɔ ŋ́ mā ā, aá géē yɛ í kwú ɔ̄ ú lé abɔ́ɔ, ɛ́gɛ́nɛ̄ n ka lɛ ā ā.”
19Árɔ̄ni tá Umósīsi ohi kahíníī, “Ɔdāŋ ka n kwú odée kú ɛya kú íne ō bīya kú uwā ú lé ícɛ nyā. Óndú ā í cɛ̄ ɛ̄ɛ̄? Ācɛ ā le odée kú ɛya kú íne ō bīya mɛ́mla ákú o yɔlá dúúdú ā bī gé lɛ Óndú ā ícɛ, náaná, ɔdōbɔ̄bí nɛ̄hi nyā le yá um?” 20Eko nɛ̄ Umósīsi le ɛ̄nyā pó ā, ó cē iyī nū bī.
Currently Selected:
ULĪFAYI 10: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma