OŌYƐBƐ̄CƐ 40

É kwú Áklɔ̄kpīihɔ kú Óndú ā ú kwajɛ klla kwú ɔ̄ ú tū Óndú ā abɔ̄

1Óndú ā da Umósīsi ka, 2“Ɛ̄cī aflɛ́yí kú ɔyā aflɛ́yí ā, a géē je Áklɔ̄kpīihɔ ā kwajɛ. 3A í je Ikpati kú okónu ōce kú Óndú ā háyi ipú nū, cɛ́ɛ́ aá kwú īlī ú klá iyɔ̄bū Ikpati kú okónu ōce kú Óndú ā. 4Kwú utébulu ā ú wā inū, cɛ́ɛ́ aá kwu iyó kú nū ú kpó ce ɛyí nū. A géē je ɔdā ō lɛ agege ce ɔ́ ā wā inū, cɛ́ɛ́ aá klla kwú agege ā ú kpó ce ɔ́. 5Kwú ede kú ugóolu (oje ɔdɔ) o yi ɔtulalī ɔlá ɛyí nū ā ú háyi iyɔ̄bū kú Ikpati kú okónu ōce kú Óndú ā, cɛ́ɛ́ a kwú ukɔ́tin kú okómpinu kú Áklɔ̄kpīihɔ ā ú playi anú. 6Kwú ede kú ɛya ō yɔlá dúúdú ɛyí nū ā ú haajɛ iyɔ̄bū kú Áklɔ̄kpīihɔ ā. 7Kwú ɔgbanjɛ̄ ō bī na abɔ̄ ā ú háyi ɔtāhɛ̄ kú Áklɔ̄kpīihɔ mɛ́mla ede ā, cɛ́ɛ́ a le éŋkpɔ̄ hɛ́ tū ɔ̄. 8A kwú igá nēe yɛ Áklɔ̄kpīihɔ jīla tá biílí ā kpó kwajɛ, cɛ́ɛ́ aá kwú ukɔ́tin kú okómpinu kú nū ā ú playi anú. 9Cɛ́ɛ́ a kwú Áklɔ̄kpīihɔ ā ú tū Óndú ā abɔ̄, o ŋmá lɛ o bī anɔ̄ ōtīihɔ lɛ mī klá anú mɛ́mla aɔ́dā dóódu nēe bá ipú nū ā. Cɛ́ɛ́ é kwú yá tīihɔ dúúdú. 10A géē kpó ede mɛ́mla aíyó kú nū dóódu ā tū Óndú ā abɔ̄, ó ŋmá lɛ o mī anɔ̄ ōtīihɔ klá anú mɛ́mla aíyó kú nū dóódu ā. 11A klla í je ɔgbanjɛ̄ ā mɛ́mla ɛga ō háyi kú nū ā tū Óndú ā abɔ̄, ó ŋmá lɛ o mí anɔ̄ ō tīihɔ klá anú.

12Lɛ Árɔ̄ni mɛ́mla ayí nū nɔ̄nyilɔ ā bī wā okómpinu kú Áklɔ̄kpīihɔ ā. Cɛ́ɛ́ kéē lɛ iyē gwā. 13Kwú aɔ́dōwīyē kú ācogwɛ́ɛya ā ú kpó wu Árɔ̄ni iyē, cɛ́ɛ́ a lɛ anɔ̄ tū ɔ̄ ɛyí, cɛ́ɛ́ ɔwɛ̄ ékpónú ɔ́ɔmā a kwú abɔ̄ ú ce ɔ́ ɛyí, o yá ɛ́ɛ́ kóō yúklɔ́ ká ɔ̄cogwɛ́ɛya gā um glá. 14Lɛ ayínɔ̄nyīlɔ kú nū kpó wā dúú, cɛ́ɛ́ a kwú ukafután ā ú kpó wu uwá iyē. 15Lɛ anɔ̄ tū uwā ɛyí ɛ́gɛ́nɛ̄ a le tū ádā uwā ɛyí ā, cɛ́ɛ́ kéē yúklɔ́ kú ācogwɛ́ɛya gā um. Anɔ̄ nēé le tū uwā ɛyí nyā géē je uwá pīya ācogwɛ́ɛya piyóó.”

16Umósīsi lɛ ɔdā dóódu yá, ɛ́gɛ́nɛ̄ Óndú ā da ɔ́ ā. 17Anɔ́ɔ ipú ɔyā aflɛ́yí kú iháyí ɔ́mpa nēé nyɛ̄ɛ̄ ŋmá ajɛ kú Íjīpiti ā, é kwú Áklɔ̄kpīihɔ ɛga nɛ̄ Óndú ā yɔ̄ ā ú kwajɛ. 18Umósīsi kwú aígbóoje-otáajɛ ā ú kpó báajɛ, le aɔ́kpá ā kpó wu uwá kwajɛ, le aógbló ō tū okónu ɔlɛ́ ā ú kwu ɔ́, anɔ́ɔ ó kwú aɔ́kpa ú kpó kwajɛ á. 19Anɔ́ɔ ó kwú ɔdōklá Áklɔ̄kpīihɔ ā ú nā klá anú. É klla kwú ɔdōklóodēe kú iyɛ̄ɛcɛ ā ú nā klá Áklɔ̄kpīihɔ ā, ɛ́gɛ́nɛ̄ Óndú ā da Umósīsi lɛ ā. 20Anɔ́ɔ ó kwú usiléti kú ɛcɔ̄ kú íne igwó ā ú kpó tū ipú Ikpati kú okónu ōce kú Óndú ā, anɔ́ɔ ó le ogbló kú Ikpati ā kpó wu ipú aéliká kú ikpati ā, anɔ́ɔ ó kwú ɔ̄wū ú klá anú á. 21Anɔ́ɔ é kwú Ikpati kú okónu ōce kú Óndú ā ú wā í háyi ipú Áklɔ̄kpīihɔ ā, anɔ́ɔ é kwú ukɔ́tin í playi icō á. Ɔwɛ nyā ukɔ́tin ā má gwū Ikpati kú Ɛka kú Óndú ā, ɛ́gɛ́nɛ̄ Óndú ā ka lɛ ā.

22É kwú utébulu ā ú háyi ipú Áklɔ̄kpīihɔ, eyīyɛ̄cɛ kú ɛhícō ukɔ́tin ā. 23Anɔ́ɔ é kwú igbō nēé kpó gé lɛ Óndú ā í kpó ce ɔ́ ɛ́gɛ́nɛ̄ Óndú ā da Umósīsi lɛ ā. 24É kwú ɔdā ō lɛ agege ce ɔ́ ā ú háyi ābɔ̄ ɛháajɛ kú ipú Áklɔ̄kpīihɔ ā, lɛ eyī pīyakwu utébulu ā. 25Anɔ́ɔ ipéyī Óndú ā, é le ɔlá kwu agege ā, ɛ́gɛ́nɛ̄ Óndú ā da Umósīsi lɛ ā. 26É kwú ede kú ugóolu (oje ɔdɔ) ā ú háyi ipú Áklɔ̄kpīihɔ ā, iyɔ̄bū kú ukɔ́tin ā, 27anɔ́ɔ é le ɔtulalī umuumu ā fú tū ɔlá, ɛ́gɛ́nɛ̄ nɛ̄ Óndú ā da Umósīsi lɛ ā. 28É kwú ukɔ́tin ā ú playi okómpinu kú Áklɔ̄kpīihɔ ā. 29É kwú ede nēé gē gwɛ́ɛya o yɔládúúdú ɛyí nū ā ú háyi iyɔ̄bū ukɔ́tin ā. É le ɛya o yɔlá dúúdú mɛ́mla ɛya kú īkpɔ̄dā gwó ɛyí nū, ɛ́gɛ́nɛ̄ Óndú ā da Umósīsi lɛ ā. 30É kwú ɔgbanjɛ̄ ō bī na abɔ̄ ā ú háyi ɔtāhɛ̄ kú ede mɛ́mla Áklɔ̄kpīihɔ ā, anɔ́ɔ ó lɛ éŋkpɔ̄ kpó tū ɔ̄ omōōmu á. 31Umósīsi, Árɔ̄ni mɛ́mla ayínɔ̄nyīlɔ kú nū gē nabɔ̄ mɛ́mla ikpó kú uwā abɔ́ɔ, 32eko nēé gē wā ipú Áklɔ̄kpīihɔ ā ámāŋ, ka eko nēé gē ga ɛgiyí ede ā, ɛ́gɛ́nɛ̄ Óndú ā da Úmósīsi lɛ ā. 33Úmósīsi le igá cē tū Áklɔ̄kpīihɔ ā mɛ́mla ede tá biílí, anɔ́ɔ ó kwú ukɔ́tin ā ú playi icō kú okómpinu kú igá ā. Anɔ́ɔ ó kwú odúúdú úklɔ́ ā í yá mɛ á.

Ojuja nōo wā í klá Áklɔ̄kpīihɔ ā

34 # 1 Aɔ́cɛ́ 8.10,11; Ayis 6.4; Isík 43.4,5; Mafú 15.8 Anɔ́ɔ ojuja wā í klá Áklɔ̄kpīihɔ ā, anɔ́ɔ ɔlá ōceyī ŋmaá-ŋmaá ocābɔ̄ ka Óndú yɔ̄ ɛgée ā, wā í le Áklɔ̄kpīihɔ ā tū mu. 35Umósīsi í ga ipú Áklɔ̄kpīihɔ glá ŋ́, ohígbū ojuja nōo klá anú ā. 36Ipú odúúdú iyāwu kú uwā ā, eko dóódu nɛ̄ ojuja ā nyɛ̄ɛ̄ ŋmá Áklɔ̄kpīihɔ ā nɛɛ, é gbɔɔ́ ō yɛ gɔbū. 37Ɔdā nōo yá ɛ́ɛ́ nɛ̄ ojuja ā yɔ̄ ipú Áklɔ̄kpīihɔ ā, é gáā nyɛ̄ɛ ŋmá ɛga nɛ̄ é bá ā ŋ́. 38Ipú odúúdú iyāwu kú uwá ā, ojuja kú Óndú ā kla Áklɔ̄kpīihɔ ā ɔlɛ́ɛnɔ, ɔlá kē yɔ̄ ī cɛ̄ ɛyí kú Áklɔ̄kpīihɔ ā otū.

Currently Selected:

OŌYƐBƐ̄CƐ 40: IFBCL

Highlight

Copy

Compare