ULĪFAYI 14

Ɛ́gɛ́nɛ̄ é gē gwu ācɛ nōo lɛ agwú iyē ā

1Óndú ā kpó aíne nēe bá nyā lɛ Umósīsi 2#Umát 8.4; Umák 1.44; Ulúk 5.14; 17.14lɛyíkwu ɛ́gɛ́nɛ̄ é géē yá uculo kú ō je yá ye ŋēē kú ɔ̄cɛ nōo tɛɛ lɛ agwú nɛ̄ é je ōcē ā ŋmó tū ɔ̄ iyē ā a. Ɛ̄cī nēé ka tɛ́ɛcɛ ka ka ōcē ā mɛ ɛɛ́ mā, é géē bī ɔ̄cɛ ā wā gé lɛ ɔ̄cogwɛ́ɛya ā. 3Cɛ́ɛ́ ɔ̄cogwɛ́ɛya ā géē je ɔ̄cɛ ā ga eyīyɛ̄ɛcɛ kú ɔlɛ́ ā, cɛ́ɛ́ ó lɛ ɔ́ jila. Ɔ́dāŋ ka ōcē ā mɛ ɛɛ́, 4ɔ̄cogwɛ́ɛya ā géē ka kóō lɛ aígbáanɔ nɛ̄ŋ́cɛ́ nōó lɛ ɛnyá ŋ́ ɛpa kpó tɔ̄há mɛ́mla ɔcí kú usɛ́da, owú ɔgalúlá, mɛ́mla ābɔ̄ kú ɔcí nēé hī ka uháyísɔ̄pu ā. 5Anɔ́ɔ ɔ̄cogwɛ́ɛya géē je ɔ́da kéē lɛ éyi kú aígbáanɔ ā ŋmó ipú aklɛ nɛ̄hi nɛ̄ éŋkpɔ̄ oyēŋēē yɔ̄ ipú nū ā. 6Ó í je ígbáanɔ oyēeyī ā, ɔcí kú usɛ́da ā, owú ɔgalúlā ā, mɛ́mla ābɔ̄ kú uháyísɔ̄pu ā í kpó wu ipú oyī kú ígbáanɔ kú aflɛ́yí nēé ŋmó ā. 7Ó gē mī oyī ā klá ɔ̄cɛ nɛ̄ agwú kú nū mɛ ā igbo ahāapa. Cɛ́ɛ́ ó géē ka tɛ́ɛcɛ ka agwú kú nū mɛ ɛɛ́, kóō le yá yēŋēē ɛɛ́. Ɔ̄cogwɛ́ɛya ā je ígbáanɔ̄ nōo yēeyī ā tá gicō kóō kwú wu ga ipácí. 8Ɔ̄cɛ ā géē na īlī kú nū dóódu, ó klla í wā ɔnwū kú nū, í gwīiyē, cɛ́ɛ́ ó kwú yá yēŋēē. Ó lɔfú wā ipú ɔlɛ́ ā, amáŋ ó gáā lā ipú áklɔ̄kpɛ kú nū ŋ́ ɛ̄cī ahāapa. 9Ɛ̄cī ɔ́mahāapa ā, ó géē wá odúúdú ɔnwū ɛyí, ɔnwū agba, odúúdú ɔnwū eyī mɛ́mla ɔnwū kú ɛga ɔhá kú nū. Ó géē na īlī kú nū, klla ī gwīiyē, cɛ́ɛ́ ó kwú yá yēŋēē.

10Ɛ̄cī ɔ́mahatá ā, ó géē bī ɔyí álá ɛpa, nōó lɛ ɛnyá ŋ́ mɛ́mla ɔyí álá nɔ̄nyā kú iháyí éyi nōó lɛ ɛnyá ŋ́, okoolo nɛ̄ŋ́cɛ́ kú umu kú īkpɔ̄dɛ̄hɔ̄ éyi, mɛ́mla anɔ̄ lígíí. 11Ɔ̄cogwɛ́ɛya ā, géē bī ɔ̄cɛ ā mɛ́mla ɔdā nōó kpó wā ga okómpīinu kú Áklɔ̄kpīihɔ, ɛga nɛ̄ Óndú ā yɔ̄ ā. 12Anɔ́ɔ ɔ̄cogwɛ́ɛya ā géē je éyi kú omlede ā mɛ́mla anɔ̄ lígíí ā, cɛ́ɛ́ ó kwú ɔ̄ ú gwɛ́ɛya kú íne ō bīya. Ó géē jíla anú iyē iyɔ̄bū Óndú ā, cɛ́ɛ́ kóō wɛ ɛya nōo cɛgbá lɛ Óndú ā. 13Ó géē ŋmó omlede ā ɛga nēé gē ŋmó ɛbɛ́ kú ɛya kú íne ō bīya mɛ́mla ákú ɛbɛ́ ō yɔlá dúúdú ā. Ó í yá ɛ̄nyā ohígbū ka ɛya kú ɛpɔ̄bí ō lé ā mɛ́mla ákú íne ō bīya ā wɛ̄ ákú ɔ̄cogwɛ́ɛya ā. Ó kē tīihɔ nɛ̄hi. 14Ɔ̄cogwɛ́ɛya ā géē je ōhī kú oyī kú ɛya nēé gwó kú ɛpɔ̄bí ō lé ā, lɛ ɔ́ kwu ákpáhɔ̄ abɔ̄lɔ́ná mɛ́mla ocúgbɔ̄ɔdu kú abɔ̄lɔ́ná, mɛ́mla ocúgbɔ̄ɔdu ikpó abɔ̄lɔ́ná kú ɔ̄cɛ ā. 15Ɔ̄cogwɛ́ɛya ā í je ōhī kú anɔ̄ kú ólīifu ā cɛ́ɛ́ ó lɛ ɔ́ hɛ́ tū ɔtābɔ̄ kú abɔlúfīyē, 16kwú ayíkābɔ̄ kú abɔ̄lɔ́ná kú nū ú wu anɔ̄ ā, cɛ́ɛ́ ó lɛ ɔ́ mī klá abɔ́ɔ igbahāapa ipéyī Óndú ā. 17Ó géē je anɔ̄ ōhī nōo hile ɔtābɔ̄ kú nū ā mɛ́mla oyī ōhī, cɛ́ɛ́ ó kwú ɔ̄ ú kwu ákpáhɔ̄ abɔ̄lɔ́ná, ocúgbɔ̄ɔdu abɔ̄lɔ́ná, ocúgbɔ̄ɔdu ikpó kú abɔ̄lɔ́ná kú ɔ̄cɛ nēé ka tɛ́ɛcɛ koó kwú yá yēŋēē ɛ́ɛ́ má. 18Ó géē je anɔ̄ nōo hile ipú abɔ̄ kú nū ā tū ɛyí kú ɔ̄cɛ ā. Ɔwɛ nyā nōó géē yá uculo kú iyē ō gwu á, cɛ́ɛ́ kéē kwú íne o bīya ú yá ɔ̄cɛ ɔ́ɔmā ɛhi á.

19Anɔ́ɔ ɔ̄cogwɛ́ɛya ā géē gwɛ́ɛya kú íne ō bīya ā kwɛyí nū, cɛ́ɛ́ ó klla lɛ uculo kú iyē ō gwu ā yá. Igbīhi ɛ̄nyā cɛ́ɛ́ ó lɛ ɛbɛ́ kú ɛya o yɔlá dúúdú ā gwó. 20Igbīhi ɛ̄nyā ā, ó klla lɛ ɛya kú īkpɔ̄dɛ̄hɔ̄ gwó ɛyí ede ā. Ɔwɛ nyā nɛ̄ ɔ̄cogwɛ́ɛya ā géē yá uculo kú iyē ō gwu á, cɛ́ɛ́ ɔ̄cɛ ā kwú yá yēŋēē.

21Amáŋ ɔ́dāŋ ka ɔ̄cɛ̄ ā wɛ ɔ̄cɛ ogbɛhá, nōó bī ɔdā nēe bá nyā glá ŋ́, ó géē bī omlede éyi kú ɛya nēé í gwó kú ɛpɔ̄bí ō lé, nēé í jíliyē iyɔ̄bū Óndú ā, nōo wɛ ákú ɔ̄cogwɛ́ɛya ā. Ó géē bī okoolo nɛ̄ŋ́cɛ́ kú umu mɛ́mla anɔ̄ ólīifu lígíí. 22Ó klla géē bī okóho ɛpa ámāŋ ka oklɛ́bɛ́tɛ ɛpa. Éyi wɛ ákú ɛya kú íne ō bīya, ɔhá ā kē wɛ ákú ɛya o yɔlá dúúdú ā. 23Ɛ̄cī ɔ́mahātá kú uculo kú iyē o gwu kú nū ā, ó géē bī uwā wā gé lɛ ɔ̄cogwɛ́ɛya ā, okómpīinu kú Áklɔ̄kpīihɔ ā. 24Ɔ̄cogwɛ́ɛya ā géē kpó omlede mɛ́mla anɔ̄ kú ólīifu, cɛ́ɛ́ ó lɛ uwá jíliyē iyɔ̄bū Óndú ā kóō wɛ ɛhi nōo cɛgbá lɛ Óndú ā, nōo wɛ ákú ɔ̄cogwɛ́ɛya ā. 25Ó géē ŋmó omlede ā, cɛ́ɛ́ ó kwú ōhī kú oyī ā ú kwu akpáhɔ̄ abɔ̄lɔ́ná kú ɔ̄cɛ ā, ocúgbɔ̄du abɔ̄lɔ́ná kú nū, mɛ́mla ocúgbɔ̄du abɔ̄lɔ́ná kú ikpó abɔ̄lɔ́ná kú nū. 26Ɔ̄cogwɛ́ɛya ā géē pīya ōhī kú anɔ̄ ā tū ɔtābɔ̄ kú abɔ̄lúfīyē ā. 27Ó géē bī ayíkābɔ̄ kú abɔ̄lɔ́ná ā lɛ ōhī kú anɔ̄ ā mī klá abɔ́ɔ igbāhāapa ipéyī Óndú ā. 28Ɔ̄cogwɛ́ɛya ā géē lɛ ōhī kú anɔ̄ a kwu akpáhɔ̄ abɔ̄lɔ́ná, ocúgbɔ̄ɔdu kú abɔ̄lɔ́ná kú ɔ̄cɛ ā mɛ́mla ocúgbɔ̄ɔdu ikpó kú abɔ̄lɔ́ná kú nū, ɛgɛ́nɛ̄ ó yá oyī kú ɛya nēé gwó kú ɛpɔ̄bí ō lé ā. 29Ɔ̄cogwɛ́ɛya géē je anɔ̄ nōo hile ā pīya tū ɔtābɔ̄ kú nū ā, ó géē lɛ ɔ́ tū ɔ̄cɛ ā ɛyí. Cɛ́ɛ́ ó bī ɔwɛ nyā lɛ uculo kú iyē ō gwu ā yá kwɛyí. 30Ó géē je ɔklɛ́ɛbɛ́tɛ amáŋ okóhō ā gwɛ́ɛya 31kú íne ō bīya. Ó géē je aɔ́há mɛ́mla īkpɔ̄dɛ̄hɔ̄ kú ɛ̄gbā kú ɛya ā kpó gwɛ́ɛya o yɔlá dúúdú. Cɛ́ɛ́ ó bī ɔwɛ nyā lɛ uculo kú iyē ō gwu ā yá kwɛyí. 32Ɛ̄nyā wɛ aíne kú ɔ̄cɛ nōo lɛ agwú nōó gáā má ɔdā ō bī gwɛ́ɛya kú o yá yēŋēē kú nū glá ŋ́ mā ā.

Íne lɛyíkwu úwɔ́ɔhɔ̄ mɛ́mla émúká kú ɔlɛ́.

33Óndú ā da Umósīsi mɛ́mla Árɔ̄ni kahíníī, 34“Eko nɛ̄ aá gā ipú ajɛ kú Ukénan, nɛ̄ n gáā je lɛ aá, kóō wɛ ákú aá ā, nɛ̄ n cɛ̄ lɛ úwɔ́ɔhɔ̄ mɛ́mla émúká ú gaá le yá tū ɔdɔ kú ipú inu ɔlɛ́ aá, ɔdā nɛ̄ aá géē yá ā yɔ̄ á. 35Ɔ̄cɛ nōo lɛ ɔlɛ́ ā géē nyɔ̄ í ka lɛ ɔ̄cogwɛ́ɛya lɛyíkwu ɔda nōó má ipú inu ɔlɛ́ nū ā. 36Ɔ̄cogwɛ́ɛya ā géē ka kéē lɛ ɛjɛ̄ɛ̄jī ɔdā dóódu kpó ga ɛcɛ ŋmá ipú inu ā gbɔbū ɛ́ɛ́ kóō bēhé ga ipú inu gaá má úwɔ́ɔhɔ̄ mɛ́mla émúká ā. Ɔ́dāŋ koó lɛ ā ŋ́, odóódú aɔ́dā nēe bá ipú inu ā í je pīya ɔdēelihɔ. Cɛ́ɛ́ ɔ̄cogwɛ́ɛya ā le bēhé ga ipú inu ā klɔ́dɔ́ɔ́. 37Ó géē jila ɔ́wɔ́ɔhɔ̄ mɛ́mla émúká ā. Ɔ́dāŋ ka úwɔ́ɔhɔ̄ mɛ́mla émúká ā yɔ̄ ī lé ga ipú ɔdɔ ā nɛ, 38ɔ̄cogwɛ́ɛya ā géē bɛ̄cɛ ŋmá inu ā, cɛ́ɛ́ ó lɛ ɔwɛ gwū tū inu ā ɛ̄cī ahāapa. 39Ɔ̄cogwɛ́ɛya ā géē kwúcē wā ɛ̄cī ɔ́mahāpá ā kóō lɛ inu ā jila kpɔ́. Ɔ́dāŋ ka úwɔ́ɔhɔ̄ mɛ́mla émúká ā le nyīla, 40Ɔ̄cogwɛ́ɛya āa géē ka kéē lɛ ɛcɔ̄ kú inu nɛ̄ odée ā yɔ̄ ā fu wɛ̄ɛcɛ, kéē klla kwú uwá ú tá ga ɛga o tēelihɔ eyīyɛ̄ɛcɛ kú igelī nɛ̄hi ā. 41Cɛ́ɛ́ é lɛ odúúdú ɔdɔ ā kla, kwú ɔdā nēé kla ŋmá anú ā í kpó ga ɛga nēé gē kpó imū bá eyīyɛ̄ɛcɛ kú igelī ā. 42Cɛ́ɛ́ é kwú aɛ́cɔ̄ ɔhá ú gwu ɔkwu kú aɛ́nɛ̄ é fu ŋmá ɔdɔ ā, klla lɛ ɔdɔ ā plla igbɔhá kpɔ́.

43Ɔdāŋ ka úwɔ́ɔhɔ̄ mɛ́mla émúká ā gā kpɔ́ igbīhi nēé lɛ ɛcɔ̄ ā fu, lɛ inu ā pla igbɔhá ā. 44Ɔ̄cogwɛ́ɛya ā géē nyɔ̄ í jila anú. Ɔ́dāŋ ka úwɔ́ɔhɔ̄ mɛ́mla émúká ā le nyīla tū inu ā nɛɛ, ayíka inu ā kwú tēelihɔ ɛɛ́. 45É géē ca inu ā tāajɛ, cɛ́ɛ́ é kwú ɛcɔ̄ kú nū, aɔ́cí kú nū, ɔdā nēé le plla ɔdɔ kú inu ā í kpó bónū ɛga nēé gē kpó imu tū eyīyɛ̄ɛcɛ kú ɔlɛ́ ā. 46Ɔ̄cɛ dúúmā nōo le tá inu ā, eko nēé gwū ɔwɛ tū ɔ̄ ā, géē je tēelihɔ jāā gbó ɔ̄nɔ̄ɔ̄nɛ̄. 47Ɔ̄cɛ dóódu nōo gwutá ipú inu ā ámāŋ ka o lé ɔdōlé ipú inu ā géē na īlī kú nū.

48Amáŋ ɔ́dāŋ ka ɔ̄cogwɛ́ɛya ā gáā lɛ inu ā jila, nōó le má ka úwɔ́ɔhɔ̄ mɛ́mla émúká ā ɔ́ɔ jɛ̄ gɔbū gɛ ŋ́ eko nēé le ɔ́ plla ā, ó géē ka tɛ́ɛcɛ ka inu ā ɔ́ɔ le yá yēŋēē ɛɛ́, ohígbū keé kwú odúúdú émúká ā í kpó kla bónú ɛɛ́. 49O gwu inu ā iyē kóō le yá yēŋēē ā, ó géē bī aígbáanɔ̄ nɛ̄ŋcɛ́ ɛpa, ɔ̄cí usɛ́da, owú ɔgalúlā mɛ́mla ābɔ̄ kú uháyísɔ̄pu. 50Ó géē je éyi kú aígbáanɔ ɛpa ā ŋmó ipú aklɛ nɛ̄ éŋkpɔ̄ kú nū yɔ̄ péee ā. 51Ó géē je ɔcí kú usɛ́da ā, mɛ́mla ígbáanɔ nōo yēeyī ā, mɛ́mla owú ɔgalúlā mɛ́mla ābɔ̄ kú uháyísɔ̄pu ā wu ipú oyī kú ígbáanɔ nēé ŋmó ipú aklɛ nɛ̄ éŋkpɔ̄ yɔ̄ anú ā. Cɛ́ɛ́ ó lɛ ɔ́ mī klá inu ā igbahāapa. 52Ó géē bī ɔwɛ ɛ́gɛ́ɛnyā le yá uculo kú iyē ō gwu kú inu ā mɛ́mla oyī kú igbáanɔ ā, éŋkpɔ̄ péee ā, igbáanɔ oyēeyī ā, ɔcí kú usɛ́da ā, ābɔ̄ kú uháyísɔ̄pu mɛ́mla owú ɔgalúlā ā. 53Cɛ́ɛ́ ó lɛ ígbáanɔ nōo yēeyī ā hɛ́tá ga ipácí. Cɛ́ɛ́ ó bī ɔwɛ nyā lɛ uculo kú iyē ō gwu kú inu ā yá ɔkwɛ̄yi, cɛ́ɛ́ inu ā kwú yá yēŋēē.

54Aɛ́nyā wɛ aíne kú ōcē ōbɔ̄bí kú ɔkpíyē dóódu á. K wiyē o wú ɔ̄cɛ 55mɛ́mla ákú úwɔ́ɔhɔ̄ mɛ́mla émúká kú īlī dúúmā ámāŋ ka inu, 56mɛ́mla ákú ɔdā dóódu nōo le hɛ́mi ámāŋ ka ínálégbé á. 57Ó gē mafú eko nɛ̄ aɔ́dā nēe bá le tēelihɔ ámāŋ eko nēé kē tēelihɔ ŋ́. Ɛ̄nyā wɛ íne kú agwú mɛ́mla ɔ́wɔ́ɔhɔ̄ mɛ́mla émúká á.

Currently Selected:

ULĪFAYI 14: IFBCL

Highlight

Copy

Compare