ULĪFAYI 7
7
Íne kú ɛya kú ɔdā ō gbā cīgbīhi
1Aɛ́nyā wɛ íne kú ɛya kú ɔdā ō gbā cīgbīhi, nēe tīihɔ nɛ̄hi ā á. 2É géē ŋmó ɛbɛ́ ɛ̄gbā kú ɛya nyā ɛhícō kú ede ā, ɛga nēé gē ŋmó aɛ́bɛ́ kú ɛya ō yɔlá dúúdú ā. Cɛ́ɛ é kwú oyī kú nū í cē klá odúúdú ɔ́kíkā ɛnɛ kú ede ā. 3É géē kpó odúúdú ijē kú nū, ijē kú ugbé mɛ́mla ijē nōo klá iyíipú nū ā, 4íkplí kú nū mɛ́mla ijē nōo klá anú ā, mɛ́mla ɛga olɔhi fíyɛ́ dúú kú anyī ā wá ŋmá anú. 5Ɔ̄cogwɛ́ɛya ā géē je ɛjɛ̄ɛ̄jī ijē ā yɔlá ɛyí ede ā kóō wɛ ɔdōlé kú ɛya ō je lɛ Óndú ā. Ó wɛ ɔdā ɛ̄gbā kú ɛya kú ɔdā ō gbā cīgbīhi. 6Ɔ̄cɛnyīlɔ dóódu kú ipú ācogwɛ́ɛya ā géē lé á. é ké í lé ɛbɛ́ ā ɛga otīihɔ ā, ohígbū É fi koó tīihɔ nɛ̄hi. 7Íne ékpónú gē gbō ɛ̄gbā kú ɛya kú ɛpɔ̄bí ō lé mɛ́mla ákú ɛya kú ɔdā ō gbā cīgbīhi á. Ɛbɛ́ ā wɛ ákú ɔ̄cogwɛ́ɛya nōo gē gwɛ́ɛya ā. 8Ɔ̄cogwɛ́ɛya dóódu nōo gwɛ́ɛya ō yɔlá dúúdú ā, géē lɛ ɔkpá kú ɛ́bɛ́ ā á. 9Ɔdā ɛ̄gbā kú ɛya īkpɔ̄dɛ̄hɔ̄ dóódu nēé le bákánjɔ̄ ɛyí acɔ̄lá ā, ámāŋ ɛ̄nɛ̄ é yá ipú ɔdōŋmó odée ɔlá, ámāŋ ipú ákánjɔ̄ dóódu ā géē wɛ ákú ɔ̄cogwɛ́ɛya, nōo gwɛ́ɛya ɔ́ɔmā ā. 10Amáŋ, odúúdú ɔdā ɛ̄gbā kú ɛya kú īkpɔ̄dɛ̄hɔ̄ ɛ̄mɛ̄ɛ̄mɛ̄, kwu ɛ̄nɛ̄ é lɛ wīya mɛ́mla anɔ̄ ámāŋ ka ɛ̄nɛ̄ o wɛ umuumu, wɛ ákú odúúdú ayínɔ̄nīlɔ kú Árɔ̄ni nēe wɛ ācogwɛ́ɛya ā. É kē í kɔ̄ jōnjīlɛ̄ mɛ́mla iyī uwā.
Íne kú ɛya kú ɛbɔ́ ō gwó
11Aɛ́nyā wɛ aíne kú ɛya kú ɛbɔ́ nɛ̄ ɔ̄cɛ gēe gwó lɛ Óndú ā. 12Ɔ́dāŋ́ ka ɔ̄cɛ éyi lɛ ɛya nyā yá ɛya kú ahínyá ō tá Ɔwɔicō, ó géē bī ɛbɛ́ kú ɛya nēé gáā le gwɛ́ɛya ā mɛ́mla ɛ̄gbā kú igbō ō gwɛ́ɛya nēé lɛ ɔdōnīgbō tū ɔ̄ ŋ́. Ó lɔfú wɛ igbō ōcɔkpɛ́nú nēé bī umu nēé le wīya mɛ́mla anɔ̄ kú ólīifu ā, ámāŋ ka égblú nēé yá mla umu nēé wīya mɛ́mla anɔ̄ kú ólīifu ā. 13Ó géē bī igbō nēé le ɔdōnīgbō tū ɔ̄ ā wā mɛ́mla aɔ́dā ɛ̄gbā kú ɛya kú ahínyá ō tá Ɔwɔicō. 14Ó géē je āyā éyééye kú ɛdɔ kú aígbō ɛtá ā gwɛ́ɛya lɛ Óndú ā. Ohile ā géē wɛ ákú ɔ̄cogwɛ́ɛya nōo gé cē oyí kú ɛbɛ́ ā klá ɛyí ede ā. 15É géē je ɛbɛ́ kú ɛya kú ɛbɔ́ ā lé ɛ̄cī nēé gwɛ́ɛya kú ahínyá ō tá ā. Odúúmā kú nū í gaá hile gbɔ́ɔ̄cī ŋ́. 16Amáŋ, ɔ̄cɛ éyi lɔfú gwɛ́ɛya kú olétɔ̄há kóō yá oji nōó ce lɛ Óndú ā, ámāŋ kóō wɛ ɛya nōó je ŋmá ɔtū kú nū. É gáā je odúúdú lé ɛ̄cī nēé gwɛ́ɛya ā piíí ŋ́, āyā dóódu kú nū nōo hile gbɔ́ɔ̄cī, é lɔfú lé ɔŋmɔ́ɔ̄cī nū glá. 17Amáŋ ɛbɛ́ dúú nōo hile gbó ɛ̄cī ɔ́mɛɛtá ā, é géē je ɔ́ yɔlá. 18Ɔ́dāŋ́ keé lɛ āyā dúúmā kú ɛbɛ́ nēé le gwɛ́ɛya kú ɛbɔ́ ā lé ɛ̄cī ɔ́mɛɛtá, Óndú ā í gaá mīyɛ ɛya nɛ̄ ɔ̄cɛ ā gwó ā gɛ ŋ́. Ó kwu pīya ɔdēelihɔ ɛgiyí Óndú ā. Ɔ̄cɛ nōo lé ā, í mīyɛ ulé kú ɔdōbɔ̄bí nōo yá ā.
19Ɔ́dāŋ ka ɔdēelihɔ lɛ iyē kwu ɛbɛ́, ɔ̄cɛ dúú kóō híī lé ɛbɛ́ ɔ́ɔmā ŋ́. É géē je ɔ́ yɔlá.
Ɔ̄cɛ dóódu nēe lɛ yēŋēē ā géē lé ɛbɛ́ nēé cíkā ō lé ā á. 20Amáŋ, ɔ́dāŋ nɛ̄ ɔ̄cɛ dóódu nōó le yēŋēē ŋ́ le ɛbɛ́ kú ɛya kú ɛbɔ́ nēé gwó ā lé, Óndú ā géē hɛ́ ɔ̄ táajɛ ŋmá ipú ācɛ ɔlɛ́ nū. 21Ɔ́dāŋ ka ɔ̄cɛ dúúmā le abɔ̄ kwu ɔdēelihɔ dóódu, ó kōō wɛ ɔ̄cɛ ámāŋ ka ɛbɛ́, ayíka ó kwú iyī nū í tēelihɔ ɛɛ́. Óndú ā géē hɛ́ ɔ̄cɛ ɔ́ɔmā táajɛ ŋmá ipú ācɛ ɔlɛ́ nū.
Ɛga elihɔ kú ɛbɛ́ nēé le gwɛ́ɛya ā
22Óndú le aíne nēe bá ā kpó lɛ Umósīsi kóō je, 23lɛ ācɛ kú Ísrɛ̄lu. Ó kahíníī, “Aá gaá lé ijē kú ɛna, álá, ámāŋ ɛwū ŋ́. 24Ɔ̄cɛ dúú í gáā lé ijē kú ɛbɛ́ nōo gekwú abɔ̄yī nū, ámāŋ ijē kú ɛbɛ́ nɛ̄ ɛbɛ́ obɔ̄bí le ŋmó ŋ́. Amáŋ é lɔfú bī ɔ̄ le yá ɔdā ɔhá glá. 25Ɔ̄cɛ dóódu nōo lɛ ijē kú ɛbɛ́ nēé le gwɛ́ɛya lɛ Óndú ā lé, Ɔwɔicō í gáā ka ɔ́ tū ipú ācɛ ɔlɛ́ nū gɛ ŋ́. 26#Ohút 9.4; Ulīf 17.10-14; 19.26; Obla 12.16,23; 15.23Aá gáā lé oyī kú ɛbɛ́, ámāŋ ka ákú ígbáanɔ dúúmā, ɛga dúú nɛ̄ aá lā ŋ́. 27Ɔ̄cɛ dúúmā nōo lɛ íne nyā tányílá, Ɔwɔicō í gáā ka ɔ́ tū ipú ācɛ kú Ísrɛ̄lu ā gɛ ŋ́.
Ukpɛ̄ kú ɔdā ɛya nɛ̄ ācogwɛ́ɛya cíka ō lé ā
28Óndú le aíne nēe bá ā kpó lɛ Umósīsi kóō je 29lɛ ācɛ kú Ísrɛ̄lu kahíníī, “Ɔ̄cɛ dóódu nōo gē gwɛ́ɛya kú ɛbɔ́ lɛ Óndú ā, géē bī āyā kú ɔdā ɛ̄gbā kú ɛya kú nū gē lɛ Óndú ā abɔ̄yī nū. 30Ó géē bī ɔ̄ wā abɔ̄yī nū kóō wɛ ɛya kú ɔdōlé gé lɛ Óndú ā. Ó géē bī ijē mɛ́mla amɛ̄ ā wā, cɛ́ɛ́ ó kwú ɔ̄ ú ɛ̄gbā nōo cɛgbá nɛ̄hi lɛ Óndú ā. 31Ɔ̄cogwɛ́ɛya ā géē je ijē ā yɔlá ɛyí ede ā. Amáŋ amɛ̄ ā géē wɛ ákú Árɔ̄ni mɛ́mla ayínɔ̄nyīlɔ kú nū. 32É géē je átákwū kú abɔ̄lɔ́ná kú ɛbɛ́ ā lɛ ɔ̄cogwɛ́ɛya ā ŋmá ipú ɛya kú ɛbɔ́ nēé gwɔ́ ā. 33Ɔ̄cɛ kú ipú ayínɔ̄nyīlɔ kú Árɔ̄ni, nōo géē je oyī mɛ́mla ijē ā gwɛ́ɛya kú ɛbɔ́ ā, géē lɛ átákwū kú abɔ̄lɔ́ná kú ɛbɛ́ kú ɛya kú ɛbɔ́ ā á. 34Ohígbū ka Óndú ā abɔ̄yī nū kwú amɛ̄ mɛ́mla átákwū kú ɛbɛ́ kú ɛya nōo cɛgbá nɛ̄hi ā ú ŋmá ipú ɛbɛ́ kú ɛya kú ɛbɔ́ kú ācɛ Ísrɛ̄lu ā, anɔ́ɔ ó kwú kpó lɛ Árɔ̄ni mɛ́mla ayínɔ̄nyīlɔ kú nū á. Ɛ̄nyā wɛ ukpɛ̄ nɛ̄ ācɛ kú Ísrɛ̄lu í je lɛ uwá piíí, o ŋmá eko tá eko piyóó á. 35Ɛ̄nyā wɛ ukpɛ̄ kú Árɔ̄ni mɛ́mla ayínɔ̄nyīlɔ kú nū ŋmá ipú ɛbɛ́ kú ɛya o yɔlá dúúdú lɛ Óndú ā, nēé le tū lɛ uwá ŋmá ɛ̄cī nēé le abɔ̄ ce uwá ɛyí kéē wɛ ācogwɛ́ɛya lɛ Óndú ā á. 36Óndú ā je íne ā kú ācɛ kú Ísrɛ̄lu kéē je ukpɛ̄ kú ɛya ɔ́ɔmā lɛ uwā, ɛ̄cī nēé lɛ abɔ̄ ce uwá ɛyí ā. Ɛ̄nyā géē wɛ ukpɛ̄ kú uwá gbóóbgóō nɛ̄ ācɛ kú Ísrɛ̄lu gé je lɛ uwá á.
37Ɛ̄nyā wɛ aíne kú ɛya o yɔlá, ɛya kú īkpɔ̄dā, ɛya kú íne ō bīya, ɛya kú ɛpɔ̄bí ō lé, ákú abɔ̄ ō ce ācɛ ɛyí mɛ́mla ɛya kú ɛbɔ́ ā á. 38Óndú ā je aíne kú uwā nyā lɛ Umósīsi, ɛyí ɛfu kú Usáyínāyi kóō je lɛ ācɛ kú Ísrɛ̄lu, kéē bī ɔdā ɛ̄gbā kú ɛya kú uwā gé lɛ anúɔ ipú ígbíli kú Usáyínāyi ā.
Currently Selected:
ULĪFAYI 7: IFBCL
Highlight
Copy
Compare
Share
Want to have your highlights saved across all your devices? Sign up or sign in
The Bible Society of Nigeria
Learn More About Ubáyíbu kú Idɔma