ULĪFAYI 15

Aɔ́dā nēe gē pɛ́ ŋmá ɔ̄cɛ iyē gē je ɔ̄cɛ tēelihɔ ā

1Óndú ā le aíne nēe bá ā kpó lɛ Umósīsi mɛ́mla Árɔ̄n 2lɛ ācɛ kú Ísrɛ̄lu ā ka, “Ɔ́dāŋ ka ɔ̄cɛ dóódu le ɛcɔ̄nyā kpó, enyi nōo gē pɛ́ ŋmá agada kú nū wɛ ɔdēelihɔ. 3Ɔ́dāŋ ka enyi nōo yɔ̄ gē pɛ́ ā mɛ ámāŋ koó yɔ̄ í pɛ́ ŋmá agada kú nū kpɔ́. Ó kwú ɔ̄cɛ ā tēelihɔ. 4Agōdō dóódu nɛ̄ ɔ̄cɛ ɔ́ɔmā cīcē ámāŋ koó gwutá anú ā kwú pīya ɔdēelihɔ. 5Ɔ̄cɛ dúúmā nōo lɛ abɔ̄ kwu agōdō kú nū 6ámāŋ cīce ɔdā dúúmā nɛ̄ ɔ̄cɛ ā cīce anú ā, géē na īlī kú nū cɛ́ɛ́ ó lɛ iyē gwā. Ó kē í tēelihɔ jāā gbó ɔ̄nɔ̄ɔ̄nɛ̄. 7Ɔ̄cɛ dúúmā nōo lɛ abɔ̄ kwu ɔ̄cɛ nɛ̄ enyi ī pɛ́ ŋmá agada kú nū ā, géē na īlī cɛ́ɛ́ ó lɛ iyē gwā, ó kē í tēelihɔ jāā gbó ɔ̄nɔ̄ɔ̄nɛ̄. 8Ɔ́dāŋ ka ɔ̄cɛ nɛ̄ enyi gē pɛ́ ŋmá agada kú nū ā lɛ ahɛ tá klá ɔ̄cɛ dúúmā nōo le yēŋēē, ɔ̄cɛ ɔ́ɔmā í na īlī kú nū, lɛ iyē gwā, cɛ́ɛ́ ó kē í tēelihɔ jāā gbó ɔ̄nɔ̄ɔ̄nɛ̄. 9Ɔdā dóódu nɛ̄ ɔ̄cɛ nɛ̄ enyi yɔ̄ ī pɛ́ ŋmá agada kú nū ā cīce anú, í je tēelihɔ. 10Ɔ̄cɛ dóódu nōo lɛ abɔ̄ kwu ɔdā dúúmā nōó cīce anú í je tēelihɔ jāā gbó ɔ̄nɔ̄ɔ̄nɛ̄. Ɔ̄cɛ dúúmā nōo kwú ɔdā dúúmā nɛ̄ ɔ̄cɛ ā cīce anú ā ú, géē na īlī kú nū klla í gwíiyē, ó kē tēelihɔ jāā gbó ɔ̄nɔ̄ɔ̄nɛ̄. 11Ɔ́dāŋ́ ka ɔ̄cɛ nɛ̄ enyi gē pɛ́ ŋmá agada kú ā í na abɔ̄ ŋ́, nōó le abɔ̄ kwu ɔ̄cɛ ɔhá á, ɔ̄cɛ nōó le abɔ̄ kwu ɔ́ ā gē na īlī kú nū cɛ́ɛ́ ó lɛ iyē gwā, ó kē í tēelihɔ jāā gbó ɔ̄nɔ̄ɔ̄nɛ̄. 12Ɛtɛ́ kú ɔmɛ dóódu nɛ̄ ɔ̄cɛ ā lɛ abɔ̄ kwu ɔ́, é í je ɔ́ ca. Ógo kú ɔcí dóódu nōó lɛ abɔ̄ kwu ɔ́, é géē na ɔ́.

13Eko nɛ̄ ōcē kú ɔ̄cɛ nɛ̄ ɛnyi gē pɛ́ ŋmá agada ā mɛ, ó gē gbēyī ɛ̄cī ahāapa, cɛ́ɛ́ ó lɛ īlī kú nū kpó na, klla lɛ iyē gwā ipú éŋkpɔ̄ o yēŋēē nōo gē pɛ́, cɛ́ɛ́ ó kwú yá yēŋēē. 14Ɛ̄cī ɔ́mahātá ā, ó géē bī okóhō ɛpa mɛ́mla ɔklɛ́ɛbɛ́tɛ ɛpa gé lɛ ɔ̄cogwɛ́ɛya ā, okómpīinu kú Áklɔ̄kpīihɔ, ɛga nɛ̄ Óndú ā yɔ̄ ā. 15Ɔ̄cogwɛ́ɛya ā í je éyi kú uwā gwɛ́ɛya kú íne ō bīya, ɔhá ā wɛ ɛya o yɔlá ā. Ó kē í je ɔhá gwɛ́ɛya kú ɛya o yɔlá dúúdú lɛ Óndú ā. Cɛ́ɛ́ ó bī ɔwɛ nyā le uculo kú iyē ō gwu ā yá kwɛyí.

16Ɔ́dāŋ ka ɔ̄cɛ dúúmā lɛ iyē tá nōó jégēdēe ŋ́, ó géē gwīiyē, cɛ́ɛ́ ó kē í yɔ̄ tēelihɔ jāā gbó ɔ̄nɔ̄ɔ̄nɛ̄. 17Īlī dóódu ámāŋ ɔkpɛ́bɛ́ dóódu nɛ̄ iyē nēé tá ā gaá kwu ɔ́, é géē na ɔ́ éŋkpɔ̄, ó kē í wɛ ɔdēelihɔ jāā gbó ɔ̄nɔ̄ɔ̄nɛ̄. 18Ɔ́dāŋ ka ɔ̄cɛ le gwutá mɛ́mla ɔnyā, uwá ɛpɛlɛ́ɛpa géē gwīiyē, é kē í tēelihɔ jāā gbó ɔ̄nɔ̄ɔ̄nɛ̄.

19Eko nɛ̄ ɔ̄cɛnyā le nyílá, ó géē tēelihɔ kú nū ā ɛ̄cī ahāapa. Ɔ̄cɛ dóódu nōo lɛ abɔ̄ kwu ɔ́, géē je tēelihɔ jāā gbó ɔ̄nɔ̄ɔ̄nɛ̄. 20Ɔdā dóódu nōó gwutá anú ā, mɛ́mla ɔdā dóódu nōó cīce anú, eko nōó yɔ̄ ī nyílá ā, géē je pīya ɔdēelihɔ. 21Ɔ̄cɛ dóódu nōo lɛ abɔ̄ kwu agōdō kú nū géē na īlī kú nū klla í gwíiyē, ó kē í je tēelihɔ jāā gbó ɔ̄nɔ̄ɔ̄nɛ̄. 22Ɔ̄cɛ dóódu nōo kē lɛ abɔ̄ kwu ɔdā nōó cīce anú ā, géē na īlī kú nū, klla í gwīiyē, cɛ́ɛ́ ó kē í tēelihɔ jāā gbó ɔ̄nɔ̄ɔ̄nɛ̄. 23Ɔ́dāŋ́ ó kōō wɛ agōdō, ámāŋ ɔdā dóódu nɛ̄ ɔ̄cɛnyā ā cīce anú, eko nɛ̄ ɔ̄cɛ lɛ abɔ̄ kwu ɔ́, ɔ̄cɛ ɔ́ɔmā gē je tēelihɔ jāā gbó ɔ̄nɔ̄ɔ̄nɛ̄. 24Ɔ́dāŋ ka ɔ̄cɛnyīlɔ dúúmā lɛ gwutá mɛ́mla anú eko nōó yɔ̄ ī nyílá ā, ɔ̄cɛ ɔ́ɔmā kwú iyī nū tēelihɔ ŋmá oōnyílá kú ɔnyā ā, cɛ́ɛ́ ɔ̄cɛnyīlɔ ā géē tēelihɔ ɛ̄cī ahāapa. Agōdō dúúmā nēé gwutá anú ā le pīya ɔdēelihɔ. 25Ɔ́dāŋ ka onyílá kú ɔ̄cɛnyā dúúmā le pɛ́ ɛ̄cī alɛwa gla eko kú ōnyílá kú ɔyɔ̄ɔ̄yā kú nū ā, ámāŋ ɔ́dāŋ ka oyī ā yɔ̄ gē pɛ́ gɔbū kpɔ́ fíyɛ́ eko ōnyílá ɔlamu kú nū, ó géē tēelihɔ kpɔ́, ɔdā nōo yá nɛ̄ oyī ā yɔ̄ ī pɛ́ gɔbū ā, ɛ́gɛ́nɛ̄ ó gē lɛ eko kú ōnyílá kú ɔyɔ̄ɔ̄yā kú nū á. 26Agōdō dóódu nōó gwutá, ámāŋ ɔdā dóódu nōó cīce anú eko ɔ́ɔmā kwú pīya ɔdēelihɔ. 27Ɔ̄cɛ dóódu nōo kē lɛ abɔ̄ kwu ɔdā ɔ́ɔmā ā, géē na īlī kú nū klla í gwīiyē, cɛ́ɛ́ ó kē í tēelihɔ jāā gbó ɔ̄nɔ̄ɔ̄nɛ̄. 28Eko nɛ̄ oōnyílá kú nū ā mɛ, ó géē gbēyī ɛ̄cī ahāapa, cɛ́ɛ́ ó kwú yá yēŋēē. 29Ɛ̄cī ɔ́mahātá ā, ó géē bī okóhō ɛpa mɛ́mla ɔklɛ́ɛbɛ́tɛ ɛpa gé lɛ ɔ̄cogwɛ́ɛya ā okómpīinu kú Áklɔ̄kpīihɔ ɛga nɛ̄ Óndú ā yɔ̄ ā. 30Ɔ̄cogwɛ́ɛya ā géē je éyi kú aígbáanɔ ā gwɛ́ɛya kú íne ō bīya. Cɛ́ɛ́ ó kwú ɔhá ā ú gwɛ́ɛya o yɔlá dúúdú lɛ Óndú ā. Cɛ́ɛ́ ó bī ɔwɛ nyā le uculo kú iyē ō gwu yá kwɛyí.

31Óndú ā da Umósīsi kóō pi ācɛ Ísrɛ̄lu ahɔ̄ lɛyíkwu ɔdēelihɔ, cɛ́ɛ́ kéē je Áklɔ̄kpīihɔ, ɛga nōó yɔ̄ nōo kwu ɔtāhɛ̄ kú ɛga nēé lā ā nyílá ŋ́. Ɔ́dāŋ keé le yá lɛ ā, é géē je uwá kpó ŋmó.

32Ɛ̄nyā wɛ íne kú ɔ̄cɛ nɛ̄ enyi gē pɛ́ ŋmá agada kú nū, 33ɔ̄cɛnyā dúúmā nōo yɔ̄ ī nyílá kú ɔyɔ̄ɔ̄yā, mɛ́mla ɔ̄cɛnyīlɔ dúúmā nōo lɛ iyē kwu ɔnyā nōo yɔ̄ ī nyílá, le tēelihɔ á.

Currently Selected:

ULĪFAYI 15: IFBCL

Highlight

Copy

Compare