ULĪFAYI 6

1 # Áluk 5.5-8 Óndú ā da Umósīsi kahíníī, 2“Ɔ̄cɛ dúúmā lɔfú jégēdē le íne kú Óndú ā bīya o ŋmá lɛ o mīyɛ ɔdā nɛ̄ ɔ̄cɛ Ísrɛ̄lu ɔ́mpa nū le ce ɔ́ abɔ̄ ā tɔ̄ɔ̄kwū, ámāŋ koó kwú odée kú nū uwi uwī, ámāŋ koó lɛ ɔ́ pīya tū, 3ámāŋ koó le odée nōo bí ā pīyɛ, anɔ́ɔ ó le ɛ̄kɛ̄mgbɛ̄ kā, le ɔkpá ɛ̄kɛ̄mgbɛ̄ gbo ka anúɔ í pīyɛ ɔ̄ ŋ́ mā. 4Eko nɛ̄ ɔ̄cɛ le íne bīya ipú ɔdā dúúmā kú aɔ́dā nēe bá ā nōó le ɛpɔ̄bí lé, ɔdā dóódu nōó je uwī ā, ó géē cíla ulé nū. Ó kōō wɛ ɔdā dúú nōó je uwī ámāŋ ɔdā dóódu nōó lɛ ipú ɔ̄cɛ ohɛ́lé, ipú ɔ̄cɛ opīyatū ā, ámāŋ ɔdā nēé le tū ɔ̄ abɔ̄ nōó mīyɛ tɔ̄ɔ̄kwu je ā, ámāŋ ɔdā nōo gebí nōó le ɔ́ pīyɛ, 5ámāŋ ɔdā dóódu nōó gbo ɔkpá ɛ̄kɛ̄mgbɛ̄ kú nū ā, ó géē cíla ulé kú odúúdú nū. Eko nēé le ɔ́ ŋmɛ́pɔ̄bí, ó géē gbā ulé kú ɔdā dóódu nēe bá ā ɛga éyi ŋmá ipú ɛhɔ̄ cɛyí ulé kú nū abɔ̄yīnū lɛ óndú nū piíí. 6Ó géē bī omlede nōó lɛ ɛnyá ŋ́ gé lɛ ɔ̄cogwɛ́ɛya ā kóō wɛ ɔdā ɛ̄gbā kú ɛya kú ō gbā cīgbīhi lɛ Óndú ā. Ɔ́lá nū í ŋmá lɛ ɛ́gɛ́nɛ̄ ɔ́lá kú ɔdā ɛ́gɔ́ɔmā gē lɛ ā. 7Ɔ́cogwɛ́ɛya ā géē gwɛ́ɛya kú íne nɛ̄ ɔ̄cɛ ā bīya ā ipéyī Óndú ā, cɛ́ɛ́ ó kwú íne nōó bīya ā í yá ɔ̄ ɛhi.

Ɛya ō yɔlá dúúdú

8Óndú ā da Umósīsi kahíníī, 9“Lɛ íne je lɛ Árɔ̄n mɛ́mla ayínɔ̄nyīlɔ kú nū ā ka, ɛya ō yɔlá ā géē ce ɛyí ede ā otú gbɔ́ɔ̄cī, ɔlá kú ɛyí ede ā kē í yɔ̄ ī cɛ̄ eko dóódu. 10Cɛ́ɛ́ ɔ̄cogwɛ́ɛya nōo i ile awulú nɛ̄hí wiye mɛ́mla ikakí nɛ̄hí kú nū wu ikpó, kwú ewo anāānɔ̄ nēe bá ɛyí ede ā ú kpó pīya tū áklō kú ede ā. 11Ó géē kpó īlī ɔhá wiiyē, cɛ́ɛ́ ó kwú ewo ā ú kpó ga ɛga oyēŋēē kú eyīyɛ̄ɛcɛ kú ɔ́lɛ́ ā. 12Ɔlá kú ɛyí ede ā í yɔ̄ ī cɛ̄ eko dóódu kpɔ́. Ó híī nyí ŋ́. Ɔ̄cogwɛ́ɛya ā géē kpó ɛfú tū ɛyí kú ede ā ɔ̄cɔ̄ɔ̄cī dóódu, cɛ́ɛ́ ó kwú ɛya ō yɔlá dúúdú ā ú kpó ce ɛyí nū. Ó í je ijē kú ɔdā ɛ̄gbā kú ɛya kú ɛbɔ́ ā yɔlá ɛyí nū. 13Ɔlá ā géē yɔ̄ ī cɛ̄ ɛyí ede ā eko dóódu, ó híī nyí gbóógbóō ŋ́.”

Ɛ̄gbā kú īkpɔ̄dɛ̄hɔ̄

14“Ɛ̄nyā wɛ íne kú ɛ̄gbā kú īkpɔ̄dɛ̄hɔ̄. Ayínɔ̄nyīlɔ kú Árɔ̄ni ā géē je ɔdā ɛ̄gbā kú ɛya ā lɛ Óndú ā iyɔ̄bū ede ā. 15Éyi kú uwā géē lɛ abɔ̄ fú umu kú īkpɔ̄dɛ̄hɔ̄ ā mɛ́mla anɔ̄ nōo yɔ̄ anú mɛ́mla ɔtulalī umuumu nēe bá ɛyí nū ā, cɛ́ɛ́ ó kwú ɔ̄ ú yɔlá ɛyí ede ā kóō wɛ oblatū keé kwú odúúdú nū ú lɛ Óndú ā. Ocu kú nū í he Óndú ɔtū. 16Árɔ̄ni mɛ́mla ayínɔ̄nyīlɔ kú nū géē lé ohile kú nū. É géē je ɔ́ yá igbō nōó gē nū ŋ́, é kē í je ɔ́ lé ɛga otīihɔ, eyīpú kú Áklɔ̄kpīihɔ ɛga nɛ̄ Óndú ā yɔ̄ ā. 17Ɛ̄nyā wɛ ukpɛ̄ kú ɛya o yɔlá kú um, nɛ̄ n je lɛ uwá á. Ó tīihɔ nɛ̄hi bɛ̄ɛka ɛya kú íne ō bīya mɛ́mla ɛpɔ̄bí ō lé ā. 18Ayínɔ̄nyīlɔ kú Árɔ̄ni ā géē yɔ̄ í lé piyóó á, ɛ́gɛ́nɛ̄ ó wɛ ukpɛ̄ kú uwā kú ɔdōlé nɛ̄ ācɛ gē bī gé lɛ Óndú ā. Ɔ̄cɛ ɔhá dóódu nōo lɛ abɔ̄ kwu ɔdōlé kú ɛya ā géē je tēelihɔ.

19Óndú ā da Umósīsi kahíníī, 20“Ɛ̄nyā wɛ ɛya nɛ̄ ɔnyɔɔnyɛ kú Árɔ̄ni mɛ́mla ayínɔ̄nyīlɔ kú nū géē gwó lɛ Óndú ā á, eko nēé lɛ abɔ̄ ce ɔnyɔɔnyɛ kú uwā ɛyí kóō kwú pīya ɔ̄cogwɛ́ɛya á. Ɛ̄cī nēé le abɔ̄ ce ɔ́ ɛyí ā, ó géē bī okoolo éyi kú umu ojōnjīlɛ̄ mɛ́mla ɛ́gɛ́nɛ̄ é gē miya ikpɔ̄dā kú ɛcí dóódu ā. É géē bī āyā éyi kú nū ɔ̄cɔ̄ɔ̄cī, āyā ɔhá kú nū ɔ̄nɔ̄ɔ̄nɛ̄. 21É géē wīya ɔ́ tɔ̄há mɛ́mla anɔ̄ a, kéē lɛ ɔ́ he ɔlá klla lɛ ɔ́ ca nyɛŋɛnyɛŋɛ. Cɛ́ɛ́ é kwú ɔ̄ ú gwɛ́ɛya kú īkpɔ́dɛ̄hɔ̄ lɛ Óndú ā nɛ̄ ocu kú nū í he Óndú ā ɔtú ā. 22Ɔ̄cogwɛ́ɛya nōo ŋmá ipú ayínɔ̄nyīlɔ kú Árɔ̄ni, nēé le abɔ̄ ce ɔ́ ɛyí kóō kwɛyí Árɔ̄ni ā géē gwɛ́ɛya nyā gbóógbóō á. 23Ɔ̄cɛ dóódu í gáā lé āyā dúúmā ŋmá ɛya kú īkpɔ̄dɛ̄hɔ̄ nɛ̄ ɔ̄cogwɛ́ɛya gwó ā ŋ́. É géē je odúúdú nū yɔlá.

Ɛ̄gbā kú íne ō bīya

24Óndú ā da Umósīsi kahíníī, 25“Le aíne lɛyíkwu ɔdā ɛ̄gbā kú ɛya kú íne ō bīya ā ka Árɔni mɛ́mla ayínɔ̄nyīlɔ kú ɔlɛ́ nū. É géē ŋmó ɛbɛ́ kú íne ō bīya ā ɔ́kíkā kú ɛhícō kú Áklɔ̄kpīihɔ ā, ɛga nēé gē ŋmó ɛbɛ́ kú ɛ̄gbā kú ɛya o yɔlá dúúdú ā. Ɛ̄nyā wɛ ɛya nōo tīihɔ nɛ̄hi o je lɛ Óndú ā. 26Ɔ̄cogwɛ́ɛya nōo gē gwɛ́ɛya kú íne ō bīya nyā ā géē je ɔ́lé ɛga otīihɔ éyi, ipú eyīpú kú Áklɔ̄kpīihɔ ɛga nɛ̄ Óndú ā yɔ̄ ā. 27Ɔ̄cɛ ámāŋ ka ɔdā dóódu nōo lɛ iyē kwu ícɛ̄bɛ́ nēé ŋmó ā géē je tēelīhɔ. Ɔ́dāŋ ka oyī kú ɛbɛ́ ā le tá klá ɔdōwiyē kú uwā dóódu, é géē na ɔ́ ɛga otīihɔ ā. 28Ɛ̄hī ɔmɛ dóódu nēé bī le he ɛbɛ́ ā, é géē je ɔ́ ca. Amáŋ ɔ́dāŋ ka ɛhī oje nēé bī le he ɔ́ á, é géē na ɔ́, klla lɛ ɔ́ cā mɛ́mla éŋkpɔ̄ péee. 29Ɔyínɔ̄nyīlɔ dóódu kú ipɔ́ɔ́nū kú ācogwɛ́ɛya ā lɔfú lé ɔdā ɛ̄gbā kú ɛya otīīhɔ nyā glá. 30Amáŋ, ɔ̄cɛ dúúmā í gáā lé ɔdā ɛ̄gbā kú ɛya kú íne ō bīya, nēé le oyī kú nū bī wā Áklɔ̄kpīihɔ gaá lɛ gwɛ́ɛya ɛga otīihɔ ā ŋ́, é géē je odúúdú nū yɔlá.”

Currently Selected:

ULĪFAYI 6: IFBCL

Highlight

Copy

Compare